ഗസ്സയിൽ ഹമാസിന്റെ നിലപാടിന് മുന്നിൽ മുട്ടുമടക്കി ഇസ്രായേൽ; രണ്ടാംഘട്ട ചർച്ചക്കൊരുങ്ങുന്നു

തെല്‍അവീവ്: സമ്മർദതന്ത്രം ഫലിക്കില്ലെന്ന് കണ്ടതോടെ ഹമാസുമായി വീണ്ടും ചർച്ചക്കൊരുങ്ങി ഇസ്രായേൽ. രണ്ടാംഘട്ട ചർച്ചക്കായി ഇസ്രായേൽ സംഘം നാളെ ദോഹയിലെത്തും.

സുരക്ഷാ വിഭാഗങ്ങളുമായും അമേരിക്കയുമായും നടന്ന ആശയവിനിമയത്തിന്‍റെ അടിസ്ഥാനത്തിലാണ് ഇസ്രായേൽ സംഘത്തെ നാളെ ദോഹയിലേക്ക്​ അയക്കാനുള്ള തീരുമാനം. ഇസ്രായേൽ പ്രധാനമന്ത്രി ബിന്യമിൻ നെതന്യാഹുവിന്‍റെ ഓഫീസാണ്​ തീരുമാനം പ്രഖ്യാപിച്ചത്​. നെതന്യാഹുവിന്‍റെ രാഷ്ട്രീയ ഉപദേശകൻ ഒഫിർ ഫാൾക്കും സംഘത്തിലുണ്ടാകും.

മധ്യസ്ഥ രാജ്യങ്ങളായ ഈജിപ്തും ഖത്തറും കഴിഞ്ഞ ദിവസങ്ങളിൽ ഇസ്രായേൽ, അമേരിക്കൻ നേതൃത്വവുമായി തിരക്കിട്ട ചർച്ചകൾ നടത്തിയിരുന്നു. സമ്പൂർണ വെടിനിർത്തൽ കൂടാതെ ഇനി ബന്ദികളെ കൈമാറില്ലെന്ന നിലപാടിൽ ഹമാസ്​ ഉറച്ചുനിൽക്കുകയും ഇസ്രായേലിൽ ബന്ദികളുടെ ബന്ധുക്കള്‍ വ്യാപക പ്രക്ഷോഭത്തിന്​ ആഹ്വാനം ചെയ്യുകയും ചെയ്തതോടെ​ നെതന്യാഹു ഭരണകൂടം വെട്ടിലാകുകയായിരുന്നു.

ആക്രമണം പുനരാരംഭിച്ചാൽ ബന്ദികളുടെ ജീവൻ അപകടത്തിലാകുമെന്ന തിരിച്ചറിവും ഹമാസുമായി ചർച്ചക്ക്​ ഇസ്രായേലിനെ പ്രേരിപ്പിച്ച ഘടകമാണ്​. അതേസമയം രണ്ടാംവട്ട ചർച്ചക്ക്​ വേദിയൊരുങ്ങുന്നത്​ നല്ല കാര്യമാണെന്ന്​ ഹമാസ്​ പ്രതികരിച്ചു. ഗസ്സക്ക്​ നേരെയുള്ള ഇസ്രായേൽ ഉപരോധം ബന്ദികളെയും ബാധിക്കുമെന്ന്​ ഹമാസ്​ മുന്നറിയിപ്പ്​ നൽകി.

എന്നാല്‍ ഹമാസിനെതിരായ പോരാട്ടത്തിൽ ട്രംപ്​ ഭരണകൂടം നൽകിവരുന്ന സഹായം വളരെ വലുതാണെന്ന്​ നെതന്യാഹു പ്രതികരിച്ചു. അതിനിടെ, ഗസ്സയിലേക്കുള്ള സഹായത്തിനേർപ്പെടുത്തിയ ഉപരോധം ഇസ്രായേൽ നാലു ദിവസത്തിനകം പിൻവലിച്ചില്ലെങ്കിൽ അവർക്കെതിരായ നാവിക പ്രവർത്തനങ്ങൾ പുനരാരംഭിക്കുമെന്ന് യെമനിലെ ഹൂതികൾ മുന്നറിയിപ്പ്​ നൽകി.

ഗസ്സയി​ൽ പട്ടിണിയും ദുരിതവും വ്യാപിക്കുന്നതായ യുഎൻ ഏജൻസികളുടെ റിപ്പോർട്ടിന്‍റെ പശ്ചാതലത്തിലാണ്​ ഹൂതികളുടെ ഭീഷണി.