ഗസ്സക്ക് പിന്നാലെ സിറിയൻ സൈനിക തലസ്ഥാനത്തും ബോംബിട്ട് ഇസ്രായേൽ; നാലു പേർ കൊല്ലപ്പെട്ടു,നിരവധി പേര്‍ക്ക് പരിക്ക്

ദുബൈ: ഗസ്സക്കും ലബനാനും പിന്നാലെ സിറിയൻ സൈനിക തലസ്ഥാനത്തും ബോംബിട്ട് ഇസ്രായേൽ. തെ​ക്ക​ൻ സി​റി​യ​യി​ലെ സുവൈദയിൽ ഡ്രൂസുകൾക്കു നേരെ സിറിയൻ സൈന്യം നടത്തുന്ന അതിക്രമങ്ങൾക്ക് മറുപടിയായാണ് ആക്രമണമെന്നാണ് ഇസ്രായേൽ വിശദീകരണം.

ഇന്നലെ വൈ​കീ​ട്ടോ​ടെ ഡ​മ​സ്ക​സി​ലെ സൈ​നി​ക ആ​സ്ഥാ​ന​ത്താണ്​ ഇസ്രായേൽ ബോം​ബി​ട്ടത്​. നാലു പേർ കൊല്ലപ്പെടുകയും നിരവധി പേർക്ക്​ പരിക്കേൽക്കുകയും ചെയ്തു. ഡ്രൂസുകളും തദ്ദേശീയരായ വിഭാഗവും തമ്മിലെ സംഘർഷത്തെ തുടർന്ന് സിറിയൻ സേന ഇറങ്ങി വെടിനിർത്തൽ പ്രഖ്യാപിച്ച സമയം,​ ഇസ്രായേൽ നടത്തിയ സൈനിക ഇടപെടലിനെതിരെ അറബ്​ ലോകം ശക്​തമായ പ്രതിഷേധം രേഖപ്പെടുത്തി.

അതേസമയം, സിറിയയും ഇസ്രായേലും തമ്മിലെ സംഘർഷം തങ്ങൾ ഇടപെട്ട്​ പരിഹരിച്ചതായി യു.എസ്​ സ്​റ്റേറ്റ്​ വകുപ്പ്​ അറിയിച്ചു. എന്നാൽ ഡ്രൂസ്​ വിഭാഗത്തന്‍റെ സുരക്ഷക്കായി ആവശ്മെങ്കിൽ ഇനിയും ഇടപെടുമെന്ന്​ ഇസ്രയേൽ വ്യക്​തമാക്കി.

ഗസ്സയിലും ഇസ്രയേൽ ക്രൂരത മാറ്റമില്ലാതെ തുടരുകയാണ്​. 81പേരെയാണ്​ ഇന്നലെ കൊലപ്പെടുത്തിയത്​. ഭക്ഷണം തേടിയെത്തിയ ആൾക്കൂട്ടത്തിനുനേർക്ക്​ നടന്ന വെടിവെപ്പിലാണ്​ 25പേർ കൊല്ലപ്പെട്ടത്​. യു.എസ്​, ഇസ്രായേൽ മേൽനോട്ടത്തിലുള്ള ഭക്ഷ്യവിതരണം ഉടൻ നിർത്തണമെന്ന്​ ഗസ്സയിലെ സർക്കാർ ഓഫീസ്​ ആവശ്യപ്പെട്ടു.

ദോഹയിൽ വെടിനിർത്തലുമായി ബന്​ധപ്പെട്ട ചർച്ചകളിൽ പുരോഗതിയില്ല. ഹമാസിനു മുമ്പാകെ പുതിയ നിർദേശം സമർപ്പിക്കുമെന്ന്​ കഴിഞ്ഞ ദിവസം ഇസ്രായേൽ പ്രധാനമന്ത്രി ബിന്യമിൻ നെതന്യാഹു അറിയിച്ചിരുന്നു. ഖത്തർ അമീറുമായി താൻ ഉടൻ സംസാരിക്കുമെന്ന്​ യു.എസ്​ പ്രസിഡന്‍റ്​ ഡോണൾഡ്​ ട്രംപ്​ പറഞു. അതിനിടെ, ഇസ്രായേലിൽ രണ്ട്​ യാഥാസ്ഥിതിക കക്ഷികൾ നെതന്യാഹു സർക്കാറിനെതിരെ തിരിഞ്ഞതോടെ ഭരണപ്രതിസന്ധി രൂക്ഷമായി. യുനൈറ്റഡ് തോറ ജൂദായിസം പാർട്ടി സഖ്യം വിട്ടതോടെയാണ്​ ഭരണപ്രതിസന്ധി രൂപപ്പെട്ടത്​. മറ്റൊരു സഖ്യകക്ഷിയായ ഷാ പാർട്ടി ഇന്ന്​ സർക്കാറിനുള്ള പിന്തുണ പിൻവലിക്കുമെന്നാണ്​ റിപ്പോർട്ട്​. അതോടെ നെതന്യാഹു സർക്കാറിന്​ പാർലമെന്‍റിൽ ഭൂരിപക്ഷം നഷ്ടമാകും.