'മൃഗശാലയും അമ്യൂസ്‌മെന്റ് പാർക്കും മുതൽ റെയിൽപാത വരെ'; മൈക്കൽ ജാക്‌സന്റെ സ്വപ്നഭൂമിയായ നെവർലാൻഡ് റാഞ്ചിന് സംഭവിച്ചതെന്ത്?

പോപ്പ് സംഗീത ഇതിഹാസം മൈക്കൽ ജാക്‌സൻ ലോകത്തിന് സമ്മാനിച്ച വിസ്മയങ്ങൾ സ്റ്റേജിലും സംഗീത ആൽബങ്ങളിലും മാത്രം ഒതുങ്ങുന്നതായിരുന്നില്ല. കാലിഫോർണിയയിലെ സാന്താ ബാർബറ കൗണ്ടിയിൽ 2,700 ഏക്കറിലധികം വിസ്തൃതിയിൽ അദ്ദേഹം പടുത്തുയർത്തിയ സ്വകാര്യ സാമ്രാജ്യമായ നെവർലാൻഡ് റാഞ്ച് ലോകത്ത് ഒരു കലാകാരനും ഇതുവരെ സ്വന്തമായി നിർമിച്ചിട്ടില്ലാത്ത വിധത്തിലുള്ള ഒരു ഫാന്റസി ലോകമായിരുന്നു. സ്വന്തമായി മൃഗശാലയും, കൂറ്റൻ റൈഡുകളുള്ള തീം പാർക്കും, അത്യാധുനിക തിയേറ്ററും അടങ്ങിയ ഈ എസ്റ്റേറ്റ് ജാക്‌സന്റെ വിചിത്രവും എന്നാൽ വിസ്മയകരവുമായ വ്യക്തിത്വത്തിന്റെ നേർക്കാഴ്ചയായി മാറി.

1980-കളുടെ മധ്യത്തിൽ പോപ്പ് സംഗീതലോകത്തെ അനിഷേധ്യ രാജാവായി മൈക്കൽ ജാക്‌സൻ വാഴുന്ന കാലഘട്ടത്തിലാണ് നെവർലാൻഡിന്റെ ചരിത്രം ആരംഭിക്കുന്നത്. 1982-ൽ പുറത്തിറങ്ങിയ 'ത്രില്ലർ', 1987-ലെ 'ബാഡ്' എന്നീ ആൽബങ്ങൾ ലോകമെമ്പാടും റെക്കോർഡുകൾ ഭേദിച്ചതോടെ ജാക്‌സന് പുറംലോകത്ത് സ്വകാര്യത എന്നത് തീർത്തും അന്യമായി.

1983-ൽ പോൾ മക്കാർട്ട്‌നിയോടൊപ്പം 'സേ സേ സേ' എന്ന ഗാനത്തിന്റെ ചിത്രീകരണത്തിനായി സാന്താ യ്‌നെസ് താഴ്വരയിലെ സിക്കാമോർ വാലി റാഞ്ച് സന്ദർശിച്ചപ്പോഴാണ് ജാക്‌സൻ ഈ ഭൂപ്രദേശത്തിൽ ആകൃഷ്ടനാകുന്നത്. തുടർന്ന് 1988-ൽ അദ്ദേഹം ഈ പ്രദേശം സ്വന്തമാക്കി.

ജെഎം ബാരിയുടെ പ്രശസ്ത കഥാപാത്രമായ പീറ്റർ പാൻ ഒരിക്കലും പ്രായമാകാത്ത സാങ്കൽപ്പിക ദ്വീപായ നെവർലാൻഡ് എന്ന പേര് അദ്ദേഹം തന്റെ ഈ എസ്റ്റേറ്റിന് നൽകി. ചെറുപ്പകാലം മുഴുവൻ സ്റ്റേജിലും റെക്കോർഡിങ് സ്റ്റുഡിയോകളിലുമായി അധ്വാനിച്ചുതീർത്ത ജാക്‌സന് നഷ്ടപ്പെട്ടുപോയ ബാല്യത്തിന്റെ വീണ്ടെടുപ്പായിരുന്നു ഈ മാന്ത്രിക ലോകം.

വെറുമൊരു ആഡംബര വസതി എന്നതിലുപരി ഒരു സമ്പൂർണ വിനോദ കേന്ദ്രമായാണ് ജാക്‌സൻ നെവർലാൻഡ് രൂപകൽപ്പന ചെയ്തത്. സ്വകാര്യ മൃഗശാലയിൽ ആനകൾ, ജിറാഫുകൾ, ഒട്ടകങ്ങൾ, പുലികൾ, ഒറാംഗുട്ടാനുകൾ, ആൽപാക്കകൾ എന്നിവയടങ്ങുന്ന അപൂർവ മൃഗങ്ങൾ തന്നെയുണ്ടായിരുന്നു. പ്രശസ്തനായ ബബിൾസ് എന്ന ചിമ്പാൻസിയും ഇവിടെയാണ് കഴിഞ്ഞിരുന്നത്.

ഡിസ്‌നിലാൻഡിനെ ഓർമിപ്പിക്കുന്ന തരത്തിലുള്ള ഫെറിസ് വീൽ, റോളർ കോസ്റ്റർ, കറൗസൽ, ബമ്പർ കാറുകൾ എന്നിവ റാഞ്ചിനുള്ളിൽ ഉണ്ടായിരുന്നു. റിലീസ് ചെയ്യുന്ന സിനിമകൾ ആദ്യദിവസം തന്നെ പ്രദർശിപ്പിക്കാൻ സൗകര്യമുള്ളതായിരുന്നു നെവർലാൻഡിൽ ഉണ്ടായിരുന്നത്. ഗുരുതര രോഗബാധിതരായ കുട്ടികൾക്ക് കിടക്കയോടെ വന്നിരുന്ന് സിനിമ കാണാൻ പാകത്തിൽ പ്രത്യേക മെഡിക്കൽ സൗകര്യങ്ങളുള്ള സ്‌പേസും ഇതിനകത്ത് ഒരുക്കിയിരുന്നു.

എസ്റ്റേറ്റിന്റെ ഒരറ്റത്തുനിന്ന് മറ്റൊരറ്റത്തേക്ക് സഞ്ചരിക്കാൻ പ്രത്യേകം പാളങ്ങളും 'നെവർലാൻഡ് വാലി റെയിൽറോഡ്' എന്ന പേരിൽ ആവിവണ്ടികളും സ്റ്റേഷനുകളും സ്ഥാപിച്ചിരുന്നു. വലിയ പൂക്കളാൽ തീർത്ത പ്രകൃതിദത്ത ക്ലോക്കും, പീറ്റർ പാൻ കഥകളിലെ കുട്ടികളുടെ വെങ്കല പ്രതിമകളും എസ്റ്റേറ്റിനെ അലങ്കരിച്ചു.

നെവർലാൻഡ് റാഞ്ച് ജാക്‌സന്റെ സമ്പത്തിന്റെയും പ്രശസ്തിയുടെയും പ്രതീകമായി പൊതുസമൂഹത്തിൽ അടയാളപ്പെട്ടു. അതോടൊപ്പം തന്നെ ഗുരുതരമായ അസുഖങ്ങൾ ബാധിച്ച കുട്ടികൾക്കും നിർധനരായ കുടുംബങ്ങൾക്കുമായി അദ്ദേഹം നെവർലാൻഡിന്റെ വാതിലുകൾ ഇടയ്ക്കിടെ തുറന്നുകൊടുത്തു. 'മേക്ക് എ വിഷ്' പോലുള്ള ഫൗണ്ടേഷനുകളുമായി സഹകരിച്ച് കുട്ടികൾക്ക് സൗജന്യമായി ഇവിടെ വന്ന് ആസ്വദിക്കാനുള്ള സൗകര്യവും നൽകിയിരുന്നു.

എന്നാൽ 1990-കളിലും 2000-കളുടെ തുടക്കത്തിലും ജാക്‌സനെതിരെ ഉയർന്ന ബാലപീഡന ആരോപണങ്ങളും തുടർന്നുണ്ടായ നിയമപോരാട്ടങ്ങളും എസ്റ്റേറ്റിന്റെ അന്തരീക്ഷത്തെ മാറ്റിമറിച്ചു. 2003-ൽ കാലിഫോർണിയൻ അന്വേഷണ ഏജൻസികൾ നെവർലാൻഡിൽ വ്യാപക റെയ്ഡ് നടത്തി. 2005-ലെ വിചാരണക്കൊടുവിൽ കോടതി അദ്ദേഹത്തെ എല്ലാ കുറ്റങ്ങളിൽ നിന്നും പൂർണമായി കുറ്റവിമുക്തനാക്കിയെങ്കിലും, പൊലീസ് തന്റെ സ്വകാര്യതയെയും വിശുദ്ധിയെയും തകർത്തുവെന്ന് പ്രഖ്യാപിച്ച ജാക്‌സൻ പിന്നീട് ഒരിക്കലും നെവർലാൻഡിലേക്ക് സ്ഥിരതാമസത്തിനായി മടങ്ങിയെത്തിയില്ല.

2009 ജൂൺ 25-ന് മൈക്കൽ ജാക്‌സന്റെ അപ്രതീക്ഷിത വിയോഗത്തിന് ശേഷം നെവർലാൻഡ് റാഞ്ചിന്റെ ഉടമസ്ഥത വലിയ ചർച്ചയായി. തുടർന്ന് മൃഗങ്ങളെ മറ്റ് സംരക്ഷണ കേന്ദ്രങ്ങളിലേക്കും സുരക്ഷിത സങ്കേതങ്ങളിലേക്കും മാറ്റി, അമ്യൂസ്‌മെന്റ് പാർക്കിലെ റൈഡുകൾ അഴിച്ചുമാറ്റി വിറ്റു.

പിന്നീട് 'സിക്കാമോർ വാലി റാഞ്ച്' എന്ന് പുനർനാമകരണം ചെയ്യപ്പെട്ട ഈ പ്രോപ്പർട്ടി 2015-ൽ 100 മില്യൺ ഡോളറിന് വിൽക്കാൻ ലിസ്റ്റ് ചെയ്തിരുന്നു. വർഷങ്ങളോളം വാങ്ങാൻ ആളില്ലാതെ കിടന്ന ഈ എസ്റ്റേറ്റ്, ഒടുവിൽ 2020 ഡിസംബറിൽ അമേരിക്കൻ ശതകോടീശ്വരൻ റോൺ ബർക്കിൾ ഏകദേശം 22 ദശലക്ഷം ഡോളറിന് (ഏകദേശം 160 കോടിയിലധികം രൂപ) സ്വന്തമാക്കി. മൈക്കൽ ജാക്‌സന്റെ ജീവിതത്തെ ആസ്പദമാക്കി ഒരുക്കുന്ന ജീവചരിത്ര സിനിമയുടെ ചിത്രീകരണത്തിനായി സമീപകാലത്ത് നെവർലാൻഡിലെ പഴയ ചില ഫീച്ചറുകൾ ഭാഗികമായി പുനർനിർമിക്കുകയും ചെയ്തിരുന്നു.

Summary

Michael Jackson created a legendary 2,700-acre estate known as Neverland Ranch in Santa Barbara County, California. Inspired by Peter Pan and a yearning to reclaim his lost childhood, the property featured an elaborate private zoo, full-scale amusement park rides, a 50-seat movie theatre, and its own railway system. While it served as a dream sanctuary and a retreat for underprivileged and ill children, intense legal controversies and police raids in the early 2000s led Jackson to abandon it before his death in 2009. The rides and animals were later removed, and the property was acquired by billionaire Ron Burkle in 2020.