'ഭൂമിയിലെ മറ്റൊരു രാജ്യത്തിനും ചെയ്യാനാവാത്തത് ട്രംപ് ചെയ്തു, യുഎസിന്‍റേത് ചരിത്രത്തെ മാറ്റിമറിക്കുന്ന തീരുമാനം'; അഭിനന്ദനവുമായി നെതന്യാഹു

തെല്‍ അവീവ്: ഇറാനിലെ ആണവകേന്ദ്രങ്ങളില്‍ അമേരിക്ക നടത്തിയ ആക്രമണങ്ങളില്‍ പ്രതികരണവുമായി ഇസ്രായേല്‍ പ്രധാനമന്ത്രി ബിന്യമിന്‍ നെതന്യാഹു. അമേരിക്കയുടെ അത്ഭുതകരമായ ശക്തി ഉപയോഗിച്ച് ഇറാന്റെ ആണവ കേന്ദ്രങ്ങളെ ലക്ഷ്യം വയ്ക്കാനുള്ള ട്രംപിന്‍റെ ധീരമായ തീരുമാനം ചരിത്രത്തെ മാറ്റിമറിക്കുമെന്ന് നെതന്യാഹു പറഞ്ഞു. ആക്രമണം നടത്തിയ ട്രംപിനെയും നെതന്യാഹു അഭിനന്ദിച്ചു.

ഇറാനെ ആക്രമിക്കാനുള്ള ട്രംപിന്റെ തീരുമാനത്തെ പ്രശംസിച്ചുകൊണ്ട് എക്സിലാണ് നെതന്യാഹു വീഡിയോ പങ്കുവെക്കു വെച്ചത്. "ഓപ്പറേഷൻ റൈസിംഗ് ലയണിൽ, ഇസ്രായേൽ ശരിക്കും അത്ഭുതകരമായ കാര്യങ്ങൾ ചെയ്തു. എന്നാൽ ഇന്ന് രാത്രി ഇറാന്റെ ആണവ കേന്ദ്രങ്ങൾക്കെതിരായ നടപടിയിൽ, അമേരിക്ക നടത്തിയത് ഭൂമിയിലെ മറ്റൊരു രാജ്യത്തിനും ചെയ്യാൻ കഴിയാത്തതാണ്. ലോകത്തിലെ ഏറ്റവും അപകടകരമായ ഭരണകൂടത്തിന് ലോകത്തിലെ ഏറ്റവും അപകടകരമായ ആയുധങ്ങൾ ഇല്ലാതാക്കാന്‍ ട്രംപ് പ്രവർത്തിച്ചു. ഇത് ചരിത്രത്തില്‍ രേഖപ്പെടുത്തും..''- നെതന്യാഹു പറഞ്ഞു.

'ഇസ്രായേലി ജനതയുടെ പേരിൽ ട്രംപിന് നന്ദി പറയുന്നു. സമാധാനം ശക്തിയിലൂടെയാണെന്ന് ട്രംപും ഞാനും പലപ്പോഴും പറയാറുണ്ട്, ആദ്യം ശക്തി വരും, പിന്നീട് സമാധാനവും. ഇന്ന് രാത്രി, പ്രസിഡന്റ് ട്രംപും അമേരിക്കയും വളരെയധികം ശക്തിയോടെ പ്രവർത്തിച്ചു." -നെതന്യാഹു പറഞ്ഞു.

അതേസമയം, ഇറാനിലെ യുഎസ് ആക്രമണം യുഎസിനും ഇസ്രായേലിനും ലോകത്തിനും ചരിത്ര നിമിഷമാണെന്ന് അമേരിക്കൻ പ്രസിഡന്റ് ഡൊണാള്‍ഡ് ട്രംപ് വാര്‍ത്താസമ്മേളനത്തില്‍ പറഞ്ഞു. ദൗത്യം പൂർത്തീകരിച്ചു ബിഗ് 2 ബോംബർ വിമാനങ്ങൾ സുരക്ഷിതമായി മടങ്ങിയെന്നും ഇനി സമാധാനത്തിന്റെ യുഗമാണെന്നും ട്രംപ് പറഞ്ഞു. അതിശയകരമായ സൈനിക വിജയമെന്നാണ് ട്രംപ് ആണവകേന്ദ്രങ്ങളെ ആക്രമിച്ചതിനെ വിശേഷിപ്പിച്ചത്. ഇറാന്റെ ആണവ കേന്ദ്രങ്ങൾ പൂർണ്ണമായും പൂർണ്ണമായും നശിപ്പിക്കപ്പെട്ടുവെന്നും ട്രംപ് അവകാശപ്പെട്ടു.

നെതന്യാഹുവിനും ട്രംപ് നന്ദി പറഞ്ഞു. 'ഞാനും ഇസ്രായേൽ പ്രധാനമന്ത്രിയും ഒരു ടീമായി പ്രവർത്തിച്ചു. മുമ്പ് ആരും പ്രവർത്തിച്ചിട്ടില്ലാത്തതുപോലെ, ഞങ്ങൾ ഒരു ടീമായി പ്രവർത്തിച്ചു, ഇസ്രായേലിന് നേരെയുള്ള ഭയാനകമായ ഭീഷണി ഇല്ലാതാക്കുന്നതിൽ ഞങ്ങൾ വളരെ ദൂരം സഞ്ചരിച്ചു. ഇസ്രായേൽ സൈന്യത്തിനും ഞാൻ നന്ദി പറയുന്നു.” ട്രംപ് വാര്‍ത്താസമ്മേളനത്തില്‍ അറിയിച്ചു.