ഗസ്സ നഗരം പൂർണമായും കീഴ്​പ്പെടുത്താനുള്ള മുന്നൊരുക്കം തുടങ്ങി ഇസ്രായേൽ; കൂട്ടക്കുരുതിക്ക് വഴിയൊരുക്കുമെന്ന് യുഎൻ

ഗസ്സ സിറ്റി: ഗസ്സയിൽ 11 പേർ കൂടി മരണത്തിന്​ കീഴടങ്ങിയതോടെ പട്ടിണിക്കൊലയിൽ മരിച്ചവരുടെ എണ്ണം 212 ആയി. ഇതിൽ നൂറിലേറെയും കുട്ടികളാണ്​. കരമാർഗം കൂടുതൽ സഹായം എത്തിയില്ലെങ്കിൽ പട്ടിണിമരണം വ്യാപിക്കുമെന്ന്​ യു.എൻ ഏജൻസികൾ മുന്നറിയിപ്പ്​ നൽകി. ഭക്ഷ്യവസ്തുക്കൾ എയർ ഡ്രോപ്പ്​ ചെയ്യുന്നത്​ പട്ടിണി മറികടക്കാൻ ഒട്ടും പര്യാപ്തമല്ലെന്നും യു.എൻ ഏജൻസികൾ അറിയിച്ചു. എന്നാൽ റഫ ഉൾപ്പടെ അതിർത്തികൾ വഴിയുള്ള സഹായ വിതരണത്തിന്​ കർശന നിയന്ത്രണം തുടരാൻ തന്നെയാണ്​ ഇസ്രായേൽ തീരുമാനം.

ഭക്ഷ്യ ഉൽപന്നങ്ങൾക്ക്​ പുറമെ ​വെള്ളം, ഇന്ധനം, മരുന്ന്​, മെഡിക്കൽ ഉപകരണങ്ങൾ എന്നിവയുടെ രൂക്ഷമായ ക്ഷാമം കൂടിയാണ്​ ​ഗസ്സ അഭിമുഖീകരിക്കുന്നത്​. ഭക്ഷണം തേടിയെത്തിയ 28 പേർ ഇന്നലെ ഇസ്രായേൽ സൈന്യത്തിന്‍റെ വെടിയേറ്റു മരിച്ചു.

ഗസ്സ നഗരം പൂർണമായി കീഴ്‍പ്പെടുത്താൻ ഇസ്രായേൽ സുരക്ഷാ കാബിനറ്റ് അംഗീകാരം നൽകി​യതോടെ ഇസ്രായേൽ നടപടികൾ ശക്​തമാക്കി .ഇന്നുമുതൽ ആയിരക്കണക്കിന്​ റിസർവ്​ സൈനികരെ റിക്രൂട്ട്​ ചെയ്യാനാണ്​ നീക്കം. ഗസ്സ സിറ്റിയിൽ നിന്ന്​ പതിനായിരങ്ങളെ പുറന്തള്ളാനാണ്​ ഇസ്രായേൽ തീരുമാനം. വിപുലമായ കരയുദ്ധവും പദ്ധതിയുടെ ഭാഗമാണെന്ന്​ ഇസ്രായേൽ മാധ്യമങ്ങൾ റിപ്പോർട്ട്​ ചെയ്​തു. എന്നാൽ സൈനികമായി ഗസ്സയെ കീഴ്​പ്പെടുത്തുക എളുപ്പമല്ലെന്നാണ്​ ഇസ്രായേൽ സൈന്യത്തിന്‍റെ നിലപാട്​.

ബന്ദികളുടെ ജീവന്​ ഭീഷണി വരുത്തുന്ന പദ്ധതി ഉപേക്ഷിച്ച്​ ഹമാസുമായി കരാർ വേണം എന്നാവശ്യപ്പെട്ട്​ തെൽ അവീവിൽ ഇന്നലെ രാത്രി ആയിരങ്ങൾ പ്രതിഷേധിച്ചു. പ്രക്ഷോഭകരെ പിരിച്ചുവിടാൻ സുരക്ഷാ വിഭാഗം നടത്തിയ ബലപ്രയോഗത്തിൽ നിരവധി പേർക്ക്​ പരിക്കേറ്റു. ഇസ്രായേലിന്‍റെ ഗസ്സ പദ്ധതിക്കെതിരെ വിവിധ യൂറോപ്യൻ, അറബ്​ രാജ്യങ്ങൾ രംഗത്തുവന്നു. ഇസ്രായേൽ പദ്ധതി കൂട്ട സിവിലിയൻ കുരുതിക്ക്​ വഴിയൊരുക്കുമെന്ന മുന്നറിയിപ്പുമായി യു.എന്നും ലോക രാജ്യങ്ങളും രംഗത്തെത്തി. പ്രശ്നം ചർച്ച ചെയ്യാൻ അടിയന്തര അറബ്​ ലീഗ്​ നേതൃയോഗം ഞായറാഴ്ച ചേരും.