ഫലസ്​തീനികളുടെ ജീവിതം പറയുന്ന ‘നോ അതർ ലാൻഡി’ന്​ ഓസ്​കർ

ലോസ്​ ഏഞ്ചൽസ്​: ഇസ്രായേൽ സൈന്യത്തിൽനിന്ന് തങ്ങളുടെ വീടുകൾ സംരക്ഷിക്കാൻ പോരാടുന്ന ഫലസ്തീനികളുടെ കഥ പറയുന്ന 'നോ അദർ ലാൻഡ്' എന്ന ചിത്രത്തിന് മികച്ച ഡോക്യുമെന്ററി ഫീച്ചർ വിഭാഗത്തിനുള്ള ഓസ്കർ പുരസ്​കാരം. ഇസ്രായേലി-ഫലസ്തീൻ ചലച്ചിത്ര പ്രവർത്തകരുടെ സഹകരണത്തിൽ പുറത്തിറങ്ങിയ ചിത്രം പോർസലൈൻ വാർ, ഷുഗർകെയ്ൻ, ബ്ലാക്ക് ബോക്സ് ഡയറീസ്, സൗണ്ട്ട്രാക്ക് ടു എ കപ്പ് ഡി'ഇറ്റാറ്റ് എന്നിവയെയാണ്​ മറികടന്നത്​.

2019നും 2023നും ഇടയിലാണ്​ ‘നോ അദർ ലാൻഡി’​െൻറ ചി​ത്രീകരണം നടക്കുന്നത്​. വെസ്റ്റ് ബാങ്കിന്റെ തെക്കേ അറ്റത്ത്​ സൈനിക പരിശീലന മേഖലയായി ഉപയോഗിക്കാൻ ഇസ്രായേൽ സൈന്യം പൊളിച്ചുമാറ്റുന്ന തന്റെ ജന്മനാടായ ‘മസാഫർ യാത്ത’ക്ക് വേണ്ടി​ ആക്ടിവിസ്റ്റ് ബാസൽ അദ്ര നടത്തുന്ന പോരാട്ടമാണ്​ ഈ ചിത്രത്തിലൂടെ പറയുന്നത്​. ഇസ്രായേലി സൈന്യത്തി​െൻറ അറസ്റ്റ് ഭീഷണിയെ മറികടന്നായിരുന്നു അദ്ദേഹത്തി​െൻറ പോരാട്ടം. ജൂത-ഇസ്രായേലി പത്രപ്രവർത്തകനായ യുവാൽ എബ്രഹാമുമായി സൗഹൃദത്തിലാകുന്നതോടെ അദ്രയുടെ പോരാട്ടവും മസാഫർ യാത്തക്കാരുടെ ദുരിതവും ലോകമറിഞ്ഞു​.

പതിറ്റാണ്ടുകളായി ഫലസ്തീനികൾ അനുഭവിച്ചുവരുന്ന കഠിനമായ യാഥാർഥ്യത്തെയാണ് 'നോ അദർ ലാൻഡ്' പ്രതിഫലിപ്പിക്കുന്നതെന്ന് അവാർഡ് സ്വീകരിച്ചുകൊണ്ട് അദ്ര പറഞ്ഞു. ‘ഏകദേശം രണ്ട് മാസം മുമ്പ് ഞാൻ ഒരു പിതാവായി. എന്റെ മകൾക്ക് ഞാൻ ഇപ്പോൾ ജീവിക്കുന്ന അതേ ജീവിതം നയിക്കേണ്ടി വരരുത്​ എന്നാണ് എന്റെ ആഗ്രഹം. കുടിയേറ്റം, അക്രമം, വീട് തകർക്കൽ, നിർബന്ധിത കുടിയിറക്കൽ എന്നിവയെ എപ്പോഴും ഭയപ്പെടുന്ന എന്റെ സമൂഹം എല്ലാ ദിവസവും ഇസ്രായേലി അധിനിവേശത്തിൽ ജീവിക്കുകയും അനുഭവിക്കുകയും ചെയ്യുന്നു’ -അദ്ര പറഞ്ഞു.

ഫലസ്തീൻ ജനതയോടുള്ള വംശീയ ഉന്മൂലനം തടയാനും അനീതി അവസാനിപ്പിക്കാനും ഗൗരവമായ നടപടികൾ സ്വീകരിക്കാൻ അദ്ദേഹം ലോകത്തോട് ആഹ്വാനം ചെയ്തു. നിറഞ്ഞ കയ്യടികളോടെയാണ്​ അദ്രയുടെ വാക്കുകളെ സദസ്സ്​ വരവേറ്റത്​.