ലോകം അവസാനിച്ചാലും റഷ്യ തിരിച്ചടിക്കും; എന്താണ് ഭീതി പടർത്തുന്ന ‘ഡെഡ് ഹാൻഡ്’?

മോസ്‌കോ: മോസ്കോ നഗരം ഉറങ്ങുകയാണ്. എന്നാൽ റഷ്യയിലെ ഭൂഗർഭ അറകളിൽ, മീറ്ററുകളോളം കനമുള്ള കോൺക്രീറ്റ് ഭിത്തികൾക്കുള്ളിൽ ഒരു യന്ത്രം ഉണർന്നിരിക്കുന്നുണ്ട്. മനുഷ്യന്റെ സ്പർശനമില്ലാതെ അതൊരു നിശബ്ദ വേട്ടക്കാരനെപ്പോലെ കാത്തിരിക്കുകയാണ്. റഷ്യൻ സൈന്യം ഇതിനെ 'പെരിമീറ്റർ' (Perimeter) എന്ന് വിളിക്കുന്നു; എന്നാൽ ലോകം ഇതിനെ വിളിക്കുന്നത് മറ്റൊരു പേരിലാണ്: 'പ്രേതക്കൈ' (Dead Hand).

ശീതയുദ്ധകാലം മുതൽ ലോകരാജ്യങ്ങളെ ഒരുപോലെ ഭയപ്പെടുത്തുന്ന ഒന്നാണ് റഷ്യയുടെ 'ഡെഡ് ഹാൻഡ്' (Dead Hand). ഔദ്യോഗികമായി 'പെരിമീറ്റർ' (Perimeter) എന്ന് വിളിക്കപ്പെടുന്ന ഈ സംവിധാനം, റഷ്യയുടെ പക്കലുള്ള ഏറ്റവും വിനാശകരമായ ഒരു ഓട്ടോമാറ്റിക് ആണവായുധ നിയന്ത്രണ സംവിധാനമാണ്.

1947 മുതൽ 1991 വരെയുള്ള ശീതയുദ്ധകാലം ലോകത്തിന് സമ്മാനിച്ചത് ഇന്റർനെറ്റും ജിപിഎസും പോലുള്ള വിപ്ലവകരമായ കണ്ടുപിടുത്തങ്ങൾ മാത്രമല്ല, അതിഭീകരമായ നശീകരണ ശേഷിയുള്ള ആയുധങ്ങൾ കൂടിയായിരുന്നു. ആ കാലഘട്ടത്തിൽ സോവിയറ്റ് യൂണിയൻ (റഷ്യ) രഹസ്യമായി വികസിപ്പിച്ചെടുത്ത ഒരു സ്വയംനിയന്ത്രിത ആണവപ്രതിരോധ സംവിധാനമാണ് 'ഡെഡ് ഹാൻഡ്' (Dead Hand).

ലളിതമായി പറഞ്ഞാൽ, റഷ്യയിലെ ഭരണാധികാരികളോ സൈനിക മേധാവികളോ ഒരു ശത്രുരാജ്യത്തിന്റെ ആക്രമണത്തിൽ കൊല്ലപ്പെട്ടാലും, തിരിച്ചടിക്കാൻ ആരും ജീവനോടെ ബാക്കിയില്ലെങ്കിലും, റഷ്യ എന്ന രാജ്യം മാപ്പിൽ നിന്ന് മാഞ്ഞുപോയി എന്ന് ശത്രു ചിന്തിക്കുന്ന നിമിഷം ഈ 'പ്രേതക്കൈ' ഉയരും.

എങ്ങനെയാണ് ഇതിന്റെ പ്രവർത്തനം?

ഈ സംവിധാനം ഒരു 'ഫെയിൽ-സേഫ്' (Fail-safe) മാർഗമായാണ് രൂപകൽപ്പന ചെയ്തിരിക്കുന്നത്. ഒരു ആണവാക്രമണം തിരിച്ചറിഞ്ഞാലുടൻ 'ഡെഡ് ഹാൻഡ്' സജീവമാകുകയും റേഡിയോ സിഗ്നലുകൾ പുറപ്പെടുവിക്കുന്ന ഒരു പ്രത്യേക കമാൻഡ് മിസൈൽ വിക്ഷേപിക്കുകയും ചെയ്യും.

റഷ്യയിലുടനീളം പറക്കുന്ന ഈ മിസൈലിൽ നിന്നുള്ള സിഗ്നലുകൾ സ്വീകരിക്കുന്നതോടെ, രാജ്യത്തെ വിവിധ കേന്ദ്രങ്ങളിലുള്ള ആണവ മിസൈലുകൾ ശത്രുരാജ്യങ്ങളെ ലക്ഷ്യമാക്കി തനിയെ കുതിച്ചുയരും. മനുഷ്യസഹായം ഇല്ലാതെ തന്നെ ഈ മിസൈലുകൾ മുൻകൂട്ടി നിശ്ചയിച്ച ശത്രുലക്ഷ്യങ്ങളിലേക്ക് സ്വയം കുതിക്കുമെന്നതാണ് ഇതിന്റെ പ്രധാന സവിശേഷത.

എന്തുകൊണ്ടാണ് ഇതിനെ 'ഡെഡ് ഹാൻഡ്' എന്ന് വിളിക്കുന്നത്?

റഷ്യയുടെ കമാൻഡ് സെന്ററുകൾ പൂർണമായും തകർക്കപ്പെട്ടാലും, അതായത് ഉത്തരവിടാൻ മനുഷ്യർ ആരും ജീവനോടെ ഇല്ലാത്ത അവസ്ഥയിലും (Dead), ഈ സംവിധാനം ശത്രുവിനെതിരെ പ്രവർത്തിക്കും (Hand) എന്നതിനാലാണ് ഇതിന് ഈ പേര് ലഭിച്ചത്. ശത്രുവിനെ പേടിപ്പിക്കാനാണ് സാധാരണയായി ആയുധങ്ങൾ പ്രദർശിപ്പിക്കാറുള്ളത്.

എന്നാൽ സോവിയറ്റ് യൂണിയൻ ഈ സംവിധാനത്തെക്കുറിച്ച് വർഷങ്ങളോളം രഹസ്യമായി വെച്ചിരുന്നു. 'ഞങ്ങളെ തകർത്താൽ ലോകത്തെ മുഴുവൻ ഞങ്ങൾ കൂടെ കൊണ്ടുപോകും' എന്ന ഭീകരമായ സന്ദേശമാണ് ഇതിന് പിന്നിലുള്ളത്. 1993ൽ റഷ്യൻ ഉദ്യോഗസ്ഥർ അതിന്റെ പ്രവർത്തന നില സ്ഥിരീകരിച്ചിട്ടുണ്ട്. 1980കളുടെ തുടക്കത്തിൽ ഇത് സജീവമായിരുന്നു എന്ന അവകാശവാദവും ഉന്നയിച്ചു.

ലോകം ഇന്നും ഭയക്കുന്നത് എന്തുകൊണ്ട്?

ഈ സംവിധാനം ഇന്നും പ്രവർത്തനക്ഷമമാണെന്ന് പല റിപ്പോർട്ടുകളും സൂചിപ്പിക്കുന്നു. യുദ്ധങ്ങൾക്കിടയിൽ തെറ്റായ സിഗ്നലുകൾ (False Alarm) വഴി ഈ കമ്പ്യൂട്ടർ സിസ്റ്റം സ്വയം ഉണരുകയും ആണവയുദ്ധത്തിലേക്ക് ലോകത്തെ നയിക്കുകയും ചെയ്യുമോ എന്നതാണ് ഏറ്റവും വലിയ ആശങ്ക. ലോകത്തിലെ ഏറ്റവും വലിയ ആണവായുധ ശേഖരമുള്ള രാജ്യമായ റഷ്യ, തങ്ങളുടെ പ്രതിരോധത്തിനായി അതീവ ഭയാനകമായ ഒരു സംവിധാനമാണ് ഒരുക്കിയിരിക്കുന്നത്. സൈനികാവശ്യങ്ങൾക്കായി സജ്ജമാക്കിയ 1600 ആണവായുധങ്ങൾക്ക് പുറമെ, ഭൂഖണ്ഡാന്തര ബാലിസ്റ്റിക് മിസൈലുകളിൽ ഘടിപ്പിച്ച 2400ഓളം ആയുധങ്ങളും റഷ്യയുടെ പക്കലുണ്ട്. ഇവയെല്ലാം 'ഡെഡ് ഹാൻഡ്' (Dead Hand) എന്ന് വിശേഷിപ്പിക്കുന്ന ഓട്ടോമേറ്റഡ് കമാൻഡ് സിസ്റ്റവുമായി ബന്ധിപ്പിച്ചിരിക്കുകയാണ്.

1985ൽ സോവിയറ്റ് യൂണിയന്റെ കാലത്താണ് പെരിമീറ്റർ സംവിധാനം നിലവിൽ വന്നത്. ദശകങ്ങളോളം ഇതൊരു അഭ്യൂഹമായി നിലനിന്നിരുന്നുവെങ്കിലും, 2011ലാണ് റഷ്യ ഈ സംവിധാനത്തിന്റെ സാന്നിധ്യം ഔദ്യോഗികമായി സ്ഥിരീകരിച്ചത്. തങ്ങളെ നശിപ്പിക്കാൻ തുനിയുന്ന ഏതൊരു ശക്തിയെയും തങ്ങൾക്കൊപ്പം ഇല്ലാതാക്കും എന്ന കർക്കശമായ മുന്നറിയിപ്പാണ് ഡെഡ് ഹാൻഡിലൂടെ റഷ്യ ലോകത്തിന് നൽകുന്നത്.