ചെന്നൈ സ്വദേശിയാണെങ്കിലും മലയാള സിനിമയായിരുന്നു ചാര്‍മിളയുടെ തട്ടകം. മോളിവുഡിലെ വ്യത്യസ്തമായ കഥാപാത്രങ്ങൾ ചാര്‍മിളക്ക് ആരാധകരെ നേടിക്കൊടുത്തു. 'ചീരപ്പൂവുകൾക്കുമ്മ കൊടുക്കണ' എന്ന ഒറ്റപ്പാട്ട് മതി മലയാളികൾക്ക് ചാര്‍മിളയെ ഓര്‍ക്കാൻ. ധനം, അങ്കിൾബൺ, കേളി,കാബൂളിവാല, കടൽ...മലയാളം കൂടാതെ തമിഴ്, തെലുഗു, കന്നഡ ഭാഷകളിലും താരം തിളങ്ങി. ചാര്‍മിള അഭിനയിച്ച് സിനിമകളെക്കാൾ ട്വിസ്റ്റുകൾ നിറഞ്ഞതായിരുന്നു നടിയുടെ ജീവിതം.
ശിവാജി ഗണേശൻ നായകനായ നല്ലതൊരു കുടുബം എന്ന ചിത്രത്തിലൂടെ ബാലതാരമായിട്ടാണ് ചാര്‍മിള സിനിമയിലെത്തുന്നത്. 1991 ൽ പുറത്തിറങ്ങിയ ഒയിലാട്ടം എന്ന തമിഴ് സിനിമയിലൂടെ നായികയായി. ആ വര്‍ഷം തന്നെ മോഹൻലാലിന്‍റെ നായികയായി ധനത്തിലൂടെയായിരുന്നു ചാര്‍മിളയുടെ മലയാളത്തിലെ അരങ്ങേറ്റം. തുടര്‍ന്ന് അങ്കിൾബൺ, കേളി തുടങ്ങിയ ചിത്രങ്ങളിലും വേഷമിട്ടു. തമിഴ്, തെലുഗു, കന്നഡ ഭാഷകളിൽ തിളങ്ങുമ്പോഴും അവരുടെ വ്യക്തിജീവിതം നിരവധി ദുഷ്‌കരമായ ഘട്ടങ്ങളിലൂടെ കടന്നുപോവുകയായിരുന്നു.
1994ൽ കടൽ എന്ന ചിത്രത്തിൽ അഭിനയിക്കുന്നതിനിടെയാണ് താരം ബാബു ആന്‍റണിയെ കണ്ടുമുട്ടുന്നത്. പിന്നീട് രാജാധാനി, കമ്പോളം തുടങ്ങിയ ചിത്രങ്ങളിൽ ഇരുവരും സ്‌ക്രീൻ പങ്കിട്ടു. ഇരുവരും പ്രണയത്തിലാവുകയും ചെയ്തു. അതിനിടെ ബാബു ആന്‍റണി അമേരിക്കയിലേക്ക് പോയെങ്കിലും പിന്നീട് തിരിച്ചെത്തിയില്ല.അതിനു കാരണം അദ്ദേഹത്തിന്‍റെ സഹോദരനാണെന്നും ചാര്‍മിള പറഞ്ഞിട്ടുണ്ട്. എന്നാൽ ബാബു ആന്‍റണി ഒരു മോശം വ്യക്തിയാണെന്ന് താൻ വിശ്വസിക്കുന്നില്ലെന്നും ആ ബന്ധം തകര്‍ന്നത് തന്നെ വളരെയധികം ബാധിച്ചുവെന്നും ചാര്‍മിള പറയുന്നു. '' അതെന്‍റെ ആദ്യ പ്രണയമായിരുന്നു. 19 വയസായിരുന്നു അന്നെനിക്ക്. ഞാൻ എന്റെ കൈത്തണ്ട മുറിച്ച് ആത്മഹത്യയ്ക്ക് ശ്രമിച്ചു. അമ്മയാണ് എന്നെ രക്ഷപ്പെടുത്തിയത്''
ബാബു ആന്‍റണിയുമായുള്ള വേർപിരിയലിനുശേഷം, സിനിമാ മേഖലയിൽ അസിസ്റ്റന്‍റ് ഡയറക്ടറായി ജോലി ചെയ്തിരുന്ന കിഷോർ സത്യയുമായി ചാർമിള അടുത്തു. ഒടുവിൽ ഇരുവരും വിവാഹിതരായി. തങ്ങളുടെ ബന്ധം വളർന്നപ്പോൾ താൻ ഒരു ദുഷ്‌കരമായ ഘട്ടത്തിലൂടെ കടന്നുപോകുകയായിരുന്നുവെന്ന് ചാർമിള പറഞ്ഞിട്ടുണ്ട്.
അവൾ പറഞ്ഞു, "ഞാൻ ഒരു വിഷാദ ഘട്ടത്തിലൂടെ കടന്നുപോകുകയായിരുന്നു, കിഷോർ എന്നോട് സ്നേഹത്തോടെ സംസാരിക്കുമായിരുന്നു. താമസിയാതെ ഞങ്ങൾ പരസ്പരം അടുത്തു." വിവാഹസമയത്ത് ചാർമിളയ്ക്ക് നിരവധി അഭിനയ അവസരങ്ങൾ ലഭിച്ചിരുന്നു. എന്നാൽ, വിവാഹശേഷം സിനിമയിൽ അഭിനയിക്കുന്നത് നിർത്താൻ കിഷോർ തന്നോട് ആവശ്യപ്പെട്ടതായി അവർ പറഞ്ഞു. സേതു (1999) എന്ന ചിത്രത്തിൽ വിക്രമിനൊപ്പം അഭിനയിക്കാനുള്ള അവസരവും അങ്ങനെയാണ് വേണ്ടെന്ന് വച്ചത്. പിന്നീട് ഇരുവരും വേര്‍പിരിഞ്ഞു.
പിന്നീടാണ് തന്നെക്കാൾ എട്ട് വയസ് കുറവുള്ള സോഫ്റ്റ്‌വെയർ എഞ്ചിനീയറായ രാജേഷിനെ വിവാഹം കഴിക്കുന്നത്. സഹോദരിയുടെ സുഹൃത്തായിരുന്നു അയാൾ. ഈ വിവാഹവും പരാജയമായിരുന്നു. താനൊരു ക്രിസ്ത്യാനിയാണെന്നും, മകനെ ഹിന്ദുമതത്തിലേക്ക് മാറ്റാൻ രാജേഷ് ആഗ്രഹിച്ചിരുന്നുവെന്നും ചാർമിള വെളിപ്പെടുത്തി. എന്നാൽ ഏറെ പ്രാർത്ഥനകൾക്ക് ശേഷം ജനിച്ച മകൻ ക്രിസ്തുമതം തന്നെ പിന്തുടരണമെന്നാണ് താൻ ആഗ്രഹിച്ചതെന്നും അവർ വ്യക്തമാക്കി.
\നിയമപരമായി വിവാഹമോചനം നേടിയെങ്കിലും ഇപ്പോഴും രാജേഷുമായി നല്ല ബന്ധത്തിലാണെന്ന് ചാർമിള പറഞ്ഞു. കോടതി നടപടികൾക്കിടയിൽ മകൻ തന്നോടൊപ്പം നിൽക്കാനാണ് ആഗ്രഹം പ്രകടിപ്പിച്ചതെന്നും, രാജേഷ് പതിവായി മകനെ കാണാൻ വരാറുണ്ടെന്നും അവർ കൂട്ടിച്ചേർത്തു. ജീവിതത്തിൽ മുൻ അനുഭവങ്ങളിൽ നിന്ന് പാഠം പഠിക്കാൻ കഴിയാതെ പോയെന്നും, ഓരോ ഘട്ടത്തിലും വീണ്ടും പ്രണയബന്ധങ്ങളിൽ ഏർപ്പെടുകയായിരുന്നുവെന്നും ചാർമിള സ്വയം വിലയിരുത്തി.
മലയാള സിനിമയിൽ നിന്ന് തനിക്ക് മോശം അനുഭവങ്ങളുണ്ടായിട്ടുണ്ടെന്ന് ജസ്റ്റിസ് ഹേമ കമ്മിറ്റിയോട് തുറന്നുപറഞ്ഞിരുന്നു. സംവിധായകൻ ഹരിഹരൻ അടക്കമുള്ളവർ അഡ്ജസ്റ്റ്മെന്റ് ചെയ്യാമോ എന്ന് തന്നോട് ചോദിച്ചു. താൻ നോ പറയുകയും അഡ്ജസ്റ്റ്മെന്റിന് തയ്യാറാകാതെ വന്നതോടെ 28 സിനിമകൾ നഷ്ടപ്പെട്ടുവെന്നും അവര്‍ വെളിപ്പെടുത്തിയിരുന്നു.
നടൻ വിഷ്ണുവിനെ കൊണ്ടാണ് ഹരിഹരൻ അഡ്ജസ്റ്റ്മെന്റിന് തയ്യാറാകുമോ എന്ന് തന്നോട് ചോദിച്ചത്. പൊള്ളാച്ചിയിൽ വെച്ച് അർജുനൻ പിള്ളയും അഞ്ചുമക്കളും എന്ന സിനിമയുടെ പ്രൊഡ്യൂസർ അഡ്ജസ്റ്റ്മെന്റിന് തയ്യാറാകുമോ എന്ന് ചോദിച്ചുവെന്നും അവർ കൂട്ടിച്ചേർത്തു. ഇത്തരത്തിൽ തനിക്ക് കുറെ പേരിൽനിന്ന് മോശം അനുഭവം ഉണ്ടായി.എല്ലാവരുടെയും പേരുകൾ ഇപ്പോൾ പറയാൻ താല്പര്യമില്ലെന്നും അവർ പറഞ്ഞു. അതേസമയം, പവർ ഗ്രൂപ്പിനെ കുറിച്ച് തനിക്കറിയില്ലെന്നും അവർ വ്യക്തമാക്കി.
‘മലയാള സിനിമ ഇൻഡസ്ട്രിയൽ സ്ത്രീകൾ സുരക്ഷിതരല്ല. കുറെയധികം പെൺപിള്ളേർ നോ പറഞ്ഞു പുറത്തേക്ക് വന്നു എന്നാൽ കുറേപ്പേർ ഓക്കെ പറഞ്ഞ് അഡ്ജസ്റ്റ്മെന്റിന് തയ്യാറായി. കുറെ പേർ കാശിനു വേണ്ടിയും പ്രശസ്തിക്കുവേണ്ടിയും ഓക്കെ പറയും. അതിനുശേഷം ആണുങ്ങളെ കുറ്റം പറയുമെന്നും അവർ വ്യക്തമാക്കിയിരുന്നു.