കോവിഡ് തടയാന് രണ്ടര ലക്ഷം തൊഴിലാളികളെ സൗദി സ്കൂളുകളിലേക്ക് മാറ്റിത്തുടങ്ങി; അറുപതിനായിരത്തിലേറെ മുറികള് സജ്ജം
കോവിഡ് ഇല്ലെന്ന് ഉറപ്പു വരുത്തിയാണ് സ്കൂളുകളിലേക്ക് മാറ്റുന്നത്
കോവിഡ് മുന്കരുതലുകളുടെ ഭാഗമായി സൗദിയില് ലേബര് ക്യാമ്പുകളില് കഴിയുന്ന രണ്ടരലക്ഷത്തോളം തൊഴിലാളികളെ മാറ്റി പാര്പ്പിക്കുന്ന പ്രക്രിയ പുരോഗമിക്കുന്നു.
ഇതിനായി അറുപതിനായിരത്തോളം സ്കൂള് മുറികളാണ് രാജ്യത്ത് സജ്ജീകരിച്ചിട്ടുള്ളത്. ഇതോടെ രോഗവ്യാപനം പ്രതീക്ഷിച്ച മേഖല സുരക്ഷിതമായ അവസ്ഥയിലേക്ക് നീങ്ങുകയാണ്.
കോവിഡ് വ്യാപനത്തെ തുടര്ന്ന് രാജ്യം സ്വീകരിക്കുന്ന കര്ശന നടപടികളുടെ ഭാഗമായാണ് തൊഴിലാളികള് നിരവധി പേര് ഒന്നിച്ചു കഴിയുന്ന ലേബര് ക്യാമ്പുകളിലെ തൊഴിലാളികളെ മാറ്റിപാര്പ്പിക്കാന് തീരുമാനിച്ചത്.
ഇതിനായി രാജ്യത്തിന്റെ വിവിധ പ്രവിശ്യകളിലായി അറുപതിനായിരം സ്കൂള് മുറികള് സജ്ജീകരിച്ചതായി മുന്സിപ്പല് ഗ്രാമകാര്യ വകുപ്പ് മന്ത്രി ഡോ. അഹമ്മദ് അല്ഖത്താന് പറഞ്ഞു. 3345 സ്കൂളുകള് ഇതിനായി ഏറ്റെടുത്ത് നല്കിയതായി വിദ്യാഭ്യാസ മന്ത്രാലയവും അറിയിച്ചു.
രണ്ടരലക്ഷം തൊഴിലാളികളെ അടിയന്തിരമായി മാറ്റിപാര്പ്പിക്കാനാണ് പദ്ധതി. ഇത് പുരോഗമിക്കുകയാണ്. ഭാവിയില് തൊഴിലാളികളെ തിരിച്ചെത്തിക്കുന്നതിന് മുന്നോടിയായി ലേബര് ക്യാമ്പുകളില് ആവശ്യമായ ക്രമീകരണം നടത്തും. ഇതിനുള്ള ശ്രമങ്ങളും പദ്ധതി അവലോകനവും ബന്ധപ്പെട്ട വകുപ്പുകള് തുടങ്ങിയിട്ടുണ്ട്.