വിശ്വാസികളുടെ കണ്ണു നനച്ച് ഹറം മുറ്റത്ത് വീണ്ടും തറാവീഹ് നമസ്കാരം; വിങ്ങിപ്പൊട്ടി ഇമാമുമാര്; മക്ക മദീന പള്ളികളില് നടന്ന പ്രാര്ഥനയിലെ കാഴ്ചകള്
ലോകത്തെ ഇസ്ലാം മതവിശ്വാസികളുടെ ഉള്ളുലയ്ക്കുന്നതായിരുന്നു ഹറമിലെ പുലര്ക്കാല യാമം വരെയുള്ള കാഴ്ചകള്
ലോകത്തെ ഇസ്ലാം മതവിശ്വാസികളുടെ ഉള്ളുലയ്ക്കുന്നതായിരുന്നു ഹറമിലെ പുലര്ക്കാല യാമം വരെയുള്ള കാഴ്ചകള്.
ആഴ്ചകളോളം ആളനക്കമില്ലാതിരുന്ന കഅ്ബയുടെ മുറ്റത്ത് ഇത്തവണയും തറാവീഹ് നമസ്കാരം മുടങ്ങിയില്ല. ഉള്ളുപൊള്ളുന്ന പ്രാര്ഥനയോടെ ഇന്നലെയും ഹറമിന്റെ മുറ്റത്തും മദീന പള്ളിക്കകത്തും പ്രാര്ഥന തുടര്ന്നു.
കോവിഡ് പശ്ചാത്തലത്തില് എണ്ണം ചുരുക്കിയ നമസ്കാരത്തിലെ പ്രാര്ഥനയിലുടനീളം ലോകത്തിനായുള്ള പ്രാര്ഥനയായിരുന്നു. മദീന മക്ക പള്ളികളില് പ്രാര്ഥനക്ക് നേതൃത്വം നല്കിയവര് പ്രാര്ഥനക്കിടെ പലതവണ വിങ്ങിപ്പൊട്ടി.
സൂചികുത്താനിടമില്ലാത്ത വിധം ഇടതൂര്ന്നു കാണാറുള്ള ഹറമിന്റെ മുറ്റത്തിന്റെ ബാക്കി ഭാഗവും കഅ്ബയും മൂക സാക്ഷിയായി നിന്നു. ഒരോ തവണയും കഅബക്ക് നേരെ നിന്ന് റോഡും വരെ നീളുന്ന ഹറമില് പക്ഷേ ഇന്നലെ പ്രാര്ഥനക്കുണ്ടായിരുന്നത് നൂറുകണക്കിന് പേര് മാത്രം.
ലോകത്തെ പ്രതിസന്ധിയിലാക്കിയ മഹാമാരിയെ പ്രതിരോധിക്കാന് ഭരണകൂടം പറഞ്ഞതനുസരിച്ച് പൊതു ജനങ്ങള് ഇന്നലെ സ്വന്തം റൂമുകളിലും വീടുകളിലും രാത്രി നമസ്കാരം പൂര്ത്തിയാക്കി.
ആഴ്ചകള്ക്ക് മുന്നേ കോവിഡ് പ്രതിരോധത്തിന്റെ ഭാഗമായി കഅബക്ക് ചുറ്റും അടച്ചു കെട്ടിയിരുന്ന ബാരിക്കേഡ് ഇന്നലെ രാത്രി നമസ്കാരത്തിന് മുന്നോടിയായി നീക്കിയിരുന്നു.
അണുമുക്തമാക്കുന്ന പ്രക്രിയ ഇപ്പോഴും തുടരുന്നുണ്ട്. മക്കയില് ഇരു ഹറം കാര്യാലയ മേധാവി ഡോ. അബ്ദുറഹ്മാന് അല് സുദൈസാണ് പ്രാര്ഥനക്ക് നേതൃത്വം നല്കിയത്.
മദീന പള്ളിയിലും ജീവനക്കാരും ഉദ്യേഗസ്ഥരുമടക്കം ഏതാനും പേര് മാത്രമാണ് പ്രാര്ഥനക്ക് എത്തിയത്.
ജീവനക്കാരേയും ഉദ്യോഗസ്ഥരേയും പരിശോധന പൂര്ത്തിയാക്കിയാണ് കഅ്ബയുടെ മുറ്റത്തേക്കും മദീന പള്ളിയിലേക്കും പ്രവേശിപ്പിക്കുന്നതും. ഇന്നലെ രാത്രി ഏതാനും പേര് ത്വവാഫ് നടത്തുന്നതും ദിവസങ്ങള്ക്ക് ശേഷം വിശ്വാസി സമൂഹം വീക്ഷിച്ചു. മദീന പള്ളിയില് നടന്ന പ്രാര്ഥനയില് ഇമാം പലതവണ വിങ്ങിപ്പൊട്ടി. വീഡിയോ കാണാം.