സൗദിയിലേക്ക്​ ഇന്ന്​ രാവിലെ മാത്രം ഏഴ്​ ആക്രമണങ്ങൾ; ഏഴും തകർത്തതായി സഖ്യസേന

റിയാദ്​: സൗദി അറേബ്യയിലെ അടിസ്ഥാന സൗകര്യങ്ങളെയും ജനവാസ മേഖലകളെയും ലക്ഷ്യംവെച്ച്​ യമനിലെ ഹൂതി വിമതർ നടത്തുന്ന ആ​ക്രമണം തുടരുന്നു. ചൊവ്വാഴ്ച രാവിലെ മാത്രം ഏഴ്​ ആക്രമണങ്ങളാണ്​ നടത്തിയത്​. ഡ്രോണുകളും ബാലിസ്റ്റിക്​ മിസൈലുകളും ഉപയോഗിച്ചുള്ള ആക്രമണങ്ങൾ തകർത്തതായി സൗദി സഖ്യ സേന അറിയിച്ചു. തെക്കൻ പ്രവിശ്യയെ ലക്ഷ്യമാക്കി നാല് ഡ്രോണുകളാണ്​ ഹൂതികൾ ഉപയോഗിച്ചത്​. കിഴക്കൻ പ്രവിശ്യയെ മൂന്ന് ബാലിസ്റ്റിക് മിസൈലുകൾ ഉപയോഗിച്ചും ആക്രമിക്കാൻ ശ്രമിച്ചു. ഇന്ന്​ പുലർച്ച മൂന്നിനും 4.50നുമാണ്​ ആക്രമണങ്ങൾ ​ഉണ്ടായത്​. ഇന്നലെയും റിയാദിനെ അടക്കം ലക്ഷ്യംവെച്ച്​ ഹൂതികൾ ആക്രമണം നടത്തിയിരുന്നു. അതേസമയം, മുൻദിവസങ്ങളെ അപേക്ഷിച്ച്​ ആക്രമണങ്ങളുടെ എണ്ണത്തിൽ കുറവുണ്ടായിട്ടുണ്ട്​. സഖ്യസേന യമനിൽ നടത്തിയ ആക്രമണത്തിൽ ഹൂതികളുടെ പ്രധാന സൈനിക കേ​ന്ദ്രങ്ങൾക്ക്​ നാശമുണ്ടായിട്ടുണ്ട്​. ഹൂതികളുടെ മിസൈൽ സംഭരണ തുരങ്കങ്ങളും നാല്​ മിസൈൽ വിക്ഷേപണ പ്ലാറ്റ്‌ഫോമുകളും ഒരു മിസൈൽ സംഭരണശാലയും തകർത്തതായി സഖ്യസേന അറിയിച്ചു. ഹൂതികളുടെ ആയുധവിതരണം തടസ്സപ്പെടുത്തിയതായും സഖ്യസേന വക്​താവ്​ വ്യക്​തമാക്കിയിട്ടുണ്ട്​.

സൗദിയിലെ ഗ്രീസിന്‍റെ വ്യോമ പ്രതിരോധ സംവിധാനം തുടരാനും തീരുമാനിച്ചിട്ടുണ്ട്​. കിരീടാവകാശി മുഹമ്മദ്​ ബിൻ സൽമാനുമായി ഗ്രീക്ക്​ പ്രധാനമന്ത്രി ചർച്ച നടത്തിയിരുന്നു. സൗദിക്ക്​ സൈനിക സഹായം നൽകാൻ ഈജിപ്തും തീരുമാനിച്ചിട്ടുണ്ട്​. ഹൂതികളുടെ സൗദിയിലേക്കുള്ള ആക്രമണം തടയാനുള്ള സഹായങ്ങൾ നൽകാനാണ്​ ഈജിപ്ത്​ പ്രസിഡന്‍റിന്​ പാർല​മെന്‍റ്​ അനുമതി നൽകിയത്​. സൗദി അറേബ്യയും പാകിസ്താനും തുർക്കിയും ഉൾപ്പെട്ട മക്ക സഖ്യം തെഹ്​റാനിൽ ഇറാനുമായി ഇന്നലെ ചർച്ച നടത്തിയിരുന്നു.