14,18, 43, 47, 57, 9, 30… ഇത്തിഹാദ്​ റെയിലിന്‍റെ ടൈംടേബിളിലെ കൗതുക അക്കങ്ങൾ

ദുബൈ: ഇത്തിഹാദ്​ റെയിൽ നാളെ ദുബൈ- അബൂദബി സർവിസ്​ ആരംഭിക്കു​മ്പോൾ ചില അക്കങ്ങളുടെ സാമ്യങ്ങൾ കൂടി നമ്മളിലേക്ക്​ എത്തുന്നുണ്ട്​. ട്രെയിനിന്‍റെ ഉദ്​ഘാടന തീയതി, പുറപ്പെടൽ സമയം, നിരക്ക്​ എന്നിവയി​ലെല്ലാം ഈ അക്കങ്ങളുടെ സാമ്യങ്ങൾ കാണാം. 14, 43, 57, 9, 30… എന്നീ അക്കങ്ങൾ ചില രസകരമായ അക്കസാമ്യങ്ങൾ കൂടിയാണ്.ദുബൈയിൽനിന്ന് അബൂദബിയിലേക്ക് പുറപ്പെടുന്ന അഞ്ച് ട്രെയിനുകളുടെ സമയങ്ങൾ നോക്കൂ....6.14 , 7.14, 13.14, 17.14, 18.14... അഞ്ച് സമയങ്ങളിലും മിനിറ്റിന്‍റെ സ്ഥാനത്ത് ഒരേ സംഖ്യ കാണാം — 14. ഈ ട്രെയിനുകൾ അബൂദബിയിൽ എത്തുന്ന സമയത്തിലും ഇതേപോലെ ഒരു കൗതുകമുണ്ട്​. നിലവിൽ പ്രസിദ്ധീകരിച്ച ഷെഡ്യൂൾ പ്രകാരം എല്ലാ ട്രെയിനുകളും എത്തുന്നത്​ 8.18, 2.18, 6.18, 7.18 എന്നിങ്ങനെ സമയം കാണാം. അബൂദബിയിൽനിന്ന് ദുബൈയിലേക്ക് നോക്കിയാലോ? അവിടെയും ഇത്തരമൊരു കൗതുകമുണ്ട്​. രാവിലെ 6.43നും 7.43നും ഉച്ചക്ക്​ 12.43നും വൈകുന്നേരം 4.43നും 5.43നും എല്ലാമാണ്​ ​ട്രെയിനുകൾ പുറപ്പെടുന്നത്​. ഇവിടെയും അഞ്ച് സർവീസുകളിലും ഒരേ അവസാന രണ്ട് അക്കങ്ങൾ — 43. ഇവിടെ ട്രെയിനുകൾ എത്തുന്ന സമയങ്ങൾ നോക്കിയാൽ മറ്റൊരു കൗതുകമുണ്ട്​. ട്രെയിനുകൾ എല്ലാം ദുബൈയിൽ എത്തുക 7.47, 8.47, 1.47, 5.47, 6.47 എന്നിങ്ങനെയാണ്​. മണിക്കൂറിലെ 47ാം മിനിറ്റിലാണ്​ ട്രെയിനുകൾ എത്തുക.  അബൂദബിയിൽ നിന്നും ദു​ബൈയിൽ നിന്ന്​ പുറപ്പെടുന്ന രണ്ട്​ സമയങ്ങളും കൂട്ടി നോക്കിയാൽ മറ്റൊരു കൗതുക അക്കം കൂടി ലഭിക്കും. ദുബൈയിൽ നിന്ന്​ പുറപ്പെടുന്ന 14ാം മിനിറ്റും അബൂദബിയിൽ നിന്ന്​ പുറപ്പെടുന്ന 43ാം മിനിറ്റും കൂട്ടിയാൽ 14 + 43 = 57 എന്ന ദുബൈ- അബൂദബി യാത്ര സമയവും ലഭിക്കും.

സമയങ്ങളിലെ 14നും 43നും പിന്നാലെ ടിക്കറ്റ് നിരക്കുകളിലും മറ്റൊരു ചെറിയ കൗതുകം. ദുബൈ–അബൂദബി റൂട്ടിൽ കംഫർട്ട്​ ക്ലാസിൽ 39 ദിർഹവും പ്രീമിയം ക്ലാസിൽ 109 ദിർഹവുമാണ്​ നിരക്ക്​. രണ്ടിന്‍റെയും അവസാനം 9. ദുബൈ–ഫുജൈറയിലേക്കാണെങ്കിൽ കംഫർട്ട്​ ക്ലാസ്​ 29 ദിർഹം, പ്രീമിയം ക്ലാസ്​ 89 ദിർഹം. ഇവിടെയും രണ്ടിന്‍റെയും അവസാനം 9 തന്നെ. മറ്റൊന്ന്​ കൂടിയുണ്ട്​ കൗതുകമുണർത്തുന്നത്​. പാസഞ്ചർ റെയിലിന്‍റെ ഔദ്യോഗിക യാത്രാ ചരിത്രത്തിൽ 30 എന്ന സംഖ്യക്ക്​ പ്രത്യേക സാന്നിധ്യമുണ്ട്. ആദ്യ പാസഞ്ചർ സർവീസ് ഫുജൈറയിൽനിന്ന് ആരംഭിച്ചത്​ ജൂൺ 30നാണ്​. ദുബൈ - അബൂദബി സർവിസ്​ ആരംഭിക്കുന്നത്​ സെപ്​റ്റംബർ 30ന്​. അൽ ദൈദ് സ്റ്റേഷൻ തുറക്കുന്നതും സെപ്​റ്റംബർ 30ന്​ തന്നെ. ഒക്​ടോബർ 30ന്​ മദീനത്​ സായിദ്​, ലിവ സ്​റ്റേഷനുകളും ഡിസംബർ 30ന്​ അൽ ദഫ്റ മേഖലയിലെ ശേഷിക്കുന്ന സ്റ്റേഷനുകളും പ്രവർത്തനത്തിലാകും. 2027 മാർച്ച്​ 30നാണ്​ ഷാർജ യൂണിവേഴ്സിറ്റി സിറ്റി സ്റ്റേഷൻ ഉദ്​ഘാടനം ചെയ്യുന്നത്​. അങ്ങനെ 30 എന്ന തീയതിയിലൂടെ തന്നെ ഘട്ടങ്ങൾ ഓർത്തുവയ്ക്കാനാകുന്ന തരത്തിലാണ് പാസഞ്ചർ റെയിൽ വികസനം മുന്നേറുന്നത്.ഒരു പുതിയ റെയിൽ ശൃംഖലയുടെ കണക്കുകൾ മാത്രമല്ല ഇവ. യുഎഇയുടെ വിവിധ നഗരങ്ങളെയും പ്രദേശങ്ങളെയും ബന്ധിപ്പിക്കുന്ന ഒരു പുതിയ യാത്രാ അധ്യായത്തിന്റെ നമ്പർ മുഖങ്ങളും കൂടിയാണ്.