നിങ്ങൾ കമിഴ്ന്നു കിടന്നാണോ സാധാരണയായി ഉറങ്ങാറുള്ളത്? എങ്കിൽ ഈ ശീലം നിങ്ങളുടെ ശരീരത്തിന് ഉണ്ടാക്കുന്ന ദോഷങ്ങൾ ചെറുതല്ല. ഈ രീതിയിൽ ഉറങ്ങുമ്പോൾ തല ഏതെങ്കിലും ഒരു വശത്തേക്ക് ദീർഘനേരം തിരിഞ്ഞുവയ്ക്കേണ്ടി വരും. ഇത് കഴുത്തിലെ സന്ധികൾക്കും പേശികൾക്കും വലിയ ആയാസമുണ്ടാക്കുകയും, നട്ടെല്ലിന്റെ സ്വാഭാവിക വളവിനെ ദോഷകരമായി ബാധിക്കുകയും ചെയ്യുന്നു. ഉയർന്ന തലയിണകളും വളരെ മൃദുവായ കിടക്കകളും കൂടി ഉപയോഗിക്കുമ്പോൾ രാവിലെ എഴുന്നേൽക്കുമ്പോഴുള്ള കഴുത്തുവേദന, നടുവേദന, ഉറക്കമില്ലായ്മ എന്നിവയ്ക്ക് ഈ ശീലം പ്രധാന കാരണമായി മാറുന്നു.
കമിഴ്ന്നുറങ്ങുന്നത് ശരീരത്തിൽ ഉണ്ടാക്കുന്ന പ്രധാനപ്പെട്ട മൂന്ന് അപകടങ്ങൾ എന്തൊക്കെയെന്ന് നോക്കാം:
1. കഴുത്തിലെ സമ്മർദവും നാഡീപ്രശ്നങ്ങളും
മണിക്കൂറുകളോളം തല 60 മുതൽ 90 ഡിഗ്രി വരെ തിരിച്ചു വെച്ച് കിടക്കുന്നത് കഴുത്തിലെ പേശികൾക്ക് വലിയ സമ്മർദം നൽകുന്നു. ഇത് കഴുത്തിലെ നാഡികളെ ബാധിക്കുകയും, ഉണരുമ്പോൾ തലവേദനയോ കൈകൾക്ക് തരിപ്പോ അനുഭവപ്പെടാൻ കാരണമാവുകയും ചെയ്യും. മാത്രമല്ല, ഈ ശീലം പകൽ സമയങ്ങളിൽ തല മുന്നോട്ട് ആഞ്ഞിരിക്കുന്ന പോസ്ചറിലേക്ക് നിങ്ങളെ മാറ്റുകയും, തോളിനും മുതുകിനും കൂടുതൽ ആയാസം നൽകുകയും ചെയ്യുന്നു.
2. നടുവേദനയും പേശികളുടെ പിരിമുറുക്കവും
കമിഴ്ന്നു കിടക്കുന്നത് നടുവിന്റെയും നട്ടെല്ലിന്റെയും സ്വാഭാവികമായ ആകൃതിയെ ഇല്ലാതാക്കുന്നു. മൃദുവായ കിടക്കകളിൽ ഇങ്ങനെ കിടക്കുന്നത് നടുവിന് കൂടുതൽ സമ്മർദം നൽകുകയും, ഹിപ്പ് ഫ്ലെക്സറുകൾ വലിയാൻ കാരണമാവുകയും ചെയ്യും. രാവിലെ എഴുന്നേൽക്കുമ്പോൾ അനുഭവപ്പെടുന്ന നടുവിലെ പിടുത്തവും അസഹനീയമായ വേദനയും ഇതിന്റെ അനന്തരഫലമാണ്. രാവിലെ എഴുന്നേറ്റ് കുറച്ചുനേരം നടക്കുമ്പോഴോ ജോലികൾ ചെയ്യുമ്പോഴോ മാത്രമായിരിക്കും ഈ വേദനയ്ക്ക് കുറച്ച് ശമനം ലഭിക്കുന്നത്.
3. ശ്വാസതടസവും ചർമപ്രശ്നങ്ങളും
മുഖം അമർത്തി കമിഴ്ന്നു കിടക്കുന്നത് നെഞ്ചിലും വയറ്റിലും കൂടുതൽ സമ്മർദം നൽകുന്നു. ഇത് സുഗമമായ ശ്വാസോച്ഛ്വാസത്തെ ബാധിക്കുകയും, ഉറക്കത്തിൽ വായ തുറന്ന് ശ്വാസമെടുക്കുന്നതിനും അതുവഴി തൊണ്ട വരളുന്നതിനും കാരണമാകും. കൂടാതെ, മുഖം മണിക്കൂറുകളോളം തലയിണയിൽ അമർന്നിരിക്കുന്നത് ചർമത്തിൽ അസ്വസ്ഥതകൾ ഉണ്ടാക്കാനും മുഖക്കുരു വർധിക്കാനും ഇടയാക്കും. കാലക്രമേണ മുഖത്ത് ചുളിവുകൾ വീഴാനും ഈ ഉറക്കരീതി കാരണമാകും.