നിങ്ങളുടെ നാവിൻ്റെ നിറം നിങ്ങളുടെ ആരോഗ്യത്തെക്കുറിച്ച് പറയുന്നതെന്ത്?

നാവ് നമ്മെ സംസാരിക്കാനും രുചിയറിയാനും സഹായിക്കുക മാത്രമല്ല ചെയ്യുന്നത്. നിങ്ങളുടെ ശരീരത്തിലെ പല രോഗങ്ങളുടെയും മുന്നറിയിപ്പ് നൽകുന്ന ഒരു പ്രധാന സൂചകം കൂടിയാണ് നാവ്. നാവിൻ്റെ നിറം, ഘടന, അതിലെ പാടുകൾ എന്നിവ നിർജലീകരണം, വിറ്റാമിനുകളുടെ കുറവ്, അണുബാധകൾ, വായയിലെ കാൻസർ എന്നിവയുടെ വരെ ലക്ഷണങ്ങളാകാം. ലോകാരോഗ്യ സംഘടനയുടെ കണക്കനുസരിച്ച് ലോകമെമ്പാടുമുള്ള കോടിക്കണക്കിന് ആളുകളെ വായ സംബന്ധമായ അസുഖങ്ങൾ ബാധിക്കുന്നുണ്ട്. നാവിൻ്റെ വിവിധ നിറങ്ങൾ നിങ്ങളുടെ ആരോഗ്യത്തെക്കുറിച്ച് നൽകുന്ന സൂചനകൾ എന്തെല്ലാമാണെന്ന് നോക്കാം.

പിങ്ക് നിറമുള്ള നാവ്

സാധാരണയായി ഇളം അല്ലെങ്കിൽ കടും പിങ്ക് നിറമാണ് ആരോഗ്യകരമായ നാവിനുണ്ടാവുക. നാവിൻ്റെ ഉപരിതലത്തിൽ ചെറിയ തടിപ്പുകൾ (Papillae) കാണാം. ശരീരത്തിൽ ആവശ്യത്തിന് വെള്ളമുള്ളതിന്റെയും മികച്ച രക്തചംക്രമണത്തിന്റെയും നല്ല പോഷകാഹാരത്തിന്റെയും ലക്ഷണമാണിത്. രാവിലെ എഴുന്നേൽക്കുമ്പോൾ നാവിൽ കാണുന്ന നേരിയ വെളുത്ത പാടുകൾ തികച്ചും സാധാരണമാണ്. കൃത്യമായി ബ്രഷ് ചെയ്യുന്നതും നാവ് വടിക്കുന്നതും ഈ ആരോഗ്യം നിലനിർത്താൻ സഹായിക്കും.

വെളുത്ത നിറമുള്ള നാവ്

നാവിൽ വെളുത്ത നിറം കാണപ്പെടുന്നത് വളരെ സാധാരണമാണ്. നിർജലീകരണം, വായ വരണ്ടിരിക്കുക, പുകവലി, വായയുടെ ശുചിത്വമില്ലായ്മ, പനി, അല്ലെങ്കിൽ ഫംഗസ് ബാധ എന്നിവ കൊണ്ടാകാം ഇങ്ങനെ സംഭവിക്കുന്നത്. എന്നാൽ ഉരച്ചുനോക്കിയിട്ടും പോകാത്ത കട്ടിയുള്ള വെളുത്ത പാടുകൾ നാവിലുണ്ടെങ്കിൽ അത് ഒരുപക്ഷേ കാൻസറിന് കാരണമാകുന്ന 'ല്യൂക്കോപ്ലാക്കിയ' എന്ന അവസ്ഥയാകാനും സാധ്യതയുണ്ട്. അതിനാൽ ഇത്തരത്തിലുള്ള മാറ്റങ്ങൾ കണ്ടാൽ ഉടൻ ഡോക്ടറെ കാണുക.

വിളറിയ നാവ്

നാവിന് തീരെ നിറമില്ലാതിരിക്കുകയോ വിളറിയ നിറം കാണപ്പെടുകയോ ചെയ്താൽ അത് വിളർച്ചയുടെ, പ്രത്യേകിച്ച് അയേണിന്റെയോ വിറ്റാമിൻ ബി 12 ന്റെയോ കുറവ് കൊണ്ടാകാം. രക്തത്തിൽ ഹീമോഗ്ലോബിൻ്റെ അളവ് കുറയുമ്പോൾ കോശങ്ങളിലേക്കുള്ള ഓക്സിജൻ്റെ വിതരണം കുറയുകയും നാവിലും മോണയിലും വിളർച്ച കാണപ്പെടുകയും ചെയ്യും. ക്ഷീണം, തലകറക്കം, വായയുടെ കോണുകളിലെ വിള്ളലുകൾ എന്നിവയും ഇതിനൊപ്പം ഉണ്ടാകാം.

കടും ചുവപ്പ് നിറം

നാവ് സ്ട്രോബെറി പോലെ കടും ചുവപ്പ് നിറത്തിലാകുന്നത് വിറ്റാമിൻ ബി 12, ഫോളിക് ആസിഡ് എന്നിവയുടെ കുറവ് മൂലമാകാം. കൂടാതെ സ്കാർലറ്റ് ഫീവർ പോലുള്ള അണുബാധകളുടെയും ലക്ഷണമാണിത്. പോഷകങ്ങളുടെ കുറവ് നാവിനെ മിനുസമുള്ളതും തിളക്കമുള്ളതുമാക്കി മാറ്റാം. ഈ അവസ്ഥയിൽ നാവ് വീർക്കുകയും കടുത്ത വേദന അനുഭവപ്പെടുകയും ചെയ്തേക്കാം.

മഞ്ഞ അല്ലെങ്കിൽ ഓറഞ്ച് നിറം

ബാക്ടീരിയകളുടെ വളർച്ച, പുകവലി, നിർജലീകരണം, വായ വരണ്ടിരിക്കുക തുടങ്ങിയവയാണ് നാവിൽ മഞ്ഞയോ ഓറഞ്ചോ നിറത്തിലുള്ള പാടുകൾ ഉണ്ടാകാൻ പ്രധാന കാരണം. ചില മരുന്നുകളും വിറ്റാമിൻ ഗുളികകളും കഴിക്കുന്നതും താൽക്കാലികമായി നിറം മാറ്റത്തിന് കാരണമാകാം. സാധാരണയായി ഇത് അപകടകരമല്ലെങ്കിലും ഫംഗസ് ബാധയോ ദഹനപ്രശ്നങ്ങളോ ഇതിന് പിന്നിലുണ്ടാകാം. വെള്ളം കുടിക്കുന്നതും നാവ് വൃത്തിയാക്കുന്നതും ഈ പ്രശ്നം മാറ്റാൻ സഹായിക്കും.

നീല അല്ലെങ്കിൽ പർപ്പിൾ നിറം

നാവിൻ്റെ നിറം നീലയോ പർപ്പിളോ ആകുന്നത് രക്തത്തിൽ ഓക്സിജൻ്റെ അളവ് കുറയുന്നതിൻ്റെ ലക്ഷണമാണ്. കടുത്ത ശ്വാസകോശ രോഗങ്ങൾ, ഹൃദ്രോഗങ്ങൾ, രക്തചംക്രമണ പ്രശ്നങ്ങൾ എന്നിവയുള്ളവരിലാണ് ഇത് കൂടുതലായി കാണപ്പെടുന്നത്. 'സയനോസിസ്' എന്നറിയപ്പെടുന്ന ഈ അവസ്ഥ കണ്ടാൽ ഉടനടി വൈദ്യസഹായം തേടേണ്ടത് അത്യാവശ്യമാണ്.

കറുത്ത നിറം

നാവ് കറുത്തിരിക്കുന്നത് കാണുമ്പോൾ ഭയം തോന്നാമെങ്കിലും ഇത് അധികം അപകടകാരിയല്ല. മൃതകോശങ്ങളും ബാക്ടീരിയകളും നാവിൽ അടിഞ്ഞുകൂടുന്നതാണ് ഇതിന് കാരണം. പുകവലി, വായയിലെ ശുചിത്വമില്ലായ്മ, അമിതമായ ചായ/കാപ്പി കുടി, തുടർച്ചയായി ആൻ്റിബയോട്ടിക് മരുന്നുകൾ കഴിക്കുന്നത് എന്നിവയാണ് ഇതിന് പിന്നിലെ കാരണങ്ങൾ. ഇത് സ്വയം മാറുന്നില്ലെങ്കിൽ ഡോക്ടറെ കാണേണ്ടതുണ്ട്.

വ്രണങ്ങളും തടിപ്പുകളും അവഗണിക്കരുത്

രണ്ടാഴ്ചയിലധികം നീണ്ടുനിൽക്കുന്ന വ്രണങ്ങൾ, അൾസർ, തടിപ്പുകൾ, നിറവ്യത്യാസം എന്നിവ ഒരിക്കലും അവഗണിക്കരുതെന്ന് ഡോക്ടർമാർ മുന്നറിയിപ്പ് നൽകുന്നു. പുകവലിക്കുന്നവരിലും മദ്യപിക്കുന്നവരിലും ഇത് വായയിലെ കാൻസറിൻ്റെ തുടക്കമാകാൻ സാധ്യതയുണ്ട്. വേദന, ഭക്ഷണം ഇറക്കാനുള്ള ബുദ്ധിമുട്ട് എന്നിവ കണ്ടാൽ ഉടൻ വിദഗ്ധ പരിശോധന നടത്തുക.

നാവിന്റെ ആരോഗ്യം എങ്ങനെ സംരക്ഷിക്കാം?

ദിവസവും ബ്രഷ് ചെയ്യുന്നതിനൊപ്പം നാവ് വൃത്തിയാക്കാനും ശ്രദ്ധിക്കുക. ധാരാളം വെള്ളം കുടിക്കുക, പുകയില ഉൽപ്പന്നങ്ങളും മദ്യപാനവും പൂർണമായും ഒഴിവാക്കുക, പോഷകസമൃദ്ധമായ ഭക്ഷണം കഴിക്കുക, കൃത്യമായ ഇടവേളകളിൽ ദന്ത പരിശോധന നടത്തുക. അയേണും വിറ്റാമിൻ ബി 12ഉം ഫോലേറ്റും അടങ്ങിയ ഭക്ഷണങ്ങൾ കഴിക്കുന്നത് നാവിൻ്റെ ആരോഗ്യത്തിന് ഗുണം ചെയ്യും. നാവിൽ അസ്വാഭാവികമായ മാറ്റങ്ങൾ കണ്ടാൽ സ്വയം ചികിത്സയ്ക്ക് നിൽക്കാതെ ഉടൻ തന്നെ ഒരു ഡോക്ടറെ സമീപിക്കേണ്ടതാണ്.