കോഴിക്കോട്: ഡിജിറ്റല് അറസ്റ്റ് വഴി കോഴിക്കോട് സ്വദേശിനിയില് നിന്ന് 2.04 കോടി തട്ടിയെടുത്ത ഡിജിറ്റല് തട്ടിപ്പുകേസില് ആദ്യ അറസ്റ്റ്. മലപ്പുറം സ്വദേശിയായ 28കാരന് റിനീഷിനെയാണ് പൊലീസ് അറസ്റ്റ് ചെയ്തത്. ടെലികമ്മ്യൂണിക്കേഷന് വകുപ്പിന്റെയും ഡല്ഹി സൈബര് ക്രൈംപൊലീസിന്റെയും പേരില് വ്യാജസന്ദേശങ്ങളും കോളുകളും അയച്ച് ഭീഷണിപ്പെടുത്തി കോഴിക്കോട് സ്വദേശിയായ പരാതിക്കാരിയില് നിന്ന് 2.04 കോടി തട്ടിയെടുത്ത ഇയാള്ക്കെതിരെ ലുക്ക്ഔട്ട് നോട്ടീസ് പുറപ്പെടുവിച്ചിരുന്നു. ഇതിനെ തുടര്ന്നുള്ള അന്വേഷണത്തില് മുംബൈ വിമാനത്താവളത്തില് വെച്ചായിരുന്നു അറസ്റ്റ്.
പ്രതി തട്ടിപ്പ് സംഘങ്ങളെക്കൊണ്ട് ചതിവിലൂടെ തട്ടിയെടുത്ത തുകയിലെ 4.28 ലക്ഷം രൂപ തന്റെ പേരിലുള്ള കനറ ബാങ്ക് വള്ളുവമ്പ്രം ബ്രാഞ്ചിലുള്ള അക്കൗണ്ടില് ക്രെഡിറ്റ് ചെയ്യിപ്പിച്ച് ചെക്ക് വഴി പിന്വലിക്കുകയായിരുന്നു. പണം നഷ്ടപ്പെട്ട വിവരം സൈബര് ഹെല്പ്പ്ലൈന് നമ്പറില് വിളിച്ച് പരാതിക്കാരി റിപ്പോര്ട്ട് ചെയ്തിരുന്നു. ഇതിന് പിന്നാലെ കോഴിക്കോട് സൈബര് പൊലീസ് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. കോഴിക്കോട് സിറ്റി സൈബര് ക്രൈം പൊലീസ് സ്റ്റേഷന് അസിസ്റ്റന്റ് കമ്മീഷണര് ശ്രീ ജി. ബാലചന്ദ്രന് അന്വേഷണ ഉദ്യോഗസ്ഥനായ കേസില് സബ് ഇന്സ്പെക്ടര് അബ്ദുല് അസീസ്, എ.എസ്.ഐ. മാരായ ബിജു ടി, സുജേഷ്.എം എന്നിവരടങ്ങുന്ന സംഘമാണ് മുംബൈയില് വച്ച് പ്രതിയെ കസ്റ്റഡിയില് എടുത്തത്. പ്രതിയെ കോടതിയില് ഹാജരാക്കി 14 ദിവസത്തേക്ക് ജില്ലാ ജയിലില് റിമാന്ഡ് ചെയ്തു.