കൊച്ചി: കൊച്ചി നഗരത്തിൽ വീണ്ടും ഗുണ്ടാ ആക്രമണം. മധ്യവയ്സ്കനായ എറണാകുളം സ്വദേശിയെ തലയ്ക്കടിച്ച് വീഴ്ത്തി. കുപ്രസിദ്ധ ഗുണ്ട പൊക്കൻ ബിപിൻ എന്നറിയപ്പെടുന്ന ബിനീഷിനെ നോർത്ത് പൊലീസ് അറസ്റ്റ് ചെയ്തു.ഇന്നലെ രാത്രിയായിരുന്നു സംഭവം. പൊക്കൻ ബിപിൻ എന്നറിയപ്പെടുന്ന കുപ്രസിദ്ധ ഗുണ്ടയായ ബിനീഷാണ് എറണാകുളം സ്വദേശിയുടെ തലയ്ക്കടിച്ച് വീഴ്ത്തിയത്.
ഇരുവരും ചേർന്ന് കൊച്ചിയിൽ ഒരു സ്ഥാപനം നടത്തിയിരുന്നു. ഈ സ്ഥാപനത്തിൽ നിന്നും ചില സാധനങ്ങൾ കടത്തിയതിലെ വൈരാഗ്യമാണ് ആക്രമണത്തിൽ കലാശിച്ചതെന്നാണ് പൊലീസ് നിഗമനം.
ആളുകൾ നോക്കി നിൽക്കെയാണ് ബിനീഷ് വടി ഉപയോഗിച്ച് മധ്യവയസ്കന്റെ തലയ്ക്കടിച്ചത്. ആക്രണത്തിൽ ഗുരുതരമായി പരിക്കേറ്റ എറണാകുളം സ്വദേശി കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലാണ്. സംഭവത്തിന് പിന്നാലെ നോർത്ത് സിഐ പ്രതാപ് ചന്ദ്രന്റെ നേതൃത്വത്തിൽ എസ്ഐമാരായ രതീഷ്, ദർശക്, ആഷിക് എന്നിവർ ചേർന്നാണ് പൊക്കൻ ബിപിനെ കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തിട്ടുണ്ട്. കൊച്ചിയിലും ആലപ്പുഴയിലുമായി 9 കേസുകളിൽ പ്രതിയാണ് പൊക്കൻ ബിപിൻ. ശിവസേന പ്രവർത്തകൻ കൂടിയാണ് ഇയാൾ.