തിരുവനന്തപുരം: ജലനിരപ്പ് ഉയരുന്നതിനാൽ എട്ട് ഡാമുകളിൽ റെഡ് അലർട്ട് പ്രഖ്യാപിച്ചു. പത്തനംതിട്ട മൂഴിയാർ ഡാം , ഇടുക്കിയിലെ പൊന്മുടി , കല്ലാർകുട്ടി, ഇരട്ടയാർ , ലോവർ പെരിയാർ ,തൃശ്ശൂർ പെരിങ്ങൽകുത്ത് , കോഴിക്കോട് കുറ്റ്യടി ഡാം,വയനാട് ബാണാസുര സാഗർ എന്നിവിടങ്ങളിലാണ് റെഡ് അലർട്ട് പ്രഖ്യാപിച്ചത്. അപകടകരമായ രീതിയിൽ ജലനിരപ്പുയരുന്നതിനെതുടർന്ന് വിവിധ നദികളിലും മുന്നറിയിപ്പ് നിർദേശം നൽകി.
ശക്തമായ മഴതുടരുന്ന പശ്ചത്തലത്തിൽ പാലക്കാട് മലമ്പുഴ ഡാം , വയനാട് ബാണാസുര സാഗർ എന്നിവയുടെ ഷട്ടറുകൾ തുറന്നു. തമിഴ്നാട് ഷോളയാർ ഡാം തുറന്നതിനാൽ അതിരപ്പിള്ളി പുഴയുടെ തീരത്ത് താമസിക്കുന്നവർക്ക് ജാഗ്രതാ നിർദേശം നൽകിയിട്ടുണ്ട്. രാവിലെ 10 മണിയോടെയാണ് വയനാട് ബാണസുര സാഗർ ഡാമിൻ്റെ ഷട്ടറുകൾ തുറന്നത്.മലമ്പുഴ ഡാമിൻ്റെ നാല് ഷട്ടറുകളും 5 സെൻ്റീമീറ്റർ വീതമാണ് ഉയർത്തിയത് . കൽപ്പാത്തിപ്പുഴ , ഭാരതപ്പുഴ തീരങ്ങളിൽ താമസിക്കുന്നവർ ജാഗ്രത പുലർത്തണമെന്ന് നിർദേശം നൽകിയിട്ടുണ്ട്.
തമിഴ്നാട് വാൽപ്പാറയിലെ ഷോളയാർ ഡാം തുറന്നു. അതിരപ്പിള്ളി പുഴയിലേക്കാണ് വെള്ളം എത്തുന്നത്. ഷോളയാർ ഡാമിൻ്റെ ഷട്ടറുകൾ തുറന്നതിനാൽ പെരിങ്ങൽകൂത്ത് ഡാമിലെ ജലനിരപ്പും ഉയരും . ഡാമുകളിലെ ജലനിരപ്പ് സംബന്ധിച്ച് ആശങ്കപെടേണ്ട സഹചരമില്ലെന്ന് റവന്യൂ മന്ത്രി കെ. രാജൻ അറിയിച്ചു. 16 ഡാമുകളാണ് നിലവിൽ തുറന്നിരിക്കുന്നത് .