അഞ്ചാമത് ഫെഡറൽ ബാങ്ക് കൊച്ചി മാരത്തൺ: രജിസ്ട്രേഷൻ ആരംഭിച്ചു

കൊച്ചി: ചുരുങ്ങിയ കാലംകൊണ്ട് കേരളത്തിന്റെ സ്വന്തം മാരത്തണായി മാറിയ ഫെഡറൽ ബാങ്ക് കൊച്ചി മാരത്തൺ അഞ്ചാം പതിപ്പിന്റെ രജിസ്ട്രേഷൻ ആരംഭിച്ചു. ഇതിന്റെ ഭാഗമായി ആദ്യ ബിബ് ഹൈബി ഈഡൻ എം.പിക്ക് കൈമാറി. മാരത്തൺ സംഘാടകരായ ക്ലിയോസ്പോർട്സ് ഡയറക്ടർ അനീഷ് പോൾ, ക്ലിയോസ്പോർട്സ് മാർക്കറ്റിങ് ഹെഡ് നിഥുൻ സദാനന്ദൻ എന്നിവർ ചേർന്നാണ് ബിബ് നൽകിയത്. നാല് പതിപ്പുകൾ വിജയകരമായി പൂർത്തിയാക്കിയ ഫെഡറൽ ബാങ്ക് മാരത്തൺ കൊച്ചിയുടെ മുഖമുദ്രയാണെന്ന് എം.പി അഭിപ്രായപ്പെട്ടു.

42.195 കി.മീ മാരത്തൺ, 21.097 കി.മീ ഹാഫ് മാരത്തൺ, 10 കി.മീ, 3 കി.മീ ഗ്രീൻ റൺ എന്നീ വിഭാഗങ്ങളിലാണ് മാരത്തൺ നടക്കുക.ആരോഗ്യത്തിന് ഏറെ പ്രാധാന്യം നൽകുന്ന മലയാളികൾ വളരെ ആവേശത്തോടെ കാത്തിരിക്കുന്ന ഇവന്റായി ഫെഡറൽ ബാങ്ക് കൊച്ചി മാരത്തണിനെ മാറ്റിയെടുക്കാൻ കഴിഞ്ഞതിൽ ഏറെ സന്തോഷമുണ്ടെന്ന് ക്ലിയോസ്പോർട്സ് ഡയറക്ടർമാരായ അനീഷ് പോൾ, ബൈജു പോൾ, ശബരി ആർ. നായർ, എം.ആർ.കെ. ജയറാം എന്നിവർ പറഞ്ഞു. കൊച്ചിയുടെ ആരോഗ്യ-കായിക സംസ്കാരത്തെയും ടൂറിസത്തെയും ആഗോളതലത്തിൽ അടയാളപ്പെടുത്തുന്ന വേദിയായി ഫെഡറൽ ബാങ്ക് കൊച്ചി മാരത്തൺ മാറിയെന്നും അവർ അഭിപ്രായപ്പെട്ടു.

ഫെബ്രുവരിയിൽ നടക്കുന്ന മാരത്തണിൽ പങ്കെടുക്കാനായി www.kochimarathon.in എന്ന വെബ്‌സൈറ്റ് വഴി ഇപ്പോൾ രജിസ്റ്റർ ചെയ്യാം. ഒക്ടോബർ 15 ന് മുമ്പ് രജിസ്റ്റർ ചെയ്യുന്നവർക്ക് 10 ശതമാനം ഇളവ് ലഭിക്കും.