ന്യൂയോര്ക്ക്: ആർട്ടിഫിഷ്യൽ ഇൻ്റലിജൻസ് (എഐ) എല്ലാ ജോലികളും ഇല്ലാതാക്കുമെന്ന് ടെസ്ല സി.ഇ.ഒ ഇലോണ് മസ്ക്. ജോലികള് വെറും ഹോബികളായി നിലനില്ക്കുമെന്നും എന്നാല് ഇതൊരു മോശം സംഭവവികാസമല്ലെന്ന് വിശ്വസിക്കുന്നതായും മസ്കിന്റെ വാക്കുകളെ ഉദ്ധരിച്ച് സിഎന്എന് റിപ്പോര്ട്ട് ചെയ്യുന്നു. ഒരുപക്ഷേ ആര്ക്കും ജോലിയുണ്ടാകില്ലെന്നും അദ്ദേഹം കൂട്ടിച്ചേര്ത്തു. വ്യാഴാഴ്ച പാരീസിൽ നടന്ന ഒരു സ്റ്റാർട്ടപ്പ്, ടെക് ഇവൻ്റിൽ സംസാരിക്കുകയായിരുന്നു അദ്ദേഹം.
ജോലികള് 'ഓപ്ഷണല്' ആയിരിക്കുമെന്ന് മസ്ക് പ്രവചിച്ചു. "നിങ്ങൾക്ക് ഒരു ഹോബി പോലെയുള്ള ഒരു ജോലി ചെയ്യാൻ താൽപ്പര്യമുണ്ടെങ്കിൽ, നിങ്ങൾക്ക് ഒരു ജോലി ചെയ്യാൻ കഴിയും. അല്ലെങ്കിൽ, എഐയും റോബോട്ടുകളും നിങ്ങൾ ആഗ്രഹിക്കുന്ന ഏതെങ്കിലും ചരക്കുകളും സേവനങ്ങളും നൽകും.” ടെസ്ല മേധാവി വിശദീകരിച്ചു. ചരക്കുകൾക്കോ സേവനങ്ങൾക്കോ ഒരു കുറവും ഉണ്ടാകില്ലെന്നും അദ്ദേഹം പറഞ്ഞു. കഴിഞ്ഞ കുറച്ച് വർഷങ്ങളായി എഐയുടെ കഴിവുകൾ അതിവേഗം വികസിച്ചിട്ടുണ്ടെന്നും റെഗുലേറ്റർമാരും കമ്പനികളും ഉപയോക്താക്കളും സാങ്കേതിക വിദ്യയെ ഉത്തരവാദിത്തത്തോടെ എങ്ങനെ പ്രയോജനപ്പെടുത്താമെന്ന് ഇപ്പോഴും പരീക്ഷിച്ചുകൊണ്ടിരിക്കുകയാണെന്നും മസ്ക് എടുത്തുപറഞ്ഞു. നേരത്തെയും മസ്ക് എഐയെക്കുറിച്ചുള്ള തന്റെ ആശങ്കകള് പ്രകടിപ്പിച്ചിരുന്നു.
സാങ്കേതിക വിദ്യയെ തന്റെ ഏറ്റവും വലിയ ഭയമെന്നാണ് അദ്ദേഹം വിശേഷിപ്പിച്ചത്. ജോലിയില്ലാത്ത ഭാവിയിൽ ആളുകൾക്ക് വൈകാരിക സംതൃപ്തി അനുഭവപ്പെടുമോ എന്ന് മസ്ക് ചോദിച്ചു. "കമ്പ്യൂട്ടറിനും റോബോട്ടുകൾക്കും നിങ്ങളെക്കാൾ നന്നായി എല്ലാം ചെയ്യാൻ കഴിയുമെങ്കിൽ, നിങ്ങളുടെ ജീവിതത്തിന് അർത്ഥമുണ്ടോ?" മസ്ക് പറഞ്ഞു. അതേസമയം, കുട്ടികളുടെ സോഷ്യല് മീഡിയ ഉപയോഗത്തെപ്പറ്റിയും അദ്ദേഹം കരുതല് പങ്കുവെച്ചു. കുട്ടികള് ഉപയോഗിക്കുന്ന സോഷ്യല് മീഡിയയുടെ അളവ് നിയന്ത്രിക്കാനും പരിമിതപ്പെടുത്താനും അദ്ദേഹം മാതാപിതാക്കളെ ഉപദേശിക്കുകയും ചെയ്തു.