ജോ ബൈഡന്
വാഷിംഗ്ടണ്: തങ്ങളുടെ ജനങ്ങളെ കശാപ്പ് ചെയ്യുന്നതിനെതിരെ പ്രതികരിക്കാൻ ഇസ്രായേലിന് അവകാശമുണ്ടെന്നും സ്വയം പ്രതിരോധിക്കാൻ ആവശ്യമായത് രാജ്യത്തിനുണ്ടെന്ന് ഉറപ്പാക്കുമെന്നും യു.എസ് പ്രസിഡന്റ് ജോ ബൈഡൻ. ആസ്ത്രേലിയന് പ്രധാനമന്ത്രി ആന്റണി അല്ബാനീസുമായി നടത്തിയ സംയുക്ത വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
''അവരുടെ ജനങ്ങളെ കൊന്നൊടുക്കുന്നതിനെതിരെ പ്രതികരിക്കാൻ ഇസ്രായേലിന് അവകാശമുണ്ട്. ഈ ഭീകരർക്കെതിരെ സ്വയം പ്രതിരോധിക്കാൻ ഇസ്രായേലിന് ആവശ്യമായത് ഞങ്ങൾ ഉറപ്പാക്കും. അത് ഗ്യാരണ്ടിയാണ്'' ബൈഡന് ബുധനാഴ്ച നടത്തിയ വാര്ത്താസമ്മേളനത്തില് പറഞ്ഞു. ''ഗസ്സ മുനമ്പിലെയോ മറ്റെവിടെയെങ്കിലുമോ ബഹുഭൂരിപക്ഷം വരുന്ന ഫലസ്തീൻ ജനതയെ ഹമാസ് പ്രതിനിധീകരിക്കുന്നില്ലെന്നും നാം ഓർക്കണം. ഫലസ്തീൻ പൗരന്മാരുടെ പിന്നിൽ ഹമാസ് ഒളിച്ചിരിക്കുന്നു. അത് നിന്ദ്യമാണ്. അതിലൊട്ടും അതിശയിക്കാനില്ല..കാരണം അവര് ഭീരുക്കളാണ്'' അദ്ദേഹം കൂട്ടിച്ചേര്ത്തു.
''ഹമാസിനെ പിന്തുടരുമ്പോള് അത് ഇസ്രായേലിന് അധികഭാരം നല്കുന്നു. എന്നാൽ അത് പ്രവർത്തിക്കേണ്ടതിന്റെയും യുദ്ധ നിയമങ്ങളുമായി പൊരുത്തപ്പെടേണ്ടതിന്റെയും ആവശ്യകതയെ കുറയ്ക്കുന്നില്ല. കാരണം ഇസ്രായേൽ അതിന്റെ ശക്തിയിൽ എല്ലാം ചെയ്യണം. നിരപരാധികളായ സാധാരണക്കാരെ സംരക്ഷിക്കുക എന്നത് പോലെ തന്നെ ബുദ്ധിമുട്ടുള്ള കാര്യമാണ്" യു.എസ് പ്രസിഡന്റ് പറഞ്ഞു.ഗസ്സയിലെ നിരപരാധികളായ ആളുകൾക്ക് ഭക്ഷണവും വെള്ളവും മെഡിക്കൽ സപ്ലൈകളും ലഭിക്കുന്നുണ്ടെന്ന് ഉറപ്പാക്കാൻ യുഎസുമായി ചേർന്ന് പ്രവർത്തിച്ചതിന് ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് എൽ-സിസിയോട് ബൈഡൻ നന്ദി പറഞ്ഞു.
അതേസമയം, സുരക്ഷിതത്വത്തിലും അന്തസ്സോടെയും സമാധാനത്തോടെയും ഒരുമിച്ച് ജീവിക്കാൻ ഇസ്രായേലികളും ഫലസ്തീനിയും ഒരുപോലെ അർഹരാണെന്ന് ബൈഡൻ പറഞ്ഞു."ഒക്ടോബർ 6 ന് നിലനിന്നിരുന്ന നിലവിലെ സ്ഥിതിയിലേക്ക് തിരിച്ചുപോകാനാവില്ല. അതായത് ഹമാസിന് ഇനി ഇസ്രായേലിനെ ഭയപ്പെടുത്താനും ഫലസ്തീൻ സിവിലിയന്മാരെ മനുഷ്യകവചമായി ഉപയോഗിക്കാനും കഴിയില്ല," അദ്ദേഹം പറഞ്ഞു.ഈ പ്രതിസന്ധി അവസാനിക്കുമ്പോള് അടുത്തതായി വരാനിരിക്കുന്നതിനെക്കുറിച്ച് ഒരു ദീര്ഘവീക്ഷണം ഉണ്ടായിരിക്കണം. ഞങ്ങളുടെ കാഴ്ചപ്പാടില് രണ്ട് രാഷ്ട്രമെന്ന പരിഹാരമാണ്'' അദ്ദേഹം വ്യക്തമാക്കി.