'റിയൽ ആകൂ.. അഭിനയിക്കാതെ.. '- മേഗൻ മാർക്കിളിന്റെ ഷോയ്ക്ക് വ്യാപക വിമർശനം !

രാജപദവികളെല്ലാം ഉപേക്ഷിച്ച് ഹാരി രാജകുമാരൻ ബക്കിങ്ഹാം പാലസിന്റെ പടിയിറങ്ങിയിട്ട് അഞ്ച് വർഷമാകുന്നു. അന്ന് തൊട്ടിന്നുവരെ ഹാരിക്കും ഭാര്യ മേഗനും കൂട്ടിന് വിവാദങ്ങളെ ഉണ്ടായിട്ടുള്ളൂ. രാജകുടുംബത്തെ പറ്റി മേഗൻ പറഞ്ഞ കാര്യങ്ങളും ഹാരി പങ്കുവച്ച അനുഭവങ്ങളുമൊക്കെ വിവാദങ്ങളുടെ കൊടുമുറി തന്നെ കയറിയിട്ടുണ്ട്. യുഎസിലേക്ക് താമസം മാറ്റാനുള്ള ഇരുവരുടെയും തീരുമാനം പോലും വിമർശനങ്ങളേറെ ഏറ്റുവാങ്ങി.

ഇപ്പോഴിതാ നെറ്റ്ഫ്‌ളിക്‌സ് റിലീസ് ചെയ്ത, മേഗൻ മാർക്കിളിന്റെ പുതിയ ഷോ 'വിത്ത് ലവ് മേഗനും' വലിയ ചർച്ചയായിക്കൊണ്ടിരിക്കുകയാണ്. 8 എപിസോഡുകളായി മാർച്ച് 4ന് റിലീസ് ചെയ്ത ഈ ലൈഫ്‌സ്റ്റൈൽ ടെലിവിഷൻ പരമ്പര വ്യാപക വിമർശനമാണ് നേരിടുന്നത്.

മേഗന്റെ ദൈനംദിന ജീവിതം ആസ്പദമാക്കിയുള്ളതാണ് ഷോ. വീട്ടിൽ വിരുന്നുകാർക്കായി മേഗൻ നടത്തുന്ന തയ്യാറെടുപ്പുകളും ജീവിതത്തെ കുറിച്ചുള്ള മേഗന്റെ കാഴ്ചപ്പാടുകളുമൊക്കെ ഷോയിലൂടെ വിവരിക്കുന്നുണ്ട്. കാലിഫോർണിയയിലെ മോണ്ടെസീറ്റോയിൽ ഹാരിക്കും കുട്ടികൾക്കുമൊപ്പം അത്യാഡംബര വസതിയിലാണ് മേഗൻ താമസിക്കുന്നത്. സുരക്ഷാകാരണങ്ങളാൽ ഈ വീട് ഒഴിവാക്കി, ഇവിടെ തന്നെയുള്ള ഒരു ഫാം ഹൗസിലാണ് ഷോയുടെ ചിത്രീകരണം. ഇംഗ്ലീഷ് കോട്ടേജും ചെറിയ പച്ചക്കറിത്തോട്ടവുമൊക്കെയായി ഏസ്‌തെറ്റിക്കലി പ്ലീസിംഗ് ആയ സെറ്റ് അപ്പ് ആണ് ഷോയുടേത്.

എന്നാൽ ഇത്രയൊക്കെ ഉണ്ടെങ്കിലും ഷോയുടെ കണ്ടന്റ് ആളുകൾക്ക് തീരെ രസിച്ചിട്ടില്ലെന്നാണ് റിവ്യൂകളിലൂടെ വ്യക്തമാകുക. ഷോയിൽ മേഗൻ തീരെ റിയലിസ്റ്റിക് അല്ലെന്നും ഇത്രയും നാൾ മേഗൻ പുറത്ത് കാണിച്ചിരുന്നത് വ്യാജ വ്യക്തിത്വമാണെന്നുമാണ് പ്രധാന വിമർശനം. താൻ ആരൊക്കെയോ ആണെന്നുള്ള ഭാവത്തിൽ, ലോജിക്കില്ലാത്ത എന്തൊക്കെയോ മേഗൻ കാണിച്ചുകൂട്ടുകയാണെന്നാണ് പ്രേഷകർ പറയുന്നത്. മേഗന്റെ പാചകപരീക്ഷണങ്ങളും അതിഥികളുമൊത്തുള്ള ക്യാൻഡിൽ മേക്കിംഗും ചെടികൾക്ക് വെള്ളം നനയ്ക്കലുമൊക്കെയായി വളരെ ബേസിക് ആയ കണ്ടന്റ് വലിയ സംഭവമാക്കി ചിത്രീകരിച്ചിരിക്കുകയാണെന്നും വിമർശനമുണ്ട്.

ഇതിനിടെ പ്രേഷകരെ ഞെട്ടിച്ച് മറ്റൊരു വലിയ വെളിപ്പെടുത്തലും നടത്തുന്നുണ്ട് മേഗൻ. സീരിസിന്റെ രണ്ടാമത്തെ എപ്പിസോഡിലാണിത്. മേഗന്റെ സുഹൃത്തായ മിൻഡി കാലിംഗ് ഈ എപ്പിസോഡിൽ അവതാരകയായി എത്തുന്നുണ്ട്. കുക്കിംഗിനിടെ മിൻഡിയോട് സംസാരിച്ച് വളരെ കാഷ്വലായ രീതിയിലാണ് ചിലപ്പോഴൊക്കെ ഷോ മുന്നോട്ട് നീങ്ങുന്നത്. എന്നാൽ ഇടയ്ക്ക് വെച്ച് തന്നെ മിൻഡി നിരന്തരം മേഗൻ മാർക്കിൾ എന്ന് അഭിസംബോധന ചെയ്യുന്നതിൽ മേഗൻ അസ്വസ്ഥയായി.. തുടർന്ന് താനിപ്പോൾ സസെക്‌സ് ആണെന്ന് മിൻഡിയെ മേഗൻ തിരുത്തി.

രാജകുടുംബത്തിന്റെ ഔദ്യോഗിക പദവികൾ ഒഴിഞ്ഞെങ്കിലും ഊഴമനുസിച്ച് കിരീടാവകാശികളിൽ അഞ്ചാമനാണ് ഹാരി. 2018ൽ വിവാഹത്തിന് പിന്നാലെ എലിസബത്ത് രാജ്ഞി, 'ദി ഡ്യൂക്ക് ഓഫ് സസെക്‌സ്' പദവി ഹാരിക്ക് സമ്മാനിച്ചിരുന്നു. രാജരീതി പ്രകാരം സൗത്ത് ഈസ്റ്റ് ഇംഗ്ലണ്ടിലുള്ള സസെക്‌സിലെ പ്രഭുവാണ് ഹാരി. കൊട്ടാരം വിട്ടെങ്കിലും രാജരേഖകളിൽ 'ദി ഡ്യൂക് ഓഫ് സസെക്‌സ്' എന്നാണ് ഹാരിയുടെ ടൈറ്റിൽ. ഔദ്യോഗിക കാര്യങ്ങൾക്കല്ലാതെ ഹാരിക്ക് ഈ ടൈറ്റിൽ ഉപയോഗിക്കുകയും ചെയ്യാം.

ഹാരി 'ഡ്യൂക്ക് ഓഫ് സസെക്‌സ്' ആകുമ്പോൾ 'ഡച്ചസ് ഓഫ്‌സ് സസെക്‌സ്' ആണ് മേഗൻ. ഹാരി ഡ്യൂക്ക് ടൈറ്റിൽ അങ്ങനെ ഉപയോഗിക്കാറില്ലെങ്കിലും മേഗൻ തന്റെ രാജപദവി ഇപ്പോഴും ആസ്വദിക്കുന്നുണ്ടെന്നാണ് സീരിസ് കാണുന്ന ആർക്കും തോന്നുക. താനൊരു സസെക്‌സ് ആയതിൽ അഭിമാനിക്കുകയാണ് മേഗൻ എന്നും ഇത് ഒരു വിരോധാഭാസമാണെന്നും വിമർശകർ ചൂണ്ടിക്കാട്ടുന്നു. രാജപദവികൾ ഉപേക്ഷിച്ച് പോന്നതിനാൽ മേഗൻ ആ പദവി പേരിനൊപ്പം ചേർക്കേണ്ട ആവശ്യമില്ലെന്നാണ് വിമർശനം.

തന്റെ കുട്ടികളുടെ പേരിനൊപ്പം താൻ ഷെയർ ചെയ്യുന്ന പേരാണതെന്നാണ് മേഗൻ ഷോയിൽ പറയുന്നത്. കുട്ടികളുമായി തന്നെ കണക്ട് ചെയ്യുന്ന ആ ടൈറ്റിൽ ഭയങ്കര സ്‌പെഷ്യലാണെന്നും മേഗൻ കൂട്ടിച്ചേർക്കുന്നുണ്ട്.

ഇതെല്ലാം പ്രോസസ് ചെയ്യാൻ കഴിയാതെ ഒരു നിമിഷം മിൻഡി സ്തബ്ധയായി നിൽക്കുന്നത് സ്‌ക്രീനിൽ വ്യക്തമായി കാണാം. പക്ഷേ തനിക്കതത്ര പ്രശ്‌നമായി തോന്നിയിട്ടില്ലെന്ന് മിൻഡി കഴിഞ്ഞ ദിവസം പ്രതികരിച്ചു. മേഗനുമായി കുറച്ച് നല്ല സമയം ചെലവഴിക്കാൻ കഴിഞ്ഞു എന്നും തന്റെ കാഴ്ചപ്പാടുകളും അനുഭവങ്ങളും മേഗൻ പങ്കുവയ്ക്കുന്നത് കാണാൻ രസകരമായിരുന്നുവെന്നുമായിരുന്നു മിൻഡിയുടെ പ്രതികരണം.

ഇടയ്ക്ക് കൊട്ടാരത്തിലെ രീതികളെ ഷോയിൽ മേഗൻ കളിയാക്കുന്നുമുണ്ട്. ഷോയിൽ ഹാരി കടന്നുവന്നപ്പോളായിരുന്നു ഇത്. കൊട്ടാരത്തിലെ മറ്റ് അംഗങ്ങളെ വണങ്ങുന്ന രീതി മേഗൻ തമാശ രൂപേണ അവതരിപ്പിക്കുമ്പോൾ, ചെറുതായൊന്ന് ചിരിച്ച് ആ രംഗം ഒഴിവാക്കാൻ ശ്രമിക്കുന്നുണ്ട് ഷോയിൽ ഹാരി. കൊട്ടാരം വിട്ടെങ്കിലും സ്വന്തം വീട്ടുകാരെ പരിഹസിക്കുന്നത് ഹാരിക്ക് ഇഷ്ടപ്പെട്ടില്ല എന്ന് മുഖത്ത് നിന്ന് വായിച്ചെടുക്കാം എന്ന് ചൂണ്ടിക്കാട്ടുന്നുണ്ട് വിമർശകർ.

എന്തൊക്കെയായാലും ഈ കാരണങ്ങൾ എല്ലാം കൊണ്ടു തന്നെ, പ്രതീക്ഷ പോലെ ഷോ ഹിറ്റ് ആയില്ലെന്ന് മാത്രമല്ല, രൂക്ഷവിമർശനങ്ങൾ ധാരാളം വാങ്ങിക്കൂട്ടുകയും ചെയ്തു. ഇന്റർനെറ്റ് മൂവി ഡാറ്റാ ബേസ് അഥവാ ഐഎംഡിബി 10ൽ 2.6 ആണ് ഷോയ്ക്ക് നൽകിയിരിക്കുന്ന റേറ്റിംഗ്. റോട്ടൻ ടൊമേറ്റോസിന്റേത് 28ശതമാനവും..

അതേസമയം വിമർശനങ്ങൾ കടുക്കുമ്പോഴും 'വിത്ത് ലൗ മേഗന്റെ' രണ്ടാം സീസൺ അണിയറയിൽ ഒരുങ്ങുന്നു എന്ന വാർത്തയിൽ അക്ഷരാർഥത്തിൽ ഞെട്ടി ഇരിക്കുകയാണ് സിനിമാ പ്രേഷകരും നിരൂപകരും. മേഗൻ തന്നെയാണ് ഈ വിവരം ഇൻസ്റ്റഗ്രാമിലൂടെ അറിയിച്ചത്. ഒന്നാം സീസണിന്റെ ഒന്നാം എപിസോഡ് തന്നെ കണ്ടുതീർക്കാൻ കഴിഞ്ഞിട്ടില്ല, അപ്പോഴാണ് രണ്ടാം സീസണിന്റെ വരവ് എന്നാണ് ആളുകളുടെ പരിഹാസം

ഇത് രണ്ടാം തവണയാണ് മേഗനെ കേന്ദ്രീകരിച്ച് നെറ്റ്ഫ്‌ലിക്‌സ് ഡോക്യുമെന്ററി ഒരുക്കുന്നത്. 2022ലിറങ്ങിയ 'ഹാരി ആൻഡ് മേഗൻ' വലിയ ഹിറ്റ് ആയിരുന്നു. എന്നാൽ ഇതിന് പിന്നാലെയിറങ്ങിയ 'ഹാർട്ട് ഓഫ് ഇൻവിക്ടസും' 'പോളോയും' കനത്ത പരാജയമേറ്റു വാങ്ങി. മേഗനുമായി 100 മില്യൺ ഡോളറിന്റെ ഡീൽ ആണ് നെറ്റ്ഫ്‌ളിക്‌സിനുള്ളത്. 'വിത്ത് ലൗ മേഗനോടെ' ഈ കരാർ പൂർത്തിയായതായാണ് വിവരം.

.