യുപിഐ ചാര്‍ജ്: നിയമപരമായ അടിസ്ഥാനമെന്ത് ?; പണം ആര്‍ക്ക് ലഭിക്കും, കേന്ദ്രത്തോട് സുപ്രീംകോടതി

യുപിഐ ഇടപാടുകള്‍ക്ക് മര്‍ച്ചന്റ് ഡിസ്‌കൗണ്ട് റേറ്റ് അഥവാ എംഡിആര്‍ ചുമത്തുന്നതിന്റെ നിയമപരമായ അടിസ്ഥാനം എന്താണെന്ന് സുപ്രീംകോടതി. കേന്ദ്രസര്‍ക്കാരിനോടും ആര്‍ബിഐയോടും എന്‍പിസിഐയോടും ഇക്കാര്യത്തില്‍ സുപ്രീംകോടതി വിശദീകരണം തേടി.എംഡിആര്‍ വഴി ഈടാക്കുന്ന പണം ഒടുവില്‍ ആര്‍ക്കാണ് ലഭിക്കുക എന്ന കാര്യത്തിലും സുപ്രീം കോടതി വ്യക്തത ആവശ്യപ്പെട്ടു.

യുപിഐ ഇടപാടുകള്‍ക്ക് എംഡിആര്‍ ചുമത്താനുള്ള തീരുമാനത്തെ ചോദ്യം ചെയ്ത് സമര്‍പ്പിച്ച ഹര്‍ജി പരിഗണിക്കുന്നതിനിടെയാണ് സുപ്രീം കോടതിയുടെ നിര്‍ദേശം. എംഡിആര്‍ നടപ്പാക്കുന്നത് താല്‍ക്കാലികമായി തടയണമെന്ന ഹര്‍ജിക്കാരന്റെ ആവശ്യം കോടതി അംഗീകരിച്ചില്ല.

നിലവിലെ നിര്‍ദേശപ്രകാരം, 2,000 രൂപയ്ക്ക് മുകളിലുള്ള ഇടപാടുകള്‍ക്ക് 0.4 ശതമാനം വരെ എംഡിആര്‍ ഈടാക്കുന്ന രീതിയാണ് അവതരിപ്പിച്ചിരിക്കുന്നത്. ഈ സംവിധാനം ഒക്ടോബര്‍ 15 മുതല്‍ പ്രാബല്യത്തില്‍ വരാനാണ് തീരുമാനം.

അതേസമയം, വ്യക്തിയില്‍ നിന്ന് വ്യക്തിയിലേക്കുള്ള സാധാരണ യുപിഐ പണമിടപാടുകള്‍ക്ക് ചാര്‍ജ് ബാധകമല്ല.75,000 രൂപയും അതിന് മുകളിലുമുള്ള ഇടപാടുകള്‍ക്ക് എംഡിആര്‍ പരമാവധി 300 രൂപയായി നിശ്ചയിച്ചിട്ടുണ്ട്.

റെയില്‍വേ, ടെലികോം, ഇന്‍ഷുറന്‍സ്, ഇന്ധനം, കാര്‍ഷിക ഇന്‍പുട്ടുകള്‍ തുടങ്ങിയ കുറഞ്ഞ മാര്‍ജിനുള്ള മേഖലകള്‍ക്ക് 2,000 രൂപയ്ക്ക് മുകളിലുള്ള ഇടപാടുകള്‍ക്ക് ഓരോ ഇടപാടിനും 5 രൂപയുടെ ഫ്‌ലാറ്റ് എംഡിആര്‍ ആണ് നിര്‍ദേശിച്ചിരിക്കുന്നത്.

മ്യൂച്വല്‍ ഫണ്ടുകള്‍, സെക്യൂരിറ്റികള്‍, സ്റ്റോക്ക് ബ്രോക്കര്‍മാര്‍, ഡീലര്‍മാര്‍ എന്നിവയുമായി ബന്ധപ്പെട്ട ഇടപാടുകള്‍ക്ക് 0.02 ശതമാനം എംഡിആര്‍ ആയിരിക്കും. ഇതിനും 300 രൂപയുടെ പരമാവധി പരിധിയുണ്ട്.

എന്താണ് സുപ്രീം കോടതിയിലെ ഹര്‍ജി?

സെപ്റ്റംബര്‍ 14ന് കേന്ദ്രസര്‍ക്കാര്‍ പുറത്തിറക്കിയ വിജ്ഞാപനവും സെപ്റ്റംബര്‍ 15ന് പ്രഖ്യാപിച്ച എംഡിആര്‍ ചട്ടക്കൂടുമാണ് ഹര്‍ജിയില്‍ ചോദ്യം ചെയ്തിരിക്കുന്നത്.എംഡിആര്‍ ചുമത്തുന്നതിന് മതിയായ നിയമപരമായ സുരക്ഷാ സംവിധാനങ്ങളും സുതാര്യതയും പൊതുചര്‍ച്ചയും ഉണ്ടായില്ലെന്നാണ് ഹര്‍ജിക്കാരന്റെ വാദം.പേയ്‌മെന്റ് ആന്‍ഡ് സെറ്റില്‍മെന്റ് സിസ്റ്റംസ് ആക്ട്, 2007ലെ ഭേദഗതി ചെയ്ത പത്താം വകുപ്പിന്റെ എ ഉപവകുപ്പിന്റെ ഭരണഘടനാപരമായ സാധുതയും ഹര്‍ജി ചോദ്യം ചെയ്യുന്നു.ഇലക്ട്രോണിക് പേയ്‌മെന്റ് സംവിധാനങ്ങളില്‍ ഏതൊക്കെയാണ് ചാര്‍ജില്‍ നിന്ന് സംരക്ഷിക്കപ്പെടേണ്ടതെന്ന് തീരുമാനിക്കാന്‍ സര്‍ക്കാരിന് വ്യക്തമായ മാനദണ്ഡങ്ങളില്ലാതെ അധികാരം നല്‍കുന്നതാണ് ഭേദഗതിയെന്നാണ് ഹര്‍ജിയിലെ വാദം.യുപിഐയും റുപേ ഡെബിറ്റ് കാര്‍ഡും തമ്മിലുള്ള വ്യത്യാസവും ഹര്‍ജിയില്‍ ചൂണ്ടിക്കാട്ടിയിട്ടുണ്ട്.

റുപേ ഡെബിറ്റ് കാര്‍ഡ് ഇടപാടുകള്‍ക്ക് പൂര്‍ണമായും ചാര്‍ജ് ഒഴിവാക്കിയിരിക്കുമ്പോള്‍, ഉയര്‍ന്ന തുകയുള്ള ചില യുപിഐ വ്യാപാരി ഇടപാടുകള്‍ക്ക് എംഡിആര്‍ ഏര്‍പ്പെടുത്തുന്നത് വിവേചനപരമാണെന്നാണ് ഹര്‍ജിക്കാരന്റെ വാദം.ഇത്തരം എംഡിആര്‍ സംവിധാനം ചെറിയ വ്യാപാരികളെ ബാധിക്കാനും അതുവഴി പരോക്ഷമായി ഉപഭോക്താക്കള്‍ക്ക് അധിക ചെലവ് ഉണ്ടാകാനും സാധ്യതയുണ്ടെന്നും ഹര്‍ജിയില്‍ പറയുന്നു.