രൺവീർ സിങിന് ഇനി ബോളിവുഡിൽ ജോലി ചെയ്യാൻ കഴിയില്ലേ?, എന്താണ് പുതിയ വിലക്ക്?

മുംബൈ: 'ഡോൺ 3' എന്ന ചിത്രത്തിൽ നിന്ന് പിൻമാറിയതിനെ തുടർന്ന് നടൻ രൺവീർ സിങിനെതിരെ നടപടിയുമായി ഫെഡറേഷൻ ഓഫ് വെസ്റ്റേൺ ഇന്ത്യ സിനി എംപ്ലോയീസ്. ഇന്ത്യയിലെ ചലച്ചിത്ര-ടെലിവിഷൻ തൊഴിലാളികളുടെ പരമോന്നത ട്രേഡ് യൂണിയനും ഏകോപന സമിതിയുമാണ് ഫെഡറേഷൻ ഓഫ് വെസ്റ്റേൺ ഇന്ത്യ സിനി എംപ്ലോയീസ്. ചിത്രത്തിൽ നിന്ന് പിന്മാറിയതുമായി ബന്ധപ്പെട്ട വിഷയത്തിൽ ചർച്ചയ്ക്ക് ഹാജരാകാൻ ആവർത്തിച്ച് ആവശ്യപ്പെട്ടിട്ടും നടൻ വിസമ്മതിച്ചതോടെയാണ് രൺവീർ സിങിനെ വിലക്കി കൊണ്ടുള്ള നിർദേശം സംഘടന പുറപ്പെടുവിച്ചത്.

ഫർഹാൻ അക്തർ സംവിധാനം ചെയ്യുന്ന 'ഡോൺ 3'-യിൽ നിന്ന് ചിത്രീകരണം തുടങ്ങുന്നതിന് തൊട്ടുമുമ്പ് രൺവീർ സിങ് പിന്മാറിയതാണ് പ്രശ്നങ്ങൾക്ക് തുടക്കം. ഈ പിന്മാറ്റം മൂലം പ്രീ-പ്രൊഡക്ഷൻ പ്രവർത്തനങ്ങൾക്കായി ചെലവായ 45 കോടി രൂപ നഷ്ടപരിഹാരമായി നൽകണമെന്ന് എക്സൽ എന്റർടൈൻമെന്റ് ആവശ്യപ്പെട്ടിരുന്നു. ഇക്കാര്യത്തിൽ വിശദീകരണം നൽകാനും പ്രശ്നം പരിഹരിക്കാനും ഫെഡറേഷൻ രൺവീറിനെ പലതവണ നേരിട്ട് ഹാജരാകാൻ ക്ഷണിച്ചിരുന്നു.

മൂന്ന് തവണ ഓർമപ്പെടുത്തിയിട്ടും രൺവീർ നേരിട്ട് ഹാജരാകാൻ തയ്യാറായില്ലെന്ന് FWICE ഭാരവാഹികൾ വ്യക്തമാക്കി. തങ്ങളുടെ അധികാരപരിധിയിൽ വരുന്ന വിഷയമല്ല ഇതെന്ന നിലപാടാണ് നടന്റെ ഓഫീസ് സ്വീകരിച്ചത്. എന്നാൽ, ഒരു ട്രേഡ് യൂണിയൻ എന്ന നിലയിൽ തങ്ങളുടെ അംഗങ്ങളുടെയും നിർമാതാക്കളുടെയും താല്പര്യം സംരക്ഷിക്കാൻ തങ്ങൾക്ക് അവകാശമുണ്ടെന്ന് FWICE പ്രസിഡന്റ് ബി.എൻ. തിവാരി പറഞ്ഞു. രൺവീർ സിങിനെതിരെ സ്വീകരിച്ച ഈ നടപടി ഒരു സൂപ്പർസ്റ്റാർ നിയമത്തിന് അതീതനല്ല എന്ന സന്ദേശമാണ് നൽകുന്നതെന്നും അദ്ദേഹം കൂട്ടിച്ചേർത്തു.

ഈ വിഷയത്തിൽ നടൻ രൺവീർ സിങ് ഇതുവരെ നേരിട്ട് പ്രതികരിച്ചിട്ടില്ല. എന്നിരുന്നാലും, വിഷയത്തിൽ മാന്യതയും പക്വതയും കാത്തുസൂക്ഷിക്കാൻ താൻ ആഗ്രഹിക്കുന്നുവെന്നും താൻ തന്റെ ജോലിയിലും ഭാവിയിലുള്ള പ്രതിബദ്ധതകളിലും ശ്രദ്ധ കേന്ദ്രീകരിക്കുന്നുവെന്നുമാണ് അദ്ദേഹത്തിന്റെ വക്താവ് അറിയിച്ചത്. ഈ വിവാദങ്ങളോട് പരസ്യമായി പ്രതികരിക്കേണ്ടതില്ലെന്ന നിലപാടാണ് താരം സ്വീകരിച്ചിരിക്കുന്നത്.

രൺവീർ സിങിന് ഇനി ബോളിവുഡിൽ ജോലി ചെയ്യാൻ കഴിയില്ലേ?

FWICE രൺവീർ സിംഗിനെതിരെ 'നിസഹകരണ നിർദേശം' ആണ് പുറപ്പെടുവിച്ചിരിക്കുന്നത്. ഔദ്യോഗികമായി ഇതൊരു നിരോധനമല്ലെങ്കിലും, ചലച്ചിത്ര മേഖലയിലെ തൊഴിലാളികൾ, സാങ്കേതിക പ്രവർത്തകർ, മറ്റ് അസോസിയേഷനുകൾ എന്നിവർ രൺവീറുമായി സഹകരിക്കരുതെന്നാണ് ഫെഡറേഷൻ നിർദേശിച്ചിരിക്കുന്നത്. ഈ വിവാദം പരിഹരിക്കപ്പെടും വരെ അദ്ദേഹവുമായി പ്രൊഫഷണൽ ബന്ധം പാടില്ലെന്ന് നിർമാതാക്കളോടും സ്റ്റുഡിയോകളോടും ഫെഡറേഷൻ ആവശ്യപ്പെട്ടിട്ടുണ്ട്.

FWICE-ൽ 30ലധികം അഫിലിയേറ്റഡ് യൂണിയനുകളിലായി ലക്ഷക്കണക്കിന് തൊഴിലാളികളുണ്ട്. അതിനാൽ, ഈ നിർദേശം നിലനിൽക്കുന്ന കാലത്തോളം രൺവീർ സിങിന്റെ വരാനിരിക്കുന്ന ചിത്രങ്ങൾ, പരസ്യ ചിത്രങ്ങൾ എന്നിവയുടെ ഷൂട്ടിങ് തടസപ്പെടാൻ സാധ്യതയുണ്ട്. ലൈറ്റ് ബോയ്സ് മുതൽ സാങ്കേതിക പ്രവർത്തകർ വരെ അദ്ദേഹവുമായി സഹകരിക്കില്ല.

ചുരുക്കത്തിൽ, രൺവീർ സിങ് ഫെഡറേഷനുമായി നേരിട്ട് ചർച്ച നടത്തി ഈ വിഷയം രമ്യമായി പരിഹരിക്കാത്ത പക്ഷം ബോളിവുഡിലെ അദ്ദേഹത്തിന്റെ പ്രവർത്തനങ്ങളെ ഈ 'നിസഹകരണ നിർദേശം' വലിയ തോതിൽ ബാധിച്ചേക്കാം.