കുട്ടികൾ ഓടി കളിക്കുമ്പോഴോ മറ്റു ശാരീരിക അധ്വാനത്തിൽ ഏർപ്പെടുമ്പോഴോ കളിക്കുമ്പോഴോ അസാധാരണമായി തളരുന്നത് നിസാരമായി കണ്ട് തള്ളിക്കളയരുത്. കുട്ടികളിലെ അസാധാരണമായ കിതപ്പും തളർച്ചയും ആസ്ത്മയുടെ ആദ്യകാല ലക്ഷണമാകാൻ സാധ്യതയുണ്ടെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ലോക ആസ്ത്മ ദിനത്തോടനുബന്ധിച്ച് പുറത്തുവന്ന റിപ്പോർട്ടുകൾ പ്രകാരം, ശ്വാസകോശ സംബന്ധമായ ഈ ഗുരുതര പ്രശ്നം പലപ്പോഴും ശരിയായ സമയത്ത് തിരിച്ചറിയപ്പെടാതെ പോകുന്നത് കുട്ടികളുടെ ആരോഗ്യത്തെ ദോഷകരമായി ബാധിക്കുന്നുണ്ട്.

ശ്വാസകോശത്തിലേക്കുള്ള വായുസഞ്ചാര പാതയിലുണ്ടാകുന്ന നീർവീക്കവും തടസവുമാണ് ആസ്ത്മയിലേക്ക് നയിക്കുന്നത്. കുട്ടികൾ കളിക്കുമ്പോൾ ശ്വാസനാളം കൂടുതൽ ചുരുങ്ങുകയും ഇത് ശ്വസനം പ്രയാസകരമാക്കുകയും ചെയ്യുന്നു. ഇതിനെ 'എക്സർസൈസ് ഇൻഡ്യൂസ്ഡ് ബ്രോങ്കോസ്പാസം' എന്നാണ് വൈദ്യശാസ്ത്രം വിളിക്കുന്നത്. കളിക്കുന്നതിനിടയിൽ കുട്ടി പെട്ടെന്ന് നിൽക്കുക, ശ്വാസം കിട്ടാതെ ബുദ്ധിമുട്ടുക, നെഞ്ചിൽ ഭാരം അനുഭവപ്പെടുക എന്നിവ കണ്ടാൽ പ്രത്യേക ശ്രദ്ധ നൽകണം.

വിട്ടുമാറാത്ത ചുമയാണ് മറ്റൊരു പ്രധാന ലക്ഷണം. പ്രത്യേകിച്ച് രാത്രികാലങ്ങളിലും പുലർച്ചെയും ഉണ്ടാകുന്ന ചുമ, കഫക്കെട്ടില്ലാത്ത വരണ്ട ചുമ എന്നിവ ആസ്ത്മയുടെ സൂചനയാകാം. ശ്വാസമെടുക്കുമ്പോൾ വിസിൽ അടിക്കുന്നത് പോലെയുള്ള ശബ്ദം കേൾക്കുന്നുണ്ടെങ്കിൽ അത് ശ്വാസനാളം വളരെയധികം ചുരുങ്ങിയതിന്റെ ലക്ഷണമാണ്. ഇത്തരം ലക്ഷണങ്ങൾ കാണിക്കുന്ന കുട്ടികൾക്ക് കായിക വിനോദങ്ങളിൽ ഏർപ്പെടാൻ താത്പര്യം കുറയുന്നതായും പഠനങ്ങൾ ചൂണ്ടിക്കാട്ടുന്നു.

മലിനമായ വായു, പൊടിപടലങ്ങൾ, പൂപ്പൽ, വളർത്തുമൃഗങ്ങളുടെ രോമങ്ങൾ, പുക എന്നിവ ആസ്ത്മ ലക്ഷണങ്ങൾ വർധിപ്പിക്കുന്ന ഘടകങ്ങളാണ്. വീടിനുള്ളിലെ പരിസരം വൃത്തിയായി സൂക്ഷിക്കുന്നതും അലർജിക്ക് കാരണമാകുന്ന വസ്തുക്കളിൽ നിന്ന് കുട്ടികളെ മാറ്റിനിർത്തുന്നതും രോഗനിയന്ത്രണത്തിൽ പ്രധാനമാണ്. ജനിതകമായ കാരണങ്ങളാലും കാലാവസ്ഥാ വ്യതിയാനം മൂലവും കുട്ടികളിൽ ശ്വസനതടസം രൂക്ഷമാകാം.

രോഗം കൃത്യസമയത്ത് തിരിച്ചറിഞ്ഞാൽ ആസ്ത്മയെ ഫലപ്രദമായി നിയന്ത്രിക്കാൻ സാധിക്കും. ശ്വാസകോശത്തിന്റെ ശേഷി അളക്കുന്ന സ്പൈറോമെട്രി പോലുള്ള പരിശോധനകളിലൂടെ ഡോക്ടർമാർക്ക് രോഗനിർണയം നടത്താം. ഇൻഹേലറുകളുടെ കൃത്യമായ ഉപയോഗമാണ് ആസ്ത്മ ചികിത്സയിൽ ഏറ്റവും ഫലപ്രദം. മരുന്നുകൾ നേരിട്ട് ശ്വാസകോശത്തിലേക്ക് എത്തുന്നതിനാൽ ഇത് വേഗത്തിൽ ആശ്വാസം നൽകുന്നു.

ആസ്ത്മയുള്ള കുട്ടികൾ കായിക വിനോദങ്ങളിൽ നിന്ന് വിട്ടുനിൽക്കേണ്ടതില്ലെന്നും കൃത്യമായ ചികിത്സയിലൂടെ അവർക്കും മറ്റുള്ളവരെപ്പോലെ സജീവമായിരിക്കാൻ കഴിയുമെന്നും വിദഗ്ധർ ഓർമ്മിപ്പിക്കുന്നു. കുട്ടിയുടെ ആരോഗ്യസ്ഥിതിയെക്കുറിച്ച് സ്കൂൾ അധ്യാപകർക്കും പരിശീലകർക്കും അറിവുണ്ടായിരിക്കണം. ശരിയായ മുൻകരുതലുകൾ എടുക്കുന്നതിലൂടെ കുട്ടികൾക്ക് ആസ്ത്മയെ അതിജീവിച്ച് ആരോഗ്യകരമായ ജീവിതം നയിക്കാൻ സാധിക്കുമെന്ന് റിപ്പോർട്ടുകൾ വ്യക്തമാക്കുന്നു.