ചെറുപ്പം നിലനിർത്തണോ?;എങ്കിൽ ഈ ഭക്ഷണങ്ങളോട് അകലം പാലിച്ചോളൂ...

കണ്ണാടിക്ക് മുന്നിൽ നിന്ന് സ്വന്തം മുഖം നോക്കുമ്പോൾ ചെറിയ ചുളിവുകളും തൊലിയിലെ മാറ്റവുമെല്ലാം കണ്ട് എപ്പോഴെങ്കിലും നിരാശ തോന്നിയിട്ടുണ്ടോ. ക്രീമുകളും സെറങ്ങളും ഉപയോഗിച്ചിട്ടും ചര്‍മ്മത്തിന്‍റെ ആരോഗ്യവും തിളക്കവും നിലനിര്‍ത്താന്‍ സാധിക്കുന്നില്ലാലോ എന്ന് സങ്കടപ്പെടാറുണ്ടോ..ആയിരക്കണക്കിന് രൂപ ചെലവഴിച്ചാണ് പലരും സ്കിന്‍ കെയര്‍ ഉത്പന്നങ്ങള്‍ വാങ്ങുന്നത്. എന്നിട്ടും ഫലം കാണുന്നില്ല എന്ന് തോന്നുന്നുണ്ടെങ്കില്‍ അറിഞ്ഞിരിക്കുക,യഥാര്‍ഥ പ്രശ്നം നമ്മുടെ ജീവിത ശൈലികളും നാം എന്ത് കഴിക്കുന്നു എന്നതുമൊക്കെയാണ്.

ശരീരത്തിലെ പ്രോട്ടീനുകളുടെ 30 ശതമാനം വരെ കൊളാജനാണ്. ചർമ്മത്തിന്റെ ഇലാസ്തികതയും അസ്ഥികളുടെയും സന്ധികളുടെ ആരോഗ്യം നിലനിർത്തുന്നതിൽ കൊളാജന്‍ പ്രധാന പങ്കുവഹിക്കുന്നുണ്ട്. കൂടാതെ മുടിയുടെയും നഖത്തിന്റെയും തിളക്കത്തിനും ഇത് അത്യന്താപേക്ഷിതമാണ്.

പ്രായമാകുന്നതോടെ ശരീരത്തിന്റെ സ്വാഭാവിക കൊളാജൻ ഉത്പാദനം കുറയാൻ തുടങ്ങുന്നു. 20-കളുടെ അവസാനത്തോടെ തന്നെ ഈ കുറവ് ആരംഭിക്കാം. 30-കളിലും 40-കളിലുമെത്തുമ്പോൾ ഗണ്യമായി കുറയുന്നു. ഇതോടൊപ്പം, മോശമായ ജീവിതശൈലിയും ഭക്ഷണക്രമവും ഈ പ്രക്രിയയെ വേഗത്തിലാക്കുന്നു. പുകവലി, അമിത സൂര്യപ്രകാശം, സ്‌ട്രെസ്, ഉറക്കക്കുറവ് തുടങ്ങിയവയെല്ലാം കൊളാജനെ ബാധിക്കുന്നു.

ഇതില്‍ ഏറ്റവും പ്രധാനപ്പെട്ടത് ഭക്ഷണമാണ്. ചില ഭക്ഷണങ്ങൾ കൊളാജൻ ഉൽപാദനത്തെ നേരിട്ട് തടസ്സപ്പെടുത്തുകയും, നിലവിലുള്ള കൊളാജനെ നശിപ്പിക്കുകയും ചെയ്യുന്നു. അമിതമായ പഞ്ചസാര, റിഫൈൻഡ് കാർബോഹൈഡ്രേറ്റുകൾ, ഫ്രൈഡ് ഫുഡുകൾ, പ്രോസസ്ഡ് മീറ്റുകൾ, സോഫ്റ്റ് ഡ്രിങ്കുകൾ തുടങ്ങിയവ കൊളാജനെ ദുർബലമാക്കി ചര്‍മ്മത്തില്‍ ചുളിവുകൾ വേഗത്തിൽ പ്രത്യക്ഷപ്പെടാന്‍ കാരണമാകും.എന്തിന് നമ്മള്‍ ചെയ്യുന്ന ചര്‍മ്മ സംരക്ഷണം പോലും ഫലപ്രദമല്ലാതായി തീരും.

അതുകൊണ്ട്, കൊളാജനെ സംരക്ഷിക്കാൻ ആദ്യം ചെയ്യേണ്ടത് നമ്മുടെ ദൈനംദിന ഭക്ഷണക്രമത്തിലെ തെറ്റുകൾ തിരിച്ചറിയുകയാണ്. ഏതൊക്കെ ഭക്ഷണങ്ങൾ കൊളാജന്‍ ഉത്പാദനത്തിന് വിലങ്ങു തടിയാകുമെന്ന് മനസിലാക്കുകയും അവ പരമാവധി അകറ്റി നിര്‌ത്തുകയുമാണ് വേണ്ടത്. അത്തരം ഭക്ഷണങ്ങള്‍ ഏതൊക്കെയാണെന്ന് നോക്കാം..

പഞ്ചസാര

കൊളാജൻ ഉൽപാദനത്തെ തടസപ്പെടുത്തുന്ന ഏറ്റവും മോശമായ ഭക്ഷണങ്ങളിലൊന്നാണ് പഞ്ചസാര. പഞ്ചസാര അമിതമായി കഴിക്കുന്നത് ഗ്ലൈക്കേഷൻ എന്നറിയപ്പെടുന്ന പ്രക്രിയയിലേക്ക് നയിക്കുന്നു. പഞ്ചസാര തന്മാത്രകൾ കൊളാജൻ പ്രോട്ടീനുകളുമായി ബന്ധിപ്പിക്കുകയും AGEs (അഡ്വാൻസ്ഡ് ഗ്ലൈക്കേഷൻ എൻഡ് പ്രോഡക്റ്റ്സ്) എന്നറിയപ്പെടുന്ന വിഷ പദാർത്ഥങ്ങൾ രൂപപ്പെടുകയും ചെയ്യുന്നു. ഈ പദാർഥങ്ങൾ കൊളാജനെ കടുപ്പമുള്ളതും ദുർബലവുമാക്കുന്നു, ഇത് ചര്‍മ്മത്തിലെ ചുളിവുകൾക്കും നേർത്ത വരകൾക്കും കാരണമാകുന്നു. ബ്രെഡ്, മധുരപലഹാരങ്ങൾ, ബേക്കറി ഇനങ്ങൾ, സോഫ്റ്റ് ഡ്രിങ്കുകൾ തുടങ്ങിയ ഭക്ഷണങ്ങളിൽ പഞ്ചസാര കൂടുതലാണ്, അതിനാൽ അവയുടെ ഉപഭോഗം പരിമിതപ്പെടുത്തണം.

വറുത്ത ഭക്ഷണങ്ങൾ

വറുത്ത ഭക്ഷണങ്ങളിൽ അനാരോഗ്യകരമായ കൊഴുപ്പുകളും ഫ്രീ റാഡിക്കലുകളും അടങ്ങിയിട്ടുണ്ട്. അവ ശരീരത്തിൽ നീര്‍ക്കെട്ട് ഉണ്ടാക്കുന്നു, ഇത് കൊളാജൻ ഉത്പാദനം കുറക്കുകയും ചെയ്യും. ഫ്രഞ്ച് ഫ്രൈസ്, വറുത്ത ലഘുഭക്ഷണങ്ങൾ,സംസ്കരിച്ച വറുത്ത മാംസങ്ങള്‍ തുടങ്ങിയവ അമിതമായി കഴിക്കുന്നത് ചർമ്മത്തിന്‍റെ ആരോഗ്യത്തെ നശിപ്പിക്കും. ഇത്തരം ഭക്ഷണങ്ങൾ പതിവാക്കിയാൽ, എത്ര സ്ക്രബ്ബും ക്രീമും ഉപയോഗിച്ചാലും ചർമ്മത്തിന്റെ യൗവനം നിലനിർത്തുകയെന്നത് പ്രയാസമാകും.

സംസ്കരിച്ച മാംസം

സോസേജുകൾ, പായ്ക്ക് ചെയ്ത മാംസം തുടങ്ങിയ സംസ്കരിച്ച മാംസങ്ങളിൽ സോഡിയം, പ്രിസർവേറ്റീവുകൾ, കൃത്രിമ അഡിറ്റീവുകൾ എന്നിവ ഉയർന്ന അളവില്‍ അടങ്ങിയിട്ടുണ്ട്. ഇത് നിർജ്ജലീകരണത്തിന് കാരണമാകുന്നു, കൂടാതെ കൊളാജന്റെ അളവിനെ തടസപ്പെടുത്തുന്നു. അമിതമായ ഉപ്പിന്‍റെ ഉപഭോഗം ചർമ്മത്തിൽ നിന്ന് ഈർപ്പം ഇല്ലാതാക്കുകയും ചർമ്മത്തിന് കേടുപാടുകൾ സംഭവിക്കാനുള്ള സാധ്യത വർധിപ്പിക്കുകയും ചെയ്യുന്നു.

കഫീൻ

മിതമായ കഫീൻ ഉപഭോഗം അപകടകരമല്ല, പക്ഷേ അമിത ഉപഭോഗം ചർമ്മത്തിന് ദോഷകരമാണ്. അമിതമായ കാപ്പി, ചായ അല്ലെങ്കിൽ എനർജി ഡ്രിങ്കുകൾ നിർജ്ജലീകരണത്തിനും ഉറക്കമില്ലായ്മയ്ക്കും കാരണമാകും. കൊളാജൻ ഉത്പാദനത്തിന് ശരിയായ വിശ്രമവും ജലാംശവും ആവശ്യമാണ്. ശരീരത്തിൽ വെള്ളത്തിന്റെയോ ഉറക്കത്തിന്റെയോ കുറവുണ്ടാകുന്നത് കൊളാജൻ ഉത്പാദനം കുറയ്ക്കുകയും ചർമ്മത്തിൽ ചുളിവുകൾ ഉണ്ടാകുകയും ക്ഷീണം തോന്നിപ്പിക്കുകയും ചെയ്യുന്നു.

അൾട്രാ പ്രോസസ്സ് ചെയ്ത ഇനങ്ങൾ

അൾട്രാ പ്രോസസ് ചെയ്ത ഭക്ഷണങ്ങളിൽ ദോഷകരമായ ട്രാൻസ് ഫാറ്റുകൾ അടങ്ങിയിട്ടുണ്ട്. ഈ കൊഴുപ്പുകൾ വീക്കം ഉണ്ടാക്കുകയും ചർമ്മത്തിന്റെ ആരോഗ്യത്തെ ദുർബലപ്പെടുത്തുകയും ചെയ്യുന്നു.

കൊളാജൻ ഉത്പാദനത്തിനും ആരോഗ്യമുള്ള ചര്‍മ്മത്തിനുമായി പഴങ്ങള്‍,പച്ചക്കറികള്‍, പ്രോട്ടീൻ സമ്പുഷ്ടമായ ഭക്ഷണങ്ങൾ, ധാരാളം വെള്ളം എന്നിവ ദൈനംദിന ഭക്ഷണത്തില്‍ ഉള്‍പ്പെടുത്താന്‍ ശ്രമിക്കുക.