നെഞ്ചുവേദന മാത്രമല്ല ലക്ഷണം; ഹൃദയാഘാതത്തിന് ദിവസങ്ങൾക്കുമുമ്പ് ശരീരം നൽകുന്ന സൂചനകൾ ഇതൊക്കെയാണ്

ഹൃദയാഘാതം എന്ന് കേൾക്കുമ്പോൾ നമുക്ക് ഓർമവരുന്നത് പെട്ടെന്നുണ്ടാകുന്ന നെഞ്ചുവേദനയും കുഴഞ്ഞുവീഴലുമൊക്കെയാണ്. എന്നാൽ പലപ്പോഴും ഹൃദയാഘാതം സംഭവിക്കുന്നതിന് ദിവസങ്ങൾക്കും ആഴ്ചകൾക്കും മുൻപേ ശരീരം ഇതു സംബന്ധിച്ച ചില അപായസൂചനകൾ നൽകുന്നുണ്ടെന്ന് വൈദ്യശാസ്ത്രം പറയുന്നു. ഇത്തരം 'നിശബ്ദ ലക്ഷണങ്ങൾ' തിരിച്ചറിയുന്നത് വലിയൊരു അപകടം തടയാൻ നമ്മെ സഹായിക്കും. ഹൃദയാഘാതം സംഭവിക്കുന്നതിന് മുൻപ് അനുഭവപ്പെടാൻ സാധ്യതയുള്ള ചില പ്രധാന ലക്ഷണങ്ങൾ താഴെ പറയുന്നവയാണ്:

വിട്ടുമാറാത്ത തളർച്ചയും ക്ഷീണവും

കഠിനമായ ജോലികൾ ഒന്നും ചെയ്യാതെ തന്നെ വല്ലാത്ത തളർച്ച അനുഭവപ്പെടുന്നത് ഹൃദയസംബന്ധമായ പ്രശ്നങ്ങളുടെ ലക്ഷണമാകാം. ഹൃദയത്തിന് ശരീരത്തിലേക്ക് രക്തം പമ്പ് ചെയ്യാൻ കൂടുതൽ ആയാസം വേണ്ടിവരുമ്പോൾ ശരീരം പെട്ടെന്ന് തളരുന്നു. പ്രത്യേകിച്ച് സ്ത്രീകൾ ഇത്തരം അകാരണമായ ക്ഷീണം ശ്രദ്ധിക്കേണ്ടതുണ്ട്.

ശ്വാസതടസ്സം

നടക്കുമ്പോഴോ പടികൾ കയറുമ്പോഴോ അസാധാരണമായി ശ്വാസം മുട്ടുന്നത് ഹൃദയത്തിന്റെ പ്രവർത്തനം മന്ദഗതിയിലാകുന്നതിന്റെ സൂചനയാണ്. ശ്വാസകോശത്തിലേക്ക് ആവശ്യത്തിന് ഓക്സിജൻ എത്തുന്നതിൽ തടസ്സം നേരിടുമ്പോഴാണ് ഇങ്ങനെ സംഭവിക്കുന്നത്. വിശ്രമിക്കുമ്പോൾ പോലും ശ്വാസമെടുക്കാൻ ബുദ്ധിമുട്ട് തോന്നുന്നുണ്ടെങ്കിൽ അത് ഗൗരവമായി കാണണം.

ദഹനപ്രശ്നങ്ങളും വയറിലെ അസ്വസ്ഥതയും

പലപ്പോഴും ഹൃദയാഘാത ലക്ഷണങ്ങളെ വെറും ഗ്യാസ് ട്രബിൾ അല്ലെങ്കിൽ അസിഡിറ്റി ആയി തെറ്റിദ്ധരിക്കാറുണ്ട്. വയറിന്റെ മുകൾ ഭാഗത്ത് അനുഭവപ്പെടുന്ന അസ്വസ്ഥത, നെഞ്ചെരിച്ചിൽ, ഓക്കാനം എന്നിവ ഹൃദയാഘാതത്തിന് മുൻപ് പ്രകടമാകാറുണ്ട്. സാധാരണ ഉണ്ടാകാറുള്ള അസിഡിറ്റി മരുന്നുകൾ കഴിച്ചിട്ടും മാറുന്നില്ലെങ്കിൽ ഉടൻ ഒരു പരിശോധന നടത്തുന്നത് ഉചിതമാണ്.

ശരീരത്തിന്റെ മറ്റ് ഭാഗങ്ങളിലെ വേദന

നെഞ്ചിൽ മാത്രം വേദന ഉണ്ടാകണമെന്നില്ല. താടിയെല്ല്, കഴുത്ത്, പുറംഭാഗം, ഇടത് കൈ അല്ലെങ്കിൽ രണ്ട് കൈകൾ എന്നിവിടങ്ങളിൽ ഉണ്ടാകുന്ന അസാധാരണമായ വേദനയോ ഭാരമോ ഹൃദയത്തിൽ നിന്നുള്ള മുന്നറിയിപ്പായിരിക്കാം. ഇത്തരം വേദനകൾ വരികയും പോകുകയും ചെയ്യുന്നത് പലപ്പോഴും ആളുകൾ അവഗണിക്കാറുണ്ട്.

അമിതമായ വിയർപ്പ്

അമിതമായ ചൂടോ വ്യായാമമോ ഇല്ലാതെ തന്നെ ശരീരം പെട്ടെന്ന് വിയർക്കുന്നത് ഹൃദയത്തിന്റെ തകരാറുകൾ മൂലമാകാം. ചർമ്മം തണുത്ത് വിയർക്കുന്ന അവസ്ഥ ഹൃദയാഘാതത്തിന്റെ ഒരു പ്രധാന ലക്ഷണമാണ്. രാത്രിയിൽ ഉറക്കത്തിനിടയിൽ അമിതമായി വിയർക്കുന്നത് പ്രത്യേകം ശ്രദ്ധിക്കണം.

തലകറക്കവും ബോധക്ഷയവും

രക്തസമ്മർദത്തിൽ പെട്ടെന്നുണ്ടാകുന്ന വ്യതിയാനം കാരണം തലകറക്കമോ കണ്ണിൽ ഇരുട്ട് കയറുന്നതോ പോലെ തോന്നാം. ഹൃദയം രക്തം പമ്പ് ചെയ്യുന്നതിൽ പരാജയപ്പെടുമ്പോൾ തലച്ചോറിലേക്കുള്ള രക്തപ്രവാഹം കുറയുന്നതാണ് ഇതിന് കാരണം.

ഹൃദയാഘാതം ഒരു നിമിഷം കൊണ്ട് സംഭവിക്കുന്ന ഒന്നാണെന്ന് കരുതരുത്. മുകളിൽ പറഞ്ഞ ലക്ഷണങ്ങൾ ദിവസങ്ങളോളം നീണ്ടുനിൽക്കുകയോ ഇടയ്ക്കിടെ വരികയോ ചെയ്യുന്നുണ്ടെങ്കിൽ ഒട്ടും വൈകാതെ ഒരു ഹൃദോഗ വിദ​ഗ്ധനെ കണ്ട് പരിശോധന നടത്തുക. കൃത്യസമയത്തുള്ള രോഗനിർണ്ണയം നിങ്ങളുടെ ജീവൻ രക്ഷിക്കും.