ഓടുന്ന സ്കൂള്‍ ബസിന്‍റെ ഫ്ലോർ തകര്‍ന്ന് റോഡിലേക്ക് വീണു; പിന്‍ചക്രം കയറി ആറുവയസുകാരിക്ക് ദാരുണാന്ത്യം

ലഖ്‌നൗ: ഉത്തർപ്രദേശിലെ കാസ്ഗഞ്ച് ജില്ലയിൽ ഓടുന്ന ബസിന്റെ ഫ്ളോര്‍ തകര്‍ന്ന് റോഡിലേക്ക് വീണ് ആറുവയസുകാരി മരിച്ചു. ബസിന്റെ പിൻചക്രം കയറിയാണ് മരണം.

അലിഗഡിലെ മൗണ്ട് ദേവ് ഇന്റർനാഷണൽ സ്‌കൂളിൽ യുകെജി വിദ്യാർഥിനിയായിരുന്നു അനന്യ കുമാരി. സ്കൂളിൽ നിന്ന് വീട്ടിലേക്ക് മടങ്ങുമ്പോൾ ആയിരുന്നു അപകടം സംഭവിച്ചത് എന്നാണ് റിപ്പോർട്ടുകൾ. പൊലീസ് പറയുന്നതനുസരിച്ച്, ബസിലെ ഫ്ളോര്‍ പെട്ടെന്ന് തകരുകയും ഒരു വിടവ് രൂപപ്പെടുകയും ചെയ്തു, ആ വിടവിലൂടെ അനന്യ റോഡിലേക്ക് വീഴുകയും ചെയ്തു. നിമിഷങ്ങൾക്കുള്ളിൽ ബസിന്റെ പിൻചക്രം അവരുടെ മേൽ കയറിയിറങ്ങി. വിദ്യാര്‍ഥിനി സംഭവസ്ഥലത്ത് തന്നെ മരിച്ചു.

അതേസമയം, അപകടമുണ്ടായിട്ടും ഡ്രൈവര്‍ വാഹനം നിര്‍ത്തിയില്ലെന്നും പൊലീസ് പറയുന്നു. ബസിലുണ്ടായിരുന്ന കുട്ടികളും റോഡിലൂടെ കടന്നുപോയവരും സംഭവത്തെക്കുറിച്ച് അറിയിച്ചതിനുശേഷം മാത്രമാണ് അദ്ദേഹം ബസ് നിർത്തിയത്. ബസിന് ഫിറ്റ്‌നസ് സർട്ടിഫിക്കറ്റോ ഇൻഷുറൻസോ ഇല്ലായിരുന്നുവെന്ന് പൊലീസ് പറഞ്ഞു. ഡ്രൈവറെ പൊലീസ് അറസ്റ്റ് ചെയ്തു. സംഭവത്തില്‍ അന്വേഷണം ആരംഭിച്ചിട്ടുണ്ടെന്നും ഉദ്യോഗസ്ഥര്‍ അറിയിച്ചു.

കഴിഞ്ഞയാഴ്ച നോയിഡയിലെ സ്വകാര്യ സ്കൂളിലെ അഞ്ച് വയസുള്ള വിദ്യാർഥി ഭക്ഷണവും വെള്ളവുമില്ലാതെ സ്കൂൾ ബസിനുള്ളിൽ ഏഴ് മണിക്കൂറോളം കുടുങ്ങിയിരിക്കുന്നു. കുട്ടി ബസിൽ ഉറങ്ങിപ്പോകുകയായിരുന്നുവെന്നും ഡ്രൈവറും കണ്ടക്ടറും വാഹനം പരിശോധിക്കാതെ സ്കൂളിൽ നിന്ന് 25 കിലോമീറ്റർ അകലെയുള്ള യാർഡിൽ പാർക്ക് ചെയ്തുവെന്നും മാതാപിതാക്കള്‍ ആരോപിക്കുന്നു.

യുകെജി വിദ്യാർഥിയായ കുട്ടി വ്യാഴാഴ്ച രാവിലെ മറ്റ് വിദ്യാർഥികൾക്കൊപ്പം ബസിൽ കയറിയിരുന്നു. ബസ് സ്കൂളിൽ എത്തിയപ്പോൾ മറ്റ് എല്ലാ വിദ്യാർഥികളും ഇറങ്ങി, പക്ഷേ കുട്ടി ഉറങ്ങിപ്പോയിരുന്നു. ഇക്കാര്യം ആരും ശ്രദ്ധിച്ചില്ല. ഡ്രൈവറും കണ്ടക്ടറും പോകുന്നതിനുമുമ്പ് ബസ് പരിശോധിക്കുകയും ചെയ്തില്ല. സ്കൂള്‍ വിട്ടിട്ടും കുട്ടി വീട്ടിലെത്താത്തതിനെ തുടര്‍ന്നാണ് മാതാപിതാക്കള്‍ അന്വേഷണം ആരംഭിച്ചത്. ഒടുവില്‍ നടത്തിയ പരിശോധനയിലാണ് കുട്ടിയെ സ്കൂള്‍ ബസിനുള്ളില്‍ കണ്ടെത്തിയത്.