ഒക്ടോബർ 1 മുതൽ റെയിൽവേയുടെ പ്രത്യേക പരിശോധന; യാത്രക്കാർ കരുതേണ്ട രേഖകൾ!

ഡൽഹി: ഒക്ടോബര്‍ 1 മുതൽ ടിക്കറ്റ് പരിശോധന ശക്തമാക്കുമെന്ന് ഇന്ത്യൻ റെയിൽവെ. ഉത്സവ സീസണിന് മുന്നോടിയായി യാത്രക്കാരുടെ തിരക്ക് കണക്കിലെടുത്താണ് ഒക്ടോബർ 31 വരെ പരിശോധന കര്‍ശനമാക്കുന്നത്. സെൻട്രൽ റെയിൽവേയുടെ നേതൃത്വത്തിലാണ് ഈ പ്രത്യേക പരിശോധന ഡ്രൈവ് നടക്കുക. ആനുകൂല്യങ്ങളോടെ (concessions) ബുക്ക് ചെയ്ത ടിക്കറ്റുകൾ, പ്രത്യേക റിസർവേഷൻ ക്വോട്ടകൾ, വിവിധ റെയിൽവേ പാസുകൾ എന്നിവയിലാണ് പ്രധാനമായും ശ്രദ്ധ കേന്ദ്രീകരിക്കുന്നത്.

ഇളവുകളിലോ നിർദ്ദിഷ്ട റിസർവേഷൻ ക്വാട്ടയിലോ യാത്ര ചെയ്യുന്ന യാത്രക്കാർ അവരുടെ യോഗ്യത തെളിയിക്കുന്നതിന് നിർദ്ദിഷ്ട തിരിച്ചറിയൽ രേഖ കൈവശം വയ്ക്കുന്നുണ്ടെന്ന് ടിക്കറ്റ് പരിശോധനാ ഉദ്യോഗസ്ഥർ ഉറപ്പാക്കുമെന്ന് സെൻട്രൽ റെയിൽവേയിലെ ചീഫ് പബ്ലിക് റിലേഷൻസ് ഓഫീസർ ഡോ. സ്വപ്‌നിൽ നില പറഞ്ഞു. ഒന്നിലധികം യാത്രക്കാർക്ക് ടിക്കറ്റ് ബുക്ക് ചെയ്യുമ്പോൾ ലിസ്റ്റിലുള്ള കുറഞ്ഞത് ഒരു യാത്രക്കാരനെങ്കിലും യഥാര്‍ഥ തിരിച്ചറിയൽ കാര്‍ഡ് കൈവശം വയ്ക്കണം. ആവശ്യമായ അസൽ രേഖകൾ കാണിക്കാൻ സാധിച്ചില്ലെങ്കിൽ, നിലവിലെ റെയിൽവേ നിയമങ്ങൾ അനുസരിച്ച് ആ ടിക്കറ്റിൽ യാത്ര ചെയ്യുന്ന മുഴുവൻ പേരെയും സാധുവായ ടിക്കറ്റില്ലാതെ യാത്ര ചെയ്യുന്നവരായി കണക്കാക്കുമെന്ന് അദ്ദേഹം കൂട്ടിച്ചേര്‍ത്തു.

നിർദിഷ്ട ഇളവുകളിലോ റിസർവേഷൻ ക്വോട്ടകളിലോ യാത്ര ചെയ്യുന്ന യാത്രക്കാർക്ക് ആവശ്യമായ അസൽ രേഖകളും ടിക്കറ്റ് പരിശോധകർ പരിശോധിക്കും.ഇ-പാസ് അല്ലെങ്കിൽ പി‌ടി‌ഒ ഉപയോഗിച്ച് യാത്ര ചെയ്യുന്ന യാത്രക്കാർ തിരിച്ചറിയൽ രേഖ കൈവശം വയ്ക്കണമെന്നും യാത്ര ആരംഭിക്കുന്നതിന് മുമ്പ് യാത്ര ചെയ്യാൻ നിർദ്ദിഷ്ട അധികാരിയുമായി ഇ-പാസ്/പി‌ടി‌ഒ യഥാസമയം കൈമാറ്റം ചെയ്തിട്ടുണ്ടെന്ന് ഉറപ്പാക്കണമെന്നും അദ്ദേഹം പറഞ്ഞു.

റിസര്‍വേഷനില്ലാതെ ജനറൽ ടിക്കറ്റിൽ യാത്ര ചെയ്യുന്ന യാത്രക്കാരുടെ ടിക്കറ്റ് പരിശോധിക്കുന്നതിന് പ്രത്യേക ശ്രദ്ധ നൽകുമെന്ന് സോണൽ റെയിൽവേ അറിയിച്ചു. ഈ പ്രത്യേക പരിശോധനാ ഡ്രൈവിൽ ടിക്കറ്റുകളുടെ കൃത്യത പരിശോധിക്കുന്നതിനായി ടിക്കറ്റ് പരിശോധകർക്ക് ആവശ്യമുള്ളിടത്തെല്ലാം ടിടിഇ ആപ്പ് ഉപയോഗിക്കാവുന്നതാണ്.

ടിക്കറ്റ് ബുക്കിംഗിലെയും റിസർവേഷൻ ആനുകൂല്യങ്ങളിലെയും ക്രമക്കേടുകൾ തടയുക, റെയിൽവെ പാസുകളും യാത്രാ ഇളവുകളും അർഹതയില്ലാത്തവർ വ്യാജമായി ഉപയോഗിക്കുന്നത് തടയുക, യാത്രക്കാരുടെ പക്കലുള്ള ടിക്കറ്റുകൾ യഥാര്‍ഥത്തിലുള്ളതാണോ അതോ വ്യാജമാണോ എന്ന് പരിശോധിക്കുക, ടിക്കറ്റെടുക്കാതെയുള്ള യാത്രകൾ ഒഴിവാക്കി റെയിൽവേയ്ക്ക് അർഹതപ്പെട്ട വരുമാനം ഉറപ്പാക്കുക തുടങ്ങിയ ലക്ഷ്യങ്ങളോടെയാണ് പരിശോധന ഡ്രൈവ് നടത്തുന്നത്.

റെയിൽവേ യാത്രക്കാർ കൈയിൽ കരുതേണ്ട രേഖകൾ

• ഇന്ത്യൻ തെരഞ്ഞെടുപ്പ് കമ്മീഷൻ നൽകിയ വോട്ടർ ഐഡന്റിറ്റി കാർഡ്
• പാസ്‌പോർട്ട്
• പാൻ കാർഡ്
• ഡ്രൈവിംഗ് ലൈസൻസ്
• കേന്ദ്ര/സംസ്ഥാന സർക്കാരുകൾ നൽകിയ സീരിയൽ നമ്പറുള്ള ഫോട്ടോ പതിച്ച തിരിച്ചറിയൽ കാർഡ്
• അംഗീകൃത സ്കൂളുകളും കോളജുകളും തങ്ങളുടെ വിദ്യാർഥികൾക്ക് നൽകുന്ന ഫോട്ടോ പതിച്ച ഐഡന്റിറ്റി കാർഡ്
• ദേശീയകൃത ബാങ്കുകളുടെ ഫോട്ടോ പതിച്ച പാസ്ബുക്ക്
• ബാങ്കുകൾ നൽകുന്ന ഫോട്ടോ പതിച്ച ലാമിനേറ്റ് ചെയ്ത ക്രെഡിറ്റ് കാർഡുകൾ
• ആധാർ കാർഡ്

ടിക്കറ്റില്ലാത്ത യാത്രയ്ക്കുള്ള പിഴ ഇരട്ടിയാക്കി

സാധുവായ ട്രെയിൻ ടിക്കറ്റില്ലാതെ യാത്ര ചെയ്യുന്ന യാത്രക്കാർക്കുള്ള പിഴ റെയിൽവെ കൂട്ടിയിട്ടുണ്ട്. കുറഞ്ഞ പിഴ തുക 2026 ജൂൺ 20 മുതൽ 500 രൂപയായി ഉയർത്തിയതായി റെയിൽവേ പ്രസ്താവനയിലൂടെ അറിയിച്ചു.പിഴ നടപടികൾ ഒഴിവാക്കാൻ യാത്രക്കാർ സാധുവായ ടിക്കറ്റുകൾ കൈവശം കരുതണമെന്നും റെയിൽവേ നിയമങ്ങൾ പാലിക്കണമെന്നും റെയിൽവേ വ്യക്തമാക്കി.