ഡൽഹിയിലെ തോൽവി: പഞ്ചാബ്​​ മുഖ്യമന്ത്രിയെയും എംഎൽഎമാരെയും വിളിപ്പിച്ച്​ കെജ്​രിവാൾ

ന്യൂഡൽഹി: ഡൽഹി നിയമസഭാ തെരഞ്ഞെടുപ്പിലെ പരാജയത്തിന്​ പിന്നാലെ പഞ്ചാബ്​ മുഖ്യമന്ത്രിയെയും മന്ത്രിമാരെയും പാർട്ടി എംഎൽഎമാരെയും ഡൽഹിയിലേക്ക്​ വിളിപ്പിച്ച്​ ആം ആദ്​മി പാർട്ടി ദേശീയ കൺവീനർ അരവിന്ദ്​ കെജ്​രിവാൾ. ചൊവ്വാഴ്ച കെജ്​രിവാളിന്‍റെ നേതൃത്വത്തിൽ ഡൽഹിയിൽ യോഗം ചേരും.

പഞ്ചാബിലെ നേതാക്കളിൽ ചിലർ ബിജെപിയടക്കമുള്ള മറ്റു പാർട്ടികളുമായി ബന്ധപ്പെടാൻ സാധ്യതയുണ്ടെന്ന വിവരത്തിന്‍റെ അടിസ്ഥാനത്തിലാണ്​ കൂടിക്കാഴ്ചയെന്നാണ്​ പാർട്ടി വൃത്തങ്ങൾ സൂചിപ്പിക്കുന്നത്​. ആം ആദ്​മി പാർട്ടി എംഎൽഎമാർക്ക്​ പിറകെ ബിജെപിയുണ്ടെന്നാണ്​ വിവരം. നേരത്തെ ബിജെപി തങ്ങളുടെ എംഎൽഎമാരെ ലക്ഷ്യമിട്ട്​ ‘ഓപറേഷൻ താമര’ നടത്തുകയാണെന്ന്​ പാർട്ടി ആരോപിച്ചിരുന്നു.

അതേസമയം, ചൊവ്വാഴ്ചത്തെ യോഗത്തിൽ അസ്വാഭാവികത ഒന്നുമില്ലെന്ന്​ പാർട്ടി പഞ്ചാബ്​ പ്രസിഡന്‍റ്​ അമൻ അറോറ പറഞ്ഞു. ‘ഇതൊരു പൊതുയോഗമാണ്​. ഡൽഹി തെരഞ്ഞെടുപ്പിന്​ ശേഷം പാർട്ടി മേധാവി ഞങ്ങളെ എല്ലാവരെയും അഭിസംബോധന ചെയ്യും. അല്ലാതെ ഞങ്ങൾക്ക്​ ആരെയും പേടിയില്ല. ഞങ്ങൾ ഒറ്റക്കെട്ടാണ്​. ഇത്തരം യോഗങ്ങൾ നേരത്തെയും നടന്നിട്ടുണ്ട്​. ഇതിൽ പുതുതായി ഒന്നുമില്ല. കെജ്​രിവാൾ വള​രെക്കാലമായി ഞങ്ങളെ അഭിസംബോധന ചെയ്യാത്തതിനാൽ അദ്ദേഹത്തെ കാണാൻ ഞങ്ങൾ പോകും’ - അറോറ പറഞ്ഞു.

എന്നാൽ, ഡൽഹിയിലെ തോൽവിയുടെ സാഹചര്യത്തിലുള്ള പൊതുയോഗമാണ്​ ചൊവ്വാഴ്ചത്തേതെന്ന്​ പാർട്ടി വൃത്തങ്ങൾ ചൂണ്ടിക്കാട്ടുന്നു. പാർട്ടി ഇപ്പോൾ പഞ്ചാബിൽ ശ്രദ്ധ കേന്ദ്രീകരിക്കുകയാണ്​. എല്ലാവരെയും ഒരുമിച്ച്​ നിർത്താനുള്ള ശ്രമമാണ്​ നടക്കുന്നത്​​. തോൽവികളിൽ നേതാക്കൻമാർ തളരുമ്പോൾ കെജ്​രിവാളിന്‍റെ സംസാരമാണ്​ ഊർജം നൽകാറ്​​. എംഎൽഎമാരെ ബിജെപി ലക്ഷ്യമിടുന്നില്ലെന്ന്​ ഉറപ്പാക്കേണ്ടതുണ്ട്​. കഴിഞ്ഞ കാലങ്ങളിൽ അവർ എല്ലാം പരീക്ഷിച്ചിട്ടുണ്ട്​. ചില എംഎൽഎമാർക്ക്​ നേരെ ഇഡിയുടെ റെയ്​ഡ്​ വരെയുണ്ടായി. സമ്മർദം എപ്പോഴുമുണ്ട്​. എന്നിരുന്നാലും തങ്ങളുടെ എംഎൽഎമാരെ എപ്പോഴും കൂടെനിർത്താൻ കഴിഞ്ഞെന്നും പാർട്ടി വൃത്തങ്ങൾ ചൂണ്ടിക്കാട്ടുന്നു.

മുൻകാലങ്ങളിൽനിന്ന്​ വ്യതിചലിച്ചതിനാൽ ‘ആം ആദ്​മി’ ജീവിതശൈലിയിലേക്ക്​​ തിരിച്ചുവരണമെന്ന്​ മുതിർന്ന നേതൃത്വത്തോട് പലരും​ ശക്​തമായി ആവശ്യപ്പെടുന്നുണ്ട്​. കെജ്​രിവാളിന്‍റെ ഔദ്യോഗിക വസതിയുടെ ആഡംബര രൂപമാറ്റം യഥാർഥത്തിൽ പാർട്ടിക്ക്​ തിരിച്ചടിയായിട്ടുണ്ട്​. നമ്മൾ ഒരു സാധാരണക്കാരൻ ആയിരിക്കണമെന്നാണ്​​ ജനങ്ങളുടെ ആഗ്രഹം. ആ കാരണത്താലാണ്​ അവർ ആം ആദ്​മി പാർട്ടിയെ തെരഞ്ഞെടുത്തത്​. എന്നാൽ, നമ്മൾ പ്രത്യയശാസ്ത്രത്തിൽനിന്ന്​ വ്യതിചലിച്ചു. ഇപ്പോൾ പല നേതാക്കളും സാധാരണക്കാരന്‍റെ ജീവിതശൈലിയിലേക്ക്​ മടങ്ങാൻ ആഗ്രഹിക്കുന്നുണ്ട്​. നാളെ നടക്കുന്ന യോഗത്തിൽ ഇക്കാര്യം​ ഉന്നയിക്കുമെന്നും പാർട്ടി വൃത്തങ്ങളെ ഉദ്ധരിച്ചുകൊണ്ട്​ ദേശീയ മാധ്യമങ്ങൾ റിപ്പോർട്ട്​ ചെയ്യുന്നു.