‘കുംഭമേള അർഥശൂന്യം’; വിവാദത്തിന്​ തിരി​കൊളുത്തി ലാലു പ്രസാദ്​

ന്യൂഡൽഹി: മഹാകുംഭമേള അർഥശൂന്യമെന്ന്​​ വിശേഷിപ്പിച്ച ബിഹാർ മുൻ മുഖ്യമന്ത്രി ലാലു പ്രസാദ് യാദവിന്‍റെ പ്രസ്താവന വിവാദത്തിന് തിരികൊളുത്തി. ന്യൂഡൽഹി റെയിൽവേ സ്റ്റേഷൻ ദുരന്തത്തിന്‍റെ പശ്ചാത്തലത്തിലായിരുന്നു ലാലുവിന്‍റെ പ്രതികരണം. ബിജെപി നേതൃത്വത്തിലുള്ള കേന്ദ്ര സർക്കാരിനെതിരെ ആഞ്ഞടിച്ച അദ്ദേഹം, റെയിൽവേ മന്ത്രി രാജിവെക്കണമെന്ന്​ ആവശ്യപ്പെട്ടു.

‘തിക്കിലും തിരക്കിലുംപെട്ട്​ 18 പേർ മരിച്ച സംഭവം വളരെ അസ്വസ്ഥത ഉളവാക്കുന്നതാണ്. കേന്ദ്ര സർക്കാർ നടത്തിയ അപര്യാപ്തമായ ക്രമീകരണങ്ങളാണ് ഇത് തുറന്നുകാട്ടുന്നത്. റെയിൽവേ മന്ത്രി രാജിവയ്ക്കണം. ഇത് റെയിൽവേയുടെ പൂർണ പരാജയമാണ്’ -മുൻ കേന്ദ്ര റെയിൽവേ മന്ത്രി കൂടിയായ ലാലു പ്രസാദ്​ പറഞ്ഞു.

​ഉത്തർ പ്രദേശിലെ പ്രയാഗ്​ രാജിൽ നടക്കുന്ന കുംഭമേളയിൽ പ​ങ്കെടുക്കാൻ വേണ്ടിയാണ്​ വലിയ ജനക്കൂട്ടം ഡൽഹി റെയിൽവേ സ്​റ്റേഷനിലെത്തിയത്​. പ്രയാഗ്‌രാജിൽ നടക്കുന്ന കുംഭമേളയ്ക്കായി വലിയ ജനക്കൂട്ടം എത്തുന്നതിനെക്കുറിച്ച് ചോദിച്ചപ്പോൾ, ‘കുംഭമേളയ്ക്ക് അർഥമില്ല, അത് വെറും അർഥശൂന്യമാണ്’ -എന്നായിരുന്നു ലാലുവിന്‍റെ മറുപടി. ഇതിനെതിരെ ബിഹാർ ബിജെപി വക്താവ് മനോജ് ശർമ രംഗത്തുവന്നു. ഹിന്ദു മതത്തോടുള്ള ആർജെഡിയുടെ മനോഭാവമാണ്​ തുറന്നുകാട്ടുന്നതെന്ന്​ അദ്ദേഹം പറഞ്ഞു.

‘ലാലു പ്രീണന രാഷ്ട്രീയം കളിക്കുന്നതിനാലാണ് ഇത്തരം പ്രസ്താവനകൾ നടത്തുന്നത്. ആർജെഡി നേതാക്കൾ എല്ലായ്‌പ്പോഴും ഹിന്ദുക്കളുടെ മതവികാരങ്ങളെ അവഹേളിച്ചിട്ടുണ്ട്​. മഹാകുംഭമേളയെ അർഥശൂന്യമെന്ന് വിശേഷിപ്പിച്ച ലാലു പ്രസാദിന്‍റെ പുതിയ പ്രസ്താവന ഹിന്ദു മതത്തോടുള്ള പാർട്ടിയുടെ മനോഭാവത്തെ തുറന്നുകാട്ടുന്നതാണ്​’ -മനോജ്​ ശർമ പറഞ്ഞു.