2026ലെ എൻഐടി ട്രിച്ചി പ്രഗ്യാന്‍ ഫെസ്റ്റിവല്‍ ഫെബ്രുവരി 19 മുതൽ 22 വരെ

തിരുച്ചിറപ്പള്ളി: നാഷനൽ ഇൻസ്റ്റിറ്റ്യൂട്ട് ഓഫ് ടെക്നോളജി തിരുച്ചിറപ്പള്ളിയുടെ (NIT-Trichy) വാർഷിക അന്താരാഷ്ട്ര ടെക്നോ-മാനേജീരിയൽ ഫെസ്റ്റായ പ്രഗ്യാന്റെ 22-ാമത് പതിപ്പ് ഫെബ്രുവരി 19 മുതൽ 22 വരെ നടക്കും. അനാക്രോണിയ (Anachronia) എന്ന കേന്ദ്രപ്രമേയത്തെ ആസ്പദമാക്കിയാണ് 2026ലെ എഡിഷൻ സംഘടിപ്പിക്കുന്നത്.

വൈവിധ്യമാർന്ന പരിപാടികൾ, വർക്ക്ഷോപ്പുകൾ, പ്രദർശനങ്ങൾ, പ്രഭാഷണങ്ങൾ, സംവാദങ്ങൾ എന്നിവ ഫെസ്റ്റിന്റെ ഭാഗമായി ഉണ്ടാകും. മേളയിലെ പ്രധാന ആകർഷണങ്ങളിലൊന്നാണ് 'ഓപ്പൺഹൗസ്' (OpenHouse). വിവിധ ഡിപാര്‍ടെമെന്റുകളില്‍ നിന്നുള്ള വിദ്യാർത്ഥികളും ടെക്നിക്കൽ ക്ലബ്ബുകളും തങ്ങളുടെ നൂതനമായ പ്രോജക്റ്റുകൾ അവതരിപ്പിക്കുന്ന രണ്ട് ദിവസത്തെ പ്രദർശന പരിപാടിയാണിത്. നിക്ഷേപകര്‍ക്കുള്‍പ്പെടെ ഭാവിയില്‍ മുതല്‍ക്കൂട്ടാകുന്ന ഈ പ്രദര്‍ശന പരിപാടി വാര്‍ത്തകളില്‍ ഇടം നേടിയിരുന്നു.

നൂതന ആശയങ്ങൾക്ക് മുൻഗണന നൽകിക്കൊണ്ട് ദേശീയതലത്തിലുള്ള സാങ്കേതിക മത്സരമായ 'ഇൻജീനിയം' (Ingenium), എൻഐടി തിരുച്ചിറപ്പളളി വിദ്യാർത്ഥികൾക്കായുള്ള പ്രഗ്യാനിന്റെ പ്രധാന ഹാർഡ്‌വെയർ ഹാക്കത്തോണായ 'സംഗം' (Sangam) എന്നിവയും നടക്കും. ലിനക്സ്, സാംസങ്, മെഴ്സിഡസ് തുടങ്ങിയ പ്രമുഖ സ്ഥാപനങ്ങളുമായി സഹകരിച്ച് വർക്ക്‌ഷോപ്പുകളും അരങ്ങേറും. വളർന്നുവരുന്ന പുത്തൻ സാങ്കേതികവിദ്യകളിൽ നേരിട്ടുള്ള പ്രായോഗിക പരിചയം ഇതിലൂടെ ലഭ്യമാകും. പ്രമുഖ വ്യവസായ പ്രമുഖർ നയിക്കുന്ന ക്ലാസുകളും ഈ പരിപാടിയുടെ ഭാഗമായി ക്രമീകരിച്ചിട്ടുണ്ട്.

രാജ്യത്തെ പ്രമുഖ രാഷ്ട്രീയ നേതാക്കളെ അണിനിരത്തിയുള്ള ക്രോസ്ഫയറും ഫെസ്റ്റിന്റെ ഭാഗമായി അരങ്ങേറും. സമകാലിക സാമൂഹിക-സാമ്പത്തിക വിഷയങ്ങൾ ചർച്ച ചെയ്യുന്ന സംവാദ പരിപാടിയാണിത്. ഫെസ്റ്റിനോടൊപ്പം തന്നെ പ്രഗ്യാൻ ബ്ലോഗ്, പോഡ്‌കാസ്റ്റ് തുടങ്ങിയ പ്രചാരണ പരിപാടികളും ഒരുക്കിയിട്ടുണ്ട്.