പൊലീസുകാർ വീട്ടിൽക്കയറി പീഡിപ്പിച്ചു; യു.പിയിൽ രണ്ട് ഉദ്യോഗസ്ഥർക്കെതിരെ കേസ്

കാൺപൂർ: ഉത്തർപ്രദേശിൽ പൊലീസുകാർ പീഡിപ്പിച്ചെന്ന് യുവതിയുടെ പരാതി. കാൺപൂരിലെ നൗബസ്ത പൊലീസ് സ്റ്റേഷനിലെ രണ്ട് പൊലീസുകാർക്കെതിരെയാണ് യുവതിയുടെ പരാതി. വീട്ടിൽ അതിക്രമിച്ചു കയറി പീഡിപ്പിച്ചു എന്ന പരാതിയിൽ രണ്ട് ഹെഡ് കോൺസ്റ്റബിൾമാർക്കെതിരെ കേസെടുത്തു.

ഹരി ഓം, ഷുഷാന്ത് എന്നീ പൊലീസ് ഉദ്യോ​ഗസ്ഥർക്കെതിരെയാണ് എഫ്.ഐ.ആർ രജിസ്റ്റർ ചെയ്തത്. ഇരു പൊലീസുകാരും തന്റെ വീട്ടിൽ അതിക്രമിച്ചു കയറുകയും കടന്നുപിടിച്ച് കീഴ്പ്പെടുത്തിയ ശേഷം പീഡിപ്പിക്കുകയായിരുന്നു എന്നുമാണ് യുവതിയുടെ പരാതി.

നൗബസ്ത പൊലീസ് സ്റ്റേഷൻ പരിധിയിലെ ലാൽപൂർ ഇന്റർസെക്ഷനിലെ ഡയൽ 112-ൽ ഡ്യൂട്ടിയിലുണ്ടായിരുന്ന രണ്ട് പൊലീസുകാർ ബലമായി വീട്ടിൽ കയറി പീഡിപ്പിച്ചതായി യുവതി അറിയിച്ചു. യുവതി പോലീസുകാരെ തള്ളിമാറ്റി ഓടാൻ ശ്രമിച്ചു. എന്നാൽ അവർ അവളെ പിന്തുടരുകയായിരുന്നു- സൗത്ത് അഡീഷനൽ ഡി.സി.പി അങ്കിത ശർമ പറഞ്ഞു.

പൊലീസുകാർ മദ്യലഹരിയിലായിരുന്നെന്നും ഇരയായ യുവതി ആരോപിച്ചു. യുവതിയുടെ പരാതി പ്രകാരം എഫ്.ഐ.ആർ രജിസ്റ്റർ ചെയ്തിട്ടുണ്ടെന്ന് അറിയിച്ച പൊലീസ്, ബന്ധപ്പെട്ട വകുപ്പുകൾ പ്രകാരം നിയമനടപടികൾ സ്വീകരിക്കുമെന്നും കൂട്ടിച്ചേർത്തു.