ട്രെയിനിന്റെ എഞ്ചിൻ ഒരു സംസ്ഥാനത്ത്, ബാക്കി ഭാഗം വേറൊരു സംസ്ഥാനത്ത്! ഈ സ്റ്റേഷനിലെത്തിയാൽ ആരും ഒന്ന് അമ്പരക്കും!

ഭവാനി മണ്ടി: രാജ്യത്ത് ദിവസേന ലക്ഷക്കണക്കിന് ആളുകളാണ് ട്രെയിനിൽ യാത്ര ചെയ്യുന്നത്. ഇന്ത്യയിൽ ചെറുതും വലുതുമായ നിരവധി റെയിൽവേ സ്റ്റേഷനുകൾ ഉണ്ട്. എന്നാൽ ഒരു റെയിൽവേ സ്റ്റേഷനിൽ നിൽക്കുമ്പോൾ തന്നെ നിങ്ങൾക്ക് ഒരേസമയം രണ്ട് സംസ്ഥാനങ്ങളിൽ നിൽക്കാൻ സാധിക്കുമെന്ന് പറഞ്ഞാൽ വിശ്വസിക്കുമോ? അതെ, കേൾക്കുമ്പോൾ അതിശയകരമായി തോന്നാമെങ്കിലും രാജസ്ഥാനിൽ അങ്ങനെയൊരു റെയിൽവേ സ്റ്റേഷൻ ഉണ്ട്.

ഭവാനി മണ്ടി: അതിർത്തി പങ്കിടുന്ന അത്ഭുത സ്റ്റേഷൻ

രാജസ്ഥാനിലെ ജലവാർ ജില്ലയിലാണ് 'ഭവാനി മണ്ടി' എന്ന ഈ പ്രത്യേക റെയിൽവേ സ്റ്റേഷൻ സ്ഥിതി ചെയ്യുന്നത്. ഡൽഹി-മുംബൈ റെയിൽവേ ലൈനിൽ വരുന്ന ഈ സ്റ്റേഷന്റെ ഏറ്റവും വലിയ പ്രത്യേകത ഇത് രാജസ്ഥാൻ-മധ്യപ്രദേശ് അതിർത്തിയിലാണ് സ്ഥിതി ചെയ്യുന്നത് എന്നതാണ്. ഇവിടെ ഒരു ട്രെയിൻ വന്നു നിന്നാൽ, അതിന്റെ എഞ്ചിൻ രാജസ്ഥാനിലും ഗാർഡിന്റെ കോച്ച് അയൽ സംസ്ഥാനമായ മധ്യപ്രദേശിലും ആയിരിക്കും!

ടിക്കറ്റ് കൗണ്ടർ രാജസ്ഥാനിൽ, യാത്രക്കാർ മധ്യപ്രദേശിൽ നിന്നും!

സ്റ്റേഷന്റെ ഒരു ഭാഗത്ത് രാജസ്ഥാന്റെ ബോർഡും മറുഭാഗത്ത് മധ്യപ്രദേശിന്റെ ബോർഡും കാണാൻ സാധിക്കും. സ്റ്റേഷന്റെ ഭൂമിശാസ്ത്രപരമായ കിടപ്പ് കാരണം രസകരമായ പല കാര്യങ്ങളും ഇവിടെ നടക്കുന്നുണ്ട്. ഇവിടെ ടിക്കറ്റ് എടുക്കാൻ വരുന്നവരിൽ ഭൂരിഭാഗം പേരും മധ്യപ്രദേശ് നിവാസികളാണ്. തങ്ങൾ മധ്യപ്രദേശിൽ നിന്നുള്ളവരാണെന്ന് പറഞ്ഞാണ് അവർ ടിക്കറ്റ് ബുക്ക് ചെയ്യാൻ വരുന്നത്, എന്നാൽ അവർക്കുള്ള ടിക്കറ്റ് കൗണ്ടർ സ്ഥിതി ചെയ്യുന്നതാകട്ടെ രാജസ്ഥാനിലുമാണ്!

വീടുകളുടെ മുൻവാതിൽ ഒരു സംസ്ഥാനത്ത്, പിൻവാതിൽ മറ്റൊന്നിൽ!

റെയിൽവേ സ്റ്റേഷൻ മാത്രമല്ല, ഈ പ്രദേശത്തെ പല വീടുകൾക്കും ഇതേ പ്രത്യേകതയുണ്ട്. ഇവിടുത്തെ വീടുകളുടെ മുൻവാതിൽ തുറക്കുന്നത് മധ്യപ്രദേശിലെ ഭൈൻസോദാമണ്ടി എന്ന ടൗണിലേക്കാണെങ്കിൽ, പിൻവാതിൽ തുറക്കുന്നത് രാജസ്ഥാനിലെ ഭവാനി മണ്ടിയിലേക്കാണ്.

പൊലീസിനെ വട്ടം കറക്കുന്ന കുറ്റവാളികൾ

രണ്ട് സംസ്ഥാനങ്ങളുടെ അതിർത്തിയിലുള്ള ഈ പ്രദേശത്തിന്റെ ഭൂമിശാസ്ത്രപരമായ പ്രത്യേകതകൾ പൊലീസിന് ചിലപ്പോഴൊക്കെ വലിയ തലവേദന സൃഷ്ടിക്കാറുണ്ട്. ഈ അനുകൂല സാഹചര്യം മുതലെടുത്ത് മയക്കുമരുന്ന് കടത്തുകാരും മറ്റ് ക്രിമിനലുകളും പൊലീസിനെ എളുപ്പത്തിൽ വെട്ടിച്ച് ഒരു സംസ്ഥാനത്ത് നിന്നും മറ്റൊരു സംസ്ഥാനത്തേക്ക് കടന്നുകളയാറുണ്ട്.

ഈ പ്രദേശത്തിന്റെ സവിശേഷതകൾ പ്രമേയമാക്കി 2018ൽ 'ഭവാനി മണ്ടി ടേസൻ' എന്ന പേരിൽ ഒരു ബോളിവുഡ് കോമഡി സിനിമയും പുറത്തിറങ്ങിയിട്ടുണ്ട്. ഇന്ത്യയിലെ മറ്റെങ്ങും കാണാൻ കഴിയാത്ത അസാധാരണമായ ഈ റെയിൽവേ സ്റ്റേഷനും പ്രദേശവും ആരെയും അതിശയിപ്പിക്കുന്ന ഒന്നാണ്.