ധർമേന്ദ്ര പ്രധാന്റെ രാജിയില്ലാതെ നിരാഹാരം അവസാനിപ്പിച്ചത് എന്തുകൊണ്ട്?; പ്രതികരിച്ച് സോനം വാങ്ചുക്

ന്യൂഡൽഹി: പരീക്ഷാ ക്രമക്കേടുകൾക്കെതിരെ സമരം ചെയ്ത വിദ്യാർഥികൾക്കും പ്രതിഷേധക്കാർക്കും എതിരെ കേന്ദ്ര സർക്കാർ നിയമനടപടികൾ സ്വീകരിക്കുന്നത് തടയുന്നതിനാണ് വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജിയില്ലാതെ താൻ 26 ദിവസം നീണ്ട ഉപവാസം അവസാനിപ്പിച്ചതെന്ന് പ്രമുഖ സാമൂഹിക പ്രവർത്തകൻ സോനം വാങ്ചുക്. കഴിഞ്ഞ തിങ്കളാഴ്ച നടന്ന സമരം ഉൾപ്പെടെയുള്ള പ്രതിഷേധങ്ങളിൽ പങ്കെടുത്തവർക്കെതിരെ കേസെടുക്കില്ലെന്ന് കേന്ദ്ര സർക്കാർ എഴുതി ഒപ്പിട്ടു നൽകിയ ഉറപ്പിന്റെ അടിസ്ഥാനത്തിലാണ് താൻ സമരം അവസാനിപ്പിച്ചതെന്ന് അദ്ദേഹം വ്യക്തമാക്കി. ഇതിനുപുറമെ, പരീക്ഷാ പരിഷ്‌കാരങ്ങളെക്കുറിച്ചും ചോദ്യപേപ്പർ ചോർച്ചയെക്കുറിച്ചും പാർലമെന്റിൽ വിശദമായ ചർച്ച നടത്താമെന്നും, നീറ്റ് ചോദ്യപേപ്പർ ചോർച്ചയെ തുടർന്ന് ആത്മഹത്യ ചെയ്ത വിദ്യാർഥികളുടെ കുടുംബങ്ങൾക്ക് നഷ്ടപരിഹാരം നൽകുന്നത് പരിഗണിക്കാമെന്നും കേന്ദ്ര സർക്കാർ ഉറപ്പുനൽകിയിട്ടുണ്ട്.

കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെടാതെ ഉപവാസം അവസാനിപ്പിച്ചതിനെതിരെ ഉയർന്ന വിമർശനങ്ങൾക്ക്, വെള്ളിയാഴ്ച വൈകിട്ട് യുട്യൂബിൽ പങ്കുവെച്ച 24 മിനിറ്റ് ദൈർഘ്യമുള്ള വീഡിയോയിലൂടെയാണ് വാങ്ചുക് മറുപടി നൽകിയത്.

''മന്ത്രിയുടെ രാജി തീർച്ചയായും ഒരു വിഷയമായിരുന്നു. എന്നാൽ, കേന്ദ്ര സർക്കാരുമായുള്ള ചർച്ചകളിൽ താൻ അതിന് മുൻഗണന നൽകിയില്ല. പ്രതിഷേധത്തിൽ പങ്കെടുത്ത വിദ്യാർഥികൾക്ക് എതിരെ നിയമനടപടികളോ എഫ്‌ഐആറോ ഉണ്ടാകാതിരിക്കുക എന്നതായിരുന്നു എന്റെ പ്രധാന ലക്ഷ്യം''- ആശുപത്രി കിടക്കയിൽ നിന്ന് റെക്കോർഡ് ചെയ്ത വീഡിയോയിൽ അദ്ദേഹം പറഞ്ഞു.

മന്ത്രിയുടെ രാജി കേന്ദ്ര സർക്കാരിനെ സംബന്ധിച്ച് ലളിതമായ കാര്യമാണെന്നും എന്നാൽ രാജി നീട്ടിക്കൊണ്ടുപോകുന്നതിലൂടെ സർക്കാരിന്റെ പ്രതിച്ഛായ രാജ്യവ്യാപകമായി തകരുകയാണെന്നും അദ്ദേഹം കൂട്ടിച്ചേർത്തു. ചർച്ച വേളയിൽ കേന്ദ്ര മന്ത്രിമാരുമായി രാജി വിഷയം സംസാരിച്ചിരുന്നതായും, തങ്ങൾക്ക് കുറച്ചുകൂടി സമയം വേണമെന്നാണ് അവർ ആവശ്യപ്പെട്ടതെന്നും വാങ്ചുക് വ്യക്തമാക്കി. സർക്കാർ അധികകാലം പിടിച്ച് നിൽക്കില്ലെന്നും വൈകാതെ രാജി നൽകേണ്ടി വരുമെന്നും ഉറപ്പുള്ളതിനാലാണ് ആ ആവശ്യത്തിൽ കൂടുതൽ സമ്മർദം ചെലുത്താതിരുന്നതെന്ന് അദ്ദേഹം പറഞ്ഞു.

കേന്ദ്ര സർക്കാരുമായി രഹസ്യ ധാരണയിലാണെന്ന ആരോപണങ്ങൾ വാങ്ചുക് പൂർണമായും തള്ളി. തനിക്ക് എന്തെങ്കിലും കരാറുകളിൽ എത്തണമായിരുന്നുവെങ്കിൽ ഡൽഹിയിലെ കടുത്ത ചൂടിൽ 26 ദിവസം പട്ടിണി കിടക്കേണ്ടതുണ്ടോ? എയർ കണ്ടീഷൻ ചെയ്ത മുറിയിലിരുന്ന് തനിക്ക് അത് ചെയ്തുകൂടായിരുന്നോ എന്ന് അദ്ദേഹം ചോദിച്ചു.

ഡൽഹിയിലെ സാഹചര്യം സംഘർഷഭരിതമായിരുന്നെന്നും, പ്രതിഷേധക്കാർക്ക് നേരെ വലിയതോതിലുള്ള പൊലീസ് നടപടി ഉണ്ടാകുമെന്ന് ഭയപ്പെട്ടിരുന്നതായും അദ്ദേഹം പറഞ്ഞു. ലഡാക്കിൽ യുവാക്കൾക്ക് നേരെ പൊലീസ് വെടിവെപ്പുണ്ടായ മുൻ സംഭവങ്ങൾ താൻ ഓർത്തുപോയെന്നും, സമരം അവസാനിപ്പിച്ച് സമാധാനത്തിന് ആഹ്വാനം ചെയ്തതിലൂടെ സംഘർഷാവസ്ഥ ഒഴിവാക്കാൻ സാധിച്ചെന്നും അദ്ദേഹം വ്യക്തമാക്കി.

കേന്ദ്ര മന്ത്രിമാരായ ജെ.പി നഡ്ഡ, ജിതേന്ദ്ര സിങ് എന്നിവരുടെ സാന്നിധ്യത്തിൽ ഉപവാസം അവസാനിപ്പിച്ചതിനെയും അദ്ദേഹം ന്യായീകരിച്ചു. ഗുഡ്ഗാവിലെ മേദാന്ത ആശുപത്രിയിലെത്തിയാണ് മന്ത്രിമാർ തന്നോട് സംസാരിച്ചത്. വിദ്യാർഥികൾക്കെതിരെ കേസെടുക്കില്ലെന്ന ഉറപ്പ് എഴുതി നൽകാൻ കേന്ദ്രം ആദ്യം തയ്യാറായിരുന്നില്ലെന്നും, വാക്കാൽ ഉറപ്പ് മാത്രമാണ് നൽകിയതെന്നും വാങ്ചുക് പറഞ്ഞു. എന്നാൽ താൻ കർശന നിലപാട് എടുത്തതോടെയാണ് എഴുതി ഒപ്പിട്ട ഉറപ്പ് നൽകാൻ സർക്കാർ തയ്യാറായതെന്നും അദ്ദേഹം കൂട്ടിച്ചേർത്തു.

സഹപ്രവർത്തകർക്കും വിദ്യാർഥികൾക്കും എംപിമാർക്കും സമരം അവസാനിപ്പിക്കുന്ന സമയത്ത് തന്റെ ഒപ്പം നിൽക്കാൻ സാധിക്കാത്തതിലുള്ള വിഷമവും സോനം വാങ്ചുക് പങ്കുവെച്ചു. അതേസമയം, കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ടുള്ള സമരം തുടരുമെന്നും അദ്ദേഹം അറിയിച്ചു.

AFTER 26 DAYS OF HUNGER DO I NEED TO PROVE MY SINCERITY !!!
Do please watch and help spread the word. Find the full 22 minutes video on my YouTube Channel: Sonam Wangchuk pic.twitter.com/6CO3tjZsSD

— Sonam Wangchuk (@Wangchuk66) July 24, 2026