'രാഷ്ട്രീയ പാര്‍ട്ടികൾ നൽകുന്ന പണം നിരസിക്കണ്ട, അതുകൊണ്ട് ശൗചാലയങ്ങൾ നിര്‍മിക്കാം'; ലാത്തൂരിലെ ജനങ്ങളോട് ഉവൈസി

ലാത്തൂര്‍: തെരഞ്ഞെടുപ്പ് സമയത്ത് രാഷ്ട്രീയ പാര്‍ട്ടികൾ വിതരണം ചെയ്യുന്ന പണം വോട്ടര്‍മാര്‍ക്ക് സ്വീകരിക്കാമെന്നും അത് അധാര്‍മികമാണെന്ന് തോന്നിയാൽ ശൗചാലയങ്ങൾ നിര്‍മിക്കാൻ ഉപയോഗിക്കാമെന്നും എഐഎംഐഎം നേതാവ് അസദുദ്ദീൻ ഉവൈസി. മഹാരാഷ്ട്രയിലെ ലാത്തൂരിൽ തദ്ദേശ തെരഞ്ഞെടുപ്പിന് മുന്നോടിയായുള്ള റാലിയിൽ സംസാരിക്കുകയായിരുന്നു അദ്ദേഹം.

മോദി സര്‍ക്കാരിന്‍റെ വിദേശനയത്തെ കടന്നാക്രമിച്ച ഉവൈസി വഖഫ് ഭേദഗതി നിയമത്തെയും വിമര്‍ശിച്ചു. ''എഐഎംഐഎം മത്സരരംഗത്തേക്ക് വന്നതിനു ശേഷമാണ് എതിരാളികളായ രാഷ്ട്രീയ പാർട്ടികൾ വോട്ടർമാർക്കിടയിൽ പണം വിതരണം ചെയ്യാൻ തുടങ്ങിയത്. ഞങ്ങൾ സ്ഥാനാർഥികളെ നിർത്തിയില്ലായിരുന്നുവെങ്കിൽ പണം വിതരണം ചെയ്യില്ലായിരുന്നു.... പണം വാങ്ങുക, അത് അധാർമികവും നിയമവിരുദ്ധവും ആണെന്ന് നിങ്ങൾക്ക് തോന്നുന്നുവെങ്കിൽ, അത് ടോയ്‌ലറ്റുകൾ നിർമിക്കാൻ ഉപയോഗിക്കുക" അദ്ദേഹം പറഞ്ഞു.

ന്യൂനപക്ഷങ്ങൾ ഒഴികെയുള്ള എല്ലാ സമുദായങ്ങൾക്കും രാഷ്ട്രീയ അധികാരം ഉണ്ടെന്ന പൊതുധാരണ തള്ളിക്കൊണ്ട് ശക്തമായ രാഷ്ട്രീയ നേതൃത്വം കെട്ടിപ്പടുക്കാൻ ഉവൈസി മുസ്‍ലിംകളോട് ആഹ്വാനം ചെയ്തു. ദരിദ്രരിൽ വലിയൊരു വിഭാഗം ദലിതരും മുസ്‍ലിംകളുമാണ്. എന്നിട്ടും വികസനം അവരുടെ പ്രദേശങ്ങളിൽ എത്തിയിട്ടില്ലെന്നും അദ്ദേഹം കൂട്ടിച്ചേർത്തു.

"ബിജെപി ദേശീയതയെക്കുറിച്ച് സംസാരിക്കുന്നു. പക്ഷേ കർഷകർ മരിക്കുന്നു, യുവാക്കൾ തൊഴിലില്ലാത്തവരാണ്, അവർ സംസാരിക്കുന്നത് ലവ് ജിഹാദിനെക്കുറിച്ചാണ്. മോദി തീരുമാനങ്ങൾ എടുക്കുന്നത് തന്നെ സന്തോഷിപ്പിക്കാൻ വേണ്ടിയാണെന്ന് പറയുന്ന യുഎസ് പ്രസിഡന്‍റ് ഡൊണാൾഡ് ട്രംപിനെക്കുറിച്ച് പ്രധാനമന്ത്രി നരേന്ദ്ര മോദിയും ബിജെപിയും മൗനം പാലിക്കുകയാണെന്നും ഉവൈസി ആരോപിച്ചു.മഹാരാഷ്ട്ര സർക്കാരിന്റെ 'മാസി ലഡ്കി ബഹിൻ' പദ്ധതിയുടെ ഗുണഭോക്താക്കളിൽ സ്ഥിരമായ കുറവ് വന്നിട്ടുണ്ടെന്ന് എഐഎംഐഎം മേധാവി ചൂണ്ടിക്കാട്ടി. "സർക്കാർ 9.30 ലക്ഷം കോടി രൂപയുടെ വായ്പ എടുത്തിരുന്നു. ആരാണ് ഈ വായ്പ തിരിച്ചടയ്ക്കുക?" അദ്ദേഹം ചോദിച്ചു.

അമ്മാവനും രാഷ്ട്രീയ ഉപദേഷ്ടാവുമായ ശരദ് പവാറിനോട് വിശ്വസ്തത പുലർത്താത്ത ഒരാൾക്ക് എങ്ങനെ ജനങ്ങളോട് വിശ്വസ്തത പുലർത്താൻ കഴിയുമെന്ന് അദ്ദേഹം ഉപമുഖ്യമന്ത്രി അജിത് പവാറിനെയും ലക്ഷ്യം വച്ചുകൊണ്ട് ചോദിച്ചു. വഖഫ് (ഭേദഗതി) നിയമത്തെക്കുറിച്ച് പരാമര്‍ശിച്ച ഉവൈസി, പള്ളികൾ പൂട്ടാനും നൂറ്റാണ്ടുകൾ പഴക്കമുള്ള ദർഗകളുടെ ഉടമസ്ഥാവകാശത്തെ വെല്ലുവിളിക്കാനും നിയമം ദുരുപയോഗം ചെയ്യുന്നുവെന്ന് ആരോപിച്ചു.