രാജ് താക്കറെയെ വധിക്കാൻ ഉദ്ധവ് പദ്ധതിയിട്ടിരുന്നു; ഗുരുതര വെളിപ്പെടുത്തലുമായി ഷിൻഡെ വിഭാഗം നേതാവ് രാംദാസ് കദം

മുംബൈ: പിണക്കം മറന്ന് ഹിന്ദിക്കെതിരെ താക്കറെ സഹോദരൻമാര്‍ ഒന്നിച്ചു ശബ്ദമുയര്‍ത്തിയപ്പോൾ മുതൽ ഇരുവരുടെയും ഒത്തുചേരലിനെക്കുറിച്ച് മഹാരാഷ്ട്രയിൽ വ്യാപകമായ ചര്‍ച്ചകൾ നടക്കുന്നുണ്ട്. സംസ്ഥാനത്തെ സ്കൂളുകളിൽ ഹിന്ദി മൂന്നാം ഭാഷയാക്കാനുള്ള നടപടി പിൻവലിക്കാനുളള സര്‍ക്കാര്‍ തീരുമാനം ആഘോഷമാക്കാനുള്ള തയ്യാറെടുപ്പിലാണ് ശിവസേന യുബിടി വിഭാഗവും മഹാരാഷ്ട്ര നവനിര്‍മാൺ സേനയും. ഹിന്ദി അടിച്ചേൽപ്പിക്കുന്നതിനെതിരെ പ്രതിഷേധ റാലി സംഘടിപ്പിക്കാൻ നിശ്ചയിച്ചിരുന്ന ജൂലൈ 5ന് വിജയറാലി നടത്താനാണ് ഇരുകക്ഷികളുടെയും തീരുമാനം.

ഇതിനിടെ ഉദ്ധവ് താക്കറെക്കെതിരെ ഗുരുതര വെളിപ്പെടുത്തലുമായി രംഗത്തെത്തിയിരിക്കുകയാണ് മുൻ മന്ത്രിയും ഷിൻഡെ വിഭാഗം നേതാവുമായ രാംദാസ് കദം. എംഎൻഎസ് നേതാവ് രാജ് താക്കറെയെ വധിക്കാൻ ഉദ്ധവ് പദ്ധതിയിട്ടിരുന്നുവെന്ന് കദം പറയുന്നു. രണ്ട് വാളുകളും ഒരു ഉറയിൽ ഇരിക്കില്ലെന്ന് ഉദ്ധവ് താക്കറെ പറയുമായിരുന്നു. കങ്കാവലിയിലേക്ക് പോകുമ്പോൾ ഞങ്ങൾക്ക് റൂട്ട് മാറ്റേണ്ടി വന്നു. എസ്പി അദ്ദേഹത്തോട് മുംബൈയിലേക്ക് മടങ്ങാൻ ആവശ്യപ്പെട്ടിരുന്നു. ഇതെല്ലാം രാജ് താക്കറെയോട് ചോദിക്കണോ?. മുഖ്യമന്ത്രിയുടെ സത്യപ്രതിജ്ഞാ ചടങ്ങിലേക്ക് ഉദ്ധവ് താക്കറെ രാജ് താക്കറെയെ ക്ഷണിച്ചെങ്കിലും വേദിയിൽ അദ്ദേഹത്തിന് ഇരിപ്പിടം നൽകിയില്ല. ഉദ്ധവിന് പകരം മഹാബലേശ്വറിൽ വർക്കിംഗ് പ്രസിഡന്‍റായി രാജ് തെരഞ്ഞെടുക്കപ്പെട്ടിരുന്നെങ്കിൽ മറാത്തികൾക്ക് നീതി ലഭിക്കുമായിരുന്നുവെന്നും രാംദാസ് കദം ചൂണ്ടിക്കാട്ടി. എബിപി ന്യൂസിന് നൽകിയ അഭിമുഖത്തിലാണ് കദം ഉദ്ധവിനെതിരെ രംഗത്തെത്തിയത്.

''ശിവസേനയും എംഎൻഎസും ഒന്നിച്ചാൽ രാജ് താക്കറെ ഒരു രാഷ്ട്രീയ ഇരയാകുമെന്ന് ഞാൻ കരുതുന്നു. ഞാൻ രാജിന്‍റെ ആരാധകനും നല്ല സുഹൃത്തുമാണ്'' കദം പറഞ്ഞു. നേരെമറിച്ച്, താക്കറെ സഹോദരന്മാർ ഒന്നിക്കുന്നതിനെതിരെ രാംദാസ് കദം ശക്തമായ നിലപാട് സ്വീകരിച്ചു മുംബൈയിൽ അവശേഷിക്കുന്നവരെ പോലും മുംബൈയിൽ നിന്ന് പുറത്താക്കുമെന്ന് ചൂണ്ടിക്കാട്ടി.

ആദ്യം ഉദ്ധവ് താക്കറെ കോൺഗ്രസിനെയും ശരദ് പവാറിനെയും വിട്ട് മഹാരാഷ്ട്രയിലേക്ക് പോകുമോ എന്ന് വ്യക്തമാക്കുക.ഉദ്ധവ് താക്കറെ ഒരു ഭിക്ഷാപാത്രവുമായി ചുറ്റിനടക്കുകയാണ്. മുനിസിപ്പൽ തെരഞ്ഞെടുപ്പിനുശേഷം അവർ അത് ഉപയോഗിച്ച് എംഎൻഎസിനെ പുറത്താക്കും. ഇന്ന് മുംബൈയിൽ വെറും 10 ശതമാനം മറാത്തികൾ മാത്രമേ അവശേഷിക്കുന്നുള്ളൂ, അവർ എല്ലാ പാർട്ടികളിലുമായി ചിതറിക്കിടക്കുകയാണ്. മറാത്തി ജനതയെ അടിച്ചമർത്തുന്ന ഒരു അന്തരീക്ഷം സൃഷ്ടിക്കാനുള്ള പ്രവർത്തനങ്ങൾ നടക്കുന്നുണ്ട്.

അവിഭക്ത പാർട്ടിക്കുള്ളിൽ തന്‍റെ ബന്ധുവിനെ ഉയർന്നുവരാൻ ഉദ്ധവ് താക്കറെ ഒരിക്കലും അനുവദിച്ചിട്ടില്ലെന്ന് നേരത്തെയും ഷിൻഡെ വിഭാഗം ആരോപിച്ചിരുന്നു. ഉദ്ധവിനെ ആധുനിക ദുര്യോധനന്‍ എന്നാണ് ശിവസേന വക്താവും താനെ എംപിയുമായ നരേഷ് മസ്കെ വിശേഷിപ്പിച്ചത്. ഉദ്ധവ് താക്കറെയുടെ നേതൃത്വത്തിലുള്ള ശിവസേന(യുബിടി)യുടെയും രാജ് താക്കറെയുടെ നേതൃത്വത്തിലുള്ള മഹാരാഷ്ട്ര നവനിര്‍മാൺ സേനയുടെയും ലയനവാര്‍ത്തകൾക്കിടെയായിരുന്നു പ്രതികരണം.

രാഷ്ട്രീയത്തിൽ തന്‍റെ സ്ഥാനം നിലനിർത്താനുള്ള ഉദ്ധവ് താക്കറെയുടെ തന്ത്രമാണ് ലയനത്തിന് പിന്നിലെന്നും മസ്കെ ആരോപിച്ചു. തന്‍റെ പാർട്ടിയിൽ ജനക്കൂട്ടത്തെ ആകർഷിക്കുന്ന നേതാക്കളുടെ അഭാവം മൂലമാണ് ശിവസേന (യുബിടി) രാജ് താക്കറെക്കെതിരെ ആക്രമണങ്ങളുമായി മുന്നോട്ട് പോകുന്നതെന്ന് അദ്ദേഹം കൂട്ടിച്ചേര്‍ത്തു. ''ഉദ്ധവിന്‍റെ സേനക്ക് ജനക്കൂട്ടത്തെ ആകർഷിക്കുന്ന നേതാക്കൾ ഇല്ല.ഈ തിരിച്ചറിവാണ് അവരെ രാജ് താക്കറെയിലേക്ക് തിരിയാൻ പ്രേരിപ്പിച്ചത്.ലോക്‌സഭയിലും രാജ്യസഭയിലും പാർട്ടി നിലനിൽപ്പ് പ്രതിസന്ധി നേരിടുന്നുണ്ട്'' മസ്കെ പറഞ്ഞു. അവിഭക്ത ശിവസേനയിൽ രാജ് താക്കറെയുടെ ഉയർച്ചയെ ഉദ്ധവ് പല്ലും നഖവും ഉപയോഗിച്ച് എതിർത്തിരുന്നുവെന്ന് മസ്കെ ചൂണ്ടിക്കാട്ടിയിരുന്നു.

ശിവസേന സ്‌ഥാപകന്‍ ബാല്‍ താക്കറെയുടെ മരണത്തേത്തുടര്‍ന്ന്‌, മകന്‍ ഉദ്ധവ്‌ താക്കറെ രാഷ്‌ട്രീയ പിന്തുടര്‍ച്ചാവകാശിയായി മാറിയതില്‍ പ്രതിഷേധിച്ചാണ്‌ ബാല്‍താക്കറെയുടെ അനന്തരവന്‍ രാജ്‌ താക്കറെ എംഎന്‍എസ്‌ രൂപീകരിച്ചത്‌. ഉദ്ധവും താനുമായുള്ള തര്‍ക്കങ്ങള്‍ നിസാരമാണെന്നും മഹാരാഷ്‌ട്രയാണ്‌ എല്ലാത്തിലും വലുതെന്നും രാജ്‌ താക്കറെ വ്യക്തമാക്കിയിരുന്നു.