പാം ഓയിലില്ല, വില വെറും രണ്ട് രൂപ; വൈറലായി 'വിന്റേജ്' കുർകുറെ പാക്കറ്റ്

കാലം എത്ര വേഗത്തിലാണ് മാറുന്നതെന്ന് നമ്മെ ഓർമ്മിപ്പിക്കുന്ന ചില കാഴ്ചകൾ സോഷ്യൽ മീഡിയയിൽ ഇടയ്ക്കിടെ പ്രത്യക്ഷപ്പെടാറുണ്ട്. അത്തരത്തിൽ, പഴയകാലത്തിന്റെ മധുരമുള്ള ഓർമ്മകൾ ഉണർത്തുന്ന ഒരു കുർകുറെ പാക്കറ്റിന്റെ ചിത്രമാണ് ഇപ്പോൾ ഇന്റർനെറ്റിൽ തരംഗമാകുന്നത്. ഏകദേശം 15 വർഷത്തിലധികം പഴക്കമുള്ള കുർകുറെ പാക്കറ്റ് അവിചാരിതമായി കണ്ടെത്തിയ ഒരാൾ ഇതിനെ ഒരു 'ടൈം ക്യാപ്സ്യൂൾ' എന്നാണ് വിശേഷിപ്പിക്കുന്നത്.

മണ്ണ് കുഴിക്കുന്നതിനിടയിലാണ് ദ്രവിച്ചുതുടങ്ങിയ നിലയിലുള്ള കുർകുറെ പാക്കറ്റ് യുവാവിന്റെ ശ്രദ്ധയിൽ പെട്ടത്. വൈറലായ ഈ ചിത്രത്തിൽ കാണുന്ന കുർകുറെ പാക്കറ്റിന്റെ വില അത്ഭുതപ്പെടുത്തുന്നതാണ്; വെറും രണ്ട് രൂപ! ലഘുഭക്ഷണങ്ങളുടെ വില കുതിച്ചുയരുന്ന ഈ കാലഘട്ടത്തിൽ, രണ്ട് രൂപയ്ക്ക് ഒരു കുർകുറെ പാക്കറ്റ് എന്നത് വിശ്വസിക്കാൻ പ്രയാസമുള്ള കാര്യമാണ്. ഇപ്പോൾ കുർകുറെ പാക്കറ്റിന് വിപണിയിൽ 10 രൂപ മുതൽ 30 രൂപ വരെ വിലയുണ്ട്. ചില്ലിക്കാശുകൾക്ക് വലിയ മൂല്യമുണ്ടായിരുന്ന, സ്കൂൾ വിട്ടു വരുന്ന വഴികളിൽ ആവേശത്തോടെ വാങ്ങിയിരുന്ന ആ പഴയ കാലത്തേക്ക് ഈ ചിത്രം എല്ലാവരെയും കൂട്ടിക്കൊണ്ടുപോകുന്നു. puran_polio എന്ന ഇൻസ്റ്റ​ഗ്രാം ഹാൻഡിലിലൂടെയാണ് ചിത്രം പങ്കുവെച്ചത്.

വിലയേക്കാൾ ഉപരിയായി, ഈ പാക്കറ്റിൽ രേഖപ്പെടുത്തിയിരിക്കുന്ന 'എക്സ്പയറി ഡേറ്റ്' ആണ് ആളുകളെ ഏറെ ചിന്തിപ്പിക്കുന്നത്. പാക്കറ്റ് നിർമ്മിച്ച് വെറും മൂന്നു മാസത്തിനുള്ളിൽ ഉപയോഗിക്കണം എന്നാണ് ഇതിൽ രേഖപ്പെടുത്തിയിരിക്കുന്നത്. ഇന്നത്തെ കാലത്തെ പാക്കറ്റ് ഭക്ഷണങ്ങൾ ദീർഘകാലം കേടുകൂടാതിരിക്കാൻ ധാരാളം പ്രിസർവേറ്റീവുകൾ ചേർക്കുമ്പോൾ, അക്കാലത്തെ ഭക്ഷണസാധനങ്ങളുടെ ഗുണമേന്മയും പ്രകൃതിദത്തമായ രീതിയും ഇത് വ്യക്തമാക്കുന്നു. കൂടാതെ, ഇന്നത്തെ പാക്കറ്റുകളിൽ കാണുന്ന 'പാം ഓയിൽ' അന്ന് ചേരുവകളുടെ കൂട്ടത്തിൽ ഉണ്ടായിരുന്നില്ല എന്നതും ശ്രദ്ധേയമാണ്.

ഈ ചിത്രം വൈറലായതോടെ രസകരവും ചിന്തിപ്പിക്കുന്നതുമായ നിരവധി പ്രതികരണങ്ങളാണ് നെറ്റിസൺസ് പങ്കുവെക്കുന്നത്. ഇതൊരു മ്യൂസിയത്തിൽ സൂക്ഷിക്കേണ്ട പുരാവസ്തുവാണെന്നും, അക്കാലത്തെ കുർകുറെയുടെ രുചി ഒന്ന് വേറെ തന്നെയായിരുന്നുവെന്നും പലരും കുറിച്ചു. ഇന്നത്തേത് പോലെ അമിതമായ കൃത്രിമത്വം അന്നത്തെ ഭക്ഷണത്തിനുണ്ടായിരുന്നില്ല എന്ന അഭിപ്രായവും ഉയർന്നു വന്നു.

എങ്കിലും, 15 വർഷം മണ്ണിൽ കിടന്നിട്ടും ഈ പ്ലാസ്റ്റിക് കവർ നശിക്കാതെ ഇരിക്കുന്നത് ആശങ്കാജനകമാണെന്നും ഇത് പരിസ്ഥിതിക്ക് നൽകുന്ന വലിയൊരു മുന്നറിയിപ്പാണെന്നും ചിലർ ഓർമ്മിപ്പിച്ചു. പഴയ സ്കൂൾ കാലത്തെ ഓർമ്മകളും രണ്ട് രൂപയുടെ പാക്കറ്റ് വാങ്ങാൻ കൂട്ടുകാരോടൊപ്പം പൈസ പങ്കിട്ടിരുന്ന കാര്യങ്ങളും പങ്കുവെച്ചതോടെ ഈ പോസ്റ്റ് സോഷ്യൽ മീഡിയയിൽ വലിയൊരു ചർച്ചയായി മാറിയിരിക്കുകയാണ്.