'എല്ലാ പാറ്റകളെയും കൊല്ലും'; കോക്രോച്ച് പാര്‍ട്ടിയെ വെല്ലുവിളിച്ച് പുതിയ പാര്‍ട്ടി ഒജെപി

ഡൽഹി: കോക്രോച്ച് ജനതാ പാർട്ടി സോഷ്യൽ മീഡിയയിൽ വൈറലായതിന് പിന്നാലെ മറ്റൊരു പാര്‍ട്ടി കൂടി ഉയര്‍ന്നുവന്നിരിക്കുകയാണ്. സിജെപിയെ പൂട്ടുക എന്നതാണ് പുതിയ പാര്‍ട്ടിയായ ഓഗി ജനത പാര്‍ട്ടി അഥവാ ഒജെപിയുടെ ലക്ഷ്യം. സിജെപി അവകാശപ്പെടുന്നതുപോലെ അത്ര നിഷ്പക്ഷത പുലര്‍ത്തുന്നില്ലെന്നാണ് ഒജെപിയുടെ ആരോപണം.

സിജെപിയുടെ സ്ഥാപകനായ അഭിജീത് ദിപ്കെയെക്ക് ആം ആദ്മി പാർട്ടിയുമായുള്ള രാഷ്ട്രീയ ബന്ധം ഓഗി ജനതാ പാർട്ടി തങ്ങളുടെ ഇൻസ്റ്റാഗ്രാം പോസ്റ്റിലൂടെ പുറത്തുവിട്ടു. എഎപിയുടെ സോഷ്യൽ മീഡിയ, ഇലക്ഷൻ ക്യാമ്പയിൻ ടീമുകളിൽ മുൻപ് വോളണ്ടിയറായി അഭിജീത് പ്രവർത്തിച്ചിട്ടുണ്ട്. മുൻ ഡൽഹി ഉപമുഖ്യമന്ത്രി മനീഷ് സിസോദിയയ്ക്ക് നന്ദി പറഞ്ഞുകൊണ്ട് 2024-ൽ അഭിജീത് പങ്കുവെച്ച ഒരു പഴയ ട്വീറ്റും ഒജെപി ഇതിനായി തെളിവായി ഉയർത്തിക്കാട്ടുന്നുണ്ട്. 2020 ലെ ഡൽഹി നിയമസഭാ തെരഞ്ഞെടുപ്പിൽ, അരവിന്ദ് കെജ്‌രിവാളിന്റെ നേതൃത്വത്തിലുള്ള പാർട്ടി അധികാരത്തിലെത്തിയപ്പോൾ, പാർട്ടിക്കായി മീം അധിഷ്ഠിത ഡിജിറ്റൽ കാമ്പെയ്‌നുകൾ സൃഷ്ടിക്കുന്നതിൽ ദിപ്കെ പങ്കാളിയായിരുന്നു. ആം ആദ്മി പാർട്ടിയോടുള്ള ദിപ്കെയുടെ മുൻകാല സോഷ്യൽ മീഡിയ പ്രവർത്തനങ്ങളുടെ സ്ക്രീൻഷോട്ടുകൾ ഒജെപി പോസ്റ്റ് ചെയ്തിട്ടുണ്ട്.

ജനപ്രിയ കാർട്ടൂൺ പരമ്പരയായ ‘ഓഗി ആൻഡ് ദി കോക്രോച്ചസ്’ എന്ന ആശയത്തിൽ നിന്ന് പ്രചോദനം ഉൾക്കൊണ്ട് ഒജെപി പുതിയ പേജ് രൂപീകരിച്ചിരിക്കുന്നത്. 'യുഎസ്എ ആസ്ഥാനമായുള്ള സിജെപിയിൽ നിന്ന് വ്യത്യസ്തമായി ഒരു രാഷ്ട്രീയ പാർട്ടിയുടെയും പിന്തുണ തങ്ങൾക്കില്ല" എന്ന് ഒജെപി അവരുടെ ഇൻസ്റ്റാഗ്രാം ബയോയിൽ എഴുതുന്നു. "അസുഖകരമായ സത്യങ്ങൾ മാത്രം. എല്ലാത്തിനെയും ചോദ്യം ചെയ്യുക. ഒന്നിനെയും ആരാധിക്കരുത്" എന്ന് അതിൽ കൂട്ടിച്ചേർത്തു. വ്യാഴാഴ്ച വരെ അക്കൗണ്ടിന് 10,000-ത്തിലധികം ഫോളോവേഴ്‌സ് ലഭിച്ചിട്ടുണ്ട്.

സിജെപി ഇൻസ്റ്റാഗ്രാമിൽ ഇൻഫ്ലുവൻസർ അർപിത് ശർമ്മയെ പിന്തുടരുന്നുണ്ടെന്നും ഒജെപി എടുത്തുകാണിച്ചു. അദ്ദേഹത്തിന്‍റെ പിതാവ് വികാസ് ശർമ 2022 ലെ യുപി തെരഞ്ഞെടുപ്പിൽ എഎപി ടിക്കറ്റിൽ മത്സരിച്ചിട്ടുണ്ട്. മഹുവ മൊയ്ത്ര, കീർത്തി ആസാദ് തുടങ്ങിയ പ്രതിപക്ഷ നേതാക്കൾ പുതിയ പ്രസ്ഥാനത്തിൽ ചേരുന്നത് എന്തുകൊണ്ടാണെന്നും ഒജെപി ചോദിക്കുന്നു. എല്ലാ പാറ്റകളെയും കൊല്ലുക എന്നതാണ് തങ്ങളുടെ ലക്ഷ്യമെന്ന് ഒജെപിയുടെ വെബ്സൈറ്റിൽ വ്യക്തമാക്കുന്നുണ്ട്.

ഇൻസ്റ്റഗ്രാമിലെ ഒരു പോസ്റ്റിൽ, മൃഗങ്ങളുടെ അവകാശങ്ങളിൽ ശ്രദ്ധ കേന്ദ്രീകരിക്കുന്ന അവരുടെ പ്രകടന പത്രിക ഒജെപി പുറത്തിറക്കിയിട്ടുണ്ട്. തെരുവ് മൃഗങ്ങളുടെ സംരക്ഷണം, സൗജന്യ മൃഗ ആരോഗ്യ സംരക്ഷണം, അഭയകേന്ദ്രങ്ങളുടെയും രക്ഷാപ്രവർത്തനങ്ങളുടെയും വിപുലീകരണം, മൃഗങ്ങൾക്കെതിരായ ക്രൂരത തടയാനുള്ള നിയമങ്ങൾ, തീറ്റ, ദത്തെടുക്കൽ ബോധവൽക്കരണ കാമ്പയിൻ എന്നിവ അതിന്റെ പ്രകടന പത്രികയിൽ ഉൾപ്പെടുന്നു. നീറ്റ് ചോദ്യപേപ്പർ ചോർച്ച സംഭവത്തിൽ നീതി തേടിയും വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി ആവശ്യപ്പെട്ടും ഒജെപി പ്രത്യേക പോസ്റ്റുകളിൽ ആവശ്യപ്പെട്ടു. ബീഫ് കശാപ്പും കയറ്റുമതിയും പൂർണമായും നിരോധിക്കണമെന്നും അവർ ആവശ്യപ്പെട്ടു.