‘അർഹമായത്​ നൽകാൻ സർക്കാർ വിസമ്മതിക്കുന്നത്​ ലജ്ജാകരം’; ഹരിയാനയിലെ ആശമാരുടെ സമരത്തെ പിന്തുണച്ച്​ യെച്ചൂരിയുടെ പഴയ പോസ്​റ്റ്​

ന്യൂഡൽഹി: 2017ൽ ഹരിയാനയിൽ ആശാ പ്രവർത്തകരും ഉച്ചഭക്ഷണ തൊഴിലാളികളും നടത്തിയ സമരത്തെ പിന്തുണച്ചുകൊണ്ടുള്ള സിപിഎം മുൻ ജനറൽ സെക്രട്ടറി സീതാറാം യെച്ചൂരിയുടെ പോസ്​റ്റ്​ ചർച്ചയാകുന്നു. സർക്കാർ വാഗ്​ദാനങ്ങൾ പാലിക്കുന്നില്ലെന്ന്​ കാണിച്ച്​ 2017 ഫെബ്രുവരി 28ന്​ ആയിരക്കണക്കിന്​ ആശാ പ്രവർത്തകരും ഉച്ചഭക്ഷണ തൊഴിലാളികളും ഹരിയാന നിയമസഭയിലേക്ക്​ മാർച്ച്​ നടത്തിയിരുന്നു.

ഇതുസംബന്ധിച്ച്​ സിപിഎമ്മി​െൻറ ഔദ്യോഗിക ട്വിറ്റർ ഹാൻഡിലിൽ വന്ന പോസ്​റ്റ്​ പങ്കുവെക്കുകയായിരുന്നു യെച്ചൂരി. ‘ഈ തൊഴിലാളികൾ ഇന്ത്യയുടെ ഭാവി ഉയർത്തുന്നു. അവർക്ക്​ അർഹമായത്​ നൽകാൻ സർക്കാൻ വിസമ്മതിക്കുന്നത്​ ലജ്ജാകരമാണ്​’ -പോസ്​റ്റ്​ പങ്കിട്ടുകൊണ്ട്​ സീതാറാം യെച്ചൂരി കുറിച്ചു.

ഓണറേറിയം വർധന, മറ്റു ആനുകൂല്യങ്ങൾ എന്നിവ ആവശ്യപ്പെട്ട്​ കേരളത്തിൽ സെക്ര​ട്ടേറിയറ്റ് പടിക്കൽ ആശമാർ നടത്തുന്ന രാപ്പകൽ സമരം 38ാം ദിവസത്തിലേക്ക് കടന്നിരിക്കുകയാണ്​. ഈസാഹചര്യത്തിലാണ്​ യെച്ചൂരിയു​ടെ പോസ്​റ്റ്​ വീണ്ടും ചർച്ചയാകുന്നത്​.