വീട്ടില്‍ വൈകിയെത്തിയെന്ന് ആരോപിച്ച് ഭാര്യക്ക് ക്രൂരമര്‍ദനം; ബിജെപി തൃശൂര്‍ സൗത്ത് ജില്ലാ പ്രസിഡന്റ് എ.ആര്‍ ശ്രീകുമാറിനെതിരെ വധശ്രമത്തിന് കേസ്

തൃശൂർ: ഭാര്യയെ ക്രൂരമായി മർദിച്ചതിൽ ബിജെപി ജില്ലാ പ്രസിഡന്‍റിനെതിരെ കേസ്. തൃശൂർ സൗത്ത് ജില്ലാ പ്രസിഡന്‍റ് എ.ആർ ശ്രീകുമാറിനെതിരെയാണ് വധശ്രമം അടക്കമുള്ള കുറ്റങ്ങൾ ചുമത്തി മതിലകം പൊലീസ് കേസെടുത്തത്.

തന്നെ ക്രൂരമായി മർദിച്ചെന്നും കൊലപ്പെടുത്താൻ ശ്രമിച്ചെന്നുമുള്ള ഭാര്യയുടെ പരാതിയിലാണ് നടപടി. വീട്ടിലേക്ക് വൈകിയെത്തിയെന്ന് പറഞ്ഞുകൊണ്ടാണ് ശ്രീകുമാർ മർദിച്ചതെന്ന് ഭാര്യ നൽകിയ പരാതിയിലുണ്ട്. വൈകിയെത്താൻ ഇതെന്താ സത്രമാണോയെന്ന് ചോദിച്ചുകൊണ്ട് ഇരുകരണത്തും വീശിയടിക്കുകയും മുടിക്കുത്തിന് പിടിച്ച് തല ഭിത്തിയിലിടിക്കുകയും ചെയ്തെന്ന് ഭാര്യ പറഞ്ഞു.ഭർത്താവിന്‍റെ ക്രൂരമർദനമേറ്റതിന് പിന്നാലെ ഇവർ കൊടുങ്ങല്ലൂർ താലൂക്ക് ആശുപത്രിയിൽ ചികിത്സ തേടിയിരുന്നു. സംഭവത്തിന് പിന്നാലെ യുവതിയുടെ മൊഴി രേഖപ്പെടുത്തിയ പൊലീസ് കേസ് രജിസ്റ്റർ ചെയ്യുകയായിരുന്നു.

മുൻപും പലകാരണങ്ങൾ ചൂണ്ടിക്കാട്ടി ഇയാൾ ഭാര്യയെ മർദിക്കാറുണ്ടെന്ന് നാട്ടുകാർ നാട്ടുകാർ പൊലീസിനെ അറിയിച്ചിട്ടുണ്ട്. വധശ്രമം അടക്കമുള്ള വകുപ്പുകൾ ചുമത്തിയാണ് മതിലകം പൊലീസ് കേസ് എടുത്തിരിക്കുന്നത്.