'ബിജെപി ഒറ്റ സീറ്റ് പോലും പിടിക്കില്ല, എൽഡിഎഫ് നല്ല ഭൂരിപക്ഷത്തിൽ അധികാരത്തിൽ വരും'- എം.വി ഗോവിന്ദൻ

തിരുവനന്തപുരം: ബിജെപി ഒറ്റ സീറ്റ് പോലും പിടിക്കില്ലെന്നും നല്ല ഭൂരിപക്ഷത്തിൽ എൽഡിഎഫ് അധികാരത്തിൽ വരുമെന്നും സിപിഎം സംസ്ഥാന സെക്രട്ടറി എം.വി ഗോവിന്ദൻ. പത്തു വർഷത്തെ വികസന കരുത്തിന്റെ ബലത്തിലാണ് തെരഞ്ഞെടുപ്പിനെ നേരിടുന്നതെന്നും അദ്ദേഹം പറഞ്ഞു.

'വയനാട് വീടുപണി പൂർത്തിയാക്കിയ ശേഷം കണക്ക് പറയും എന്നാണ് പ്രതിപക്ഷ നേതാവ് പറഞ്ഞത്. വീടുപണി നടക്കുന്നതു പോയി നോക്കൂ എന്ന് പറഞ്ഞു. പോയി നോക്കിയപ്പോൾ അവിടെ ഒന്നുമില്ല. 100 കോടിയിലധികം കോൺഗ്രസ് പിരിച്ചു എന്നാണ് പലരും പറയുന്നത്. ഈ ഫണ്ട് എല്ലാം എവിടെയാണ് പോയത് ? വലിയ തട്ടിപ്പാണ് ചൂരൽമല ദുരന്തവുമായി ബന്ധപ്പെട്ട് കോൺഗ്രസ് നടത്തിയത്. ഒരു രൂപപോലുമില്ലാതെ കോൺഗ്രസ് എങ്ങനെയാണ് 230 വീടുകൾ നൽകുക ?'- എം.വി ഗോവിന്ദൻ ചോദിച്ചു. വാർത്താസമ്മേളനം നടത്താൻ ഒരു വിമുഖതയും കാണിച്ചിട്ടില്ല. വാർത്താസമ്മേളനം നടത്താൻ നേതൃത്വത്തിൽ എല്ലാവരോടും പറഞ്ഞിട്ടുണ്ട്. സ്ഥാനാർഥികൾ എല്ലാവരുടേയും വോട്ട് വാങ്ങും എന്നും എം.വി ഗോവിന്ദൻ പറഞ്ഞു.