മണിപ്പൂര്‍ കത്തുമ്പോഴും വിദേശയാത്രകള്‍ നടത്തിയയാളാണ് മോദി, രാഹുല്‍ ഗാന്ധിയുടെ വിദേശയാത്ര വിവാദമാക്കുന്നത് ആശയക്കുഴമുണ്ടാക്കാന്‍: എം.എ ബേബി
ഇന്ത്യയിലെ സംസ്ഥാനങ്ങളേക്കാള്‍ കൂടുതല്‍ വിദേശയാത്രകള്‍ നടത്തിയ ആളാണ് ഇന്ത്യന്‍ പ്രധാനമന്ത്രിയെന്നും അഭിജീത് ദീപ്‌കെ സമരത്തില്‍ നിന്ന് പിന്മാറിയെന്നത് കള്ളപ്രചാരണമാണെന്നും എം.എ ബേബി
തിരുവനന്തപുരം: ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയുടെ വിദേശയാത്ര വിവാദമാക്കുന്നത് ആശയക്കുഴപ്പമുണ്ടാക്കാനാണെന്ന് സിപിഎം ജനറല്‍ സെക്രട്ടറി എം.എ ബേബി. ഇന്ത്യയിലെ സംസ്ഥാനങ്ങളേക്കാള്‍ കൂടുതല്‍ വിദേശയാത്രകള്‍ നടത്തിയ ആളാണ് ഇന്ത്യന്‍ പ്രധാനമന്ത്രിയെന്നും അഭിജീത് ദീപ്‌കെ സമരത്തില്‍ നിന്ന് പിന്മാറിയെന്നത് കള്ളപ്രചാരണമാണെന്നും എം.എ ബേബി പറഞ്ഞു. ഡല്‍ഹിയിലെ പ്രക്ഷോഭങ്ങള്‍ക്ക് ശേഷം തിരുവനന്തപുരത്തെത്തിയ ശേഷം മാധ്യമങ്ങളെ കാണുകയായിരുന്നു അദ്ദേഹം.
'നിലവില്‍ നടന്നുകൊണ്ടിരിക്കുന്ന സമരത്തിന് ഏതെങ്കിലും തരത്തിലുള്ള പ്രശ്‌നങ്ങള്‍ ഉണ്ടാക്കുന്ന രീതിയില്‍ ഇപ്പോള്‍ പ്രതികരിക്കാന്‍ ആഗ്രഹിക്കുന്നില്ല. ഇന്ത്യയിലെ സംസ്ഥാനങ്ങള്‍ സന്ദര്‍ശിച്ചിട്ടുള്ളതിനേക്കാള്‍ കൂടുതല്‍ വിദേശരാജ്യങ്ങള്‍ സന്ദര്‍ശിച്ചയാളാണ് മോദി. മണിപ്പൂര്‍ അടക്കമുള്ള സ്ഥലങ്ങളില്‍ പ്രശ്‌നങ്ങള്‍ കത്തിപ്പടര്‍ന്നപ്പോള്‍ അത് ശ്രദ്ധിക്കാത്തവരാണിപ്പോള്‍ ആശയക്കുഴപ്പം ഉണ്ടാക്കാനായി ഓരോന്ന് പറഞ്ഞുകൊണ്ടിരിക്കുന്നത്.' അദ്ദേഹം വ്യക്തമാക്കി.
തെരഞ്ഞെടുപ്പ് കമ്മീഷണര്‍ക്കും മറ്റുമെതിരെ ക്രിമിനല്‍ അല്ലെങ്കില്‍ സിവില്‍ കേസുകളില്‍ പ്രതിയാക്കാനാവാത്ത വിധം അസാധാരണവും ആജീവനാന്തവുമായ സംരക്ഷണമാണ് നരേന്ദ്രമോദിയും അമിത്ഷായും ചേര്‍ന്ന് നല്‍കിയിരിക്കുന്നതെന്നും അദ്ദേഹം പറഞ്ഞു. ഇന്ത്യന്‍ പ്രസിഡന്റിനും ഗവര്‍ണര്‍മാര്‍ക്കും പോലും ഔദ്യോഗിക പദവിയിലിരിക്കുന്ന കാലത്ത് മാത്രമാണ് ഇത്തരം പരിരക്ഷകളുള്ളത്. കേന്ദ്ര സര്‍ക്കാരിന്റെ ജനവിരുദ്ധ നയങ്ങള്‍ക്കെതിരെ ഡല്‍ഹി ഉള്‍പ്പെടെയുള്ള സ്ഥലങ്ങളില്‍ ഇടതുപക്ഷവും സഖാക്കളും ശക്തമായ സമരങ്ങള്‍ സംഘടിപ്പിച്ചിട്ടുണ്ടെന്നും മുന്‍ മുഖ്യമന്ത്രിമാരായ പിണറായി വിജയന്‍, വി.എസ് അച്ഛ്യുതാനന്ദന്‍ തുടങ്ങിവര്‍ സമരത്തിന്റെ ഭാഗമായിട്ടുണ്ടെന്നും എം.എ ബേബി പറഞ്ഞു.
സമരത്തില്‍ നിന്ന് സിപിഎം പിന്‍വാങ്ങുന്നുവെന്ന തരത്തിലുള്ള പ്രചാരണങ്ങള്‍ കള്ളമാണെന്നും, ഹിറ്റ്‌ലറുടെ പ്രചാരണ മന്ത്രിയായിരുന്ന ഗീബല്‍സിനെ അനുസ്മരിപ്പിക്കുന്ന രീതിയിലാണ് ആര്‍എസ്എസും ഇത്തരം കള്ളപ്രചാരണങ്ങള്‍ നടത്തുന്നതെന്നും അദ്ദേഹം കൂട്ടിച്ചേര്‍ത്തു.
watch video report:
Adjust Story Font
16