ന്യൂയോര്‍ക്ക്: ഐഫോൺ 18 പ്രോ സീരീസിനെക്കുറിച്ചുള്ള ചർച്ചകളും ലീക്കുകളും ടെക് ലോകത്ത് സജീവമായിക്കഴിഞ്ഞു. പെർഫോമൻസ്, ക്യാമറ, ബാറ്ററി ലൈഫ്, പുതിയ നിറങ്ങൾ എന്നിവയിലെല്ലാം വൻ അപ്‌ഗ്രേഡുകളുമായാണ് ഐഫോൺ 18 പ്രോ, ഐഫോൺ 18 പ്രോ മാക്സ് മോഡലുകൾ എത്തുന്നത്. ഐഫോണ്‍ 18 പ്രോ, പ്രോ മാക്സ് മോഡലുകളില്‍ പ്രതീക്ഷിക്കാവുന്ന ഫീച്ചറുകള്‍ ഏതൊക്കെയാണെന്ന് നോക്കാം...

ചെറുതാകുന്ന ഡയനാമിക് ഐലൻഡ് (Dynamic Island)

ഐഫോൺ 18 പ്രോ മോഡലുകളിൽ ഡിസ്‌പ്ലേയിലെ ഡയനാമിക് ഐലൻഡിന്റെ വലുപ്പം ആപ്പിൾ ഏകദേശം 35 ശതമാനത്തോളം കുറച്ചേക്കും. അണ്ടർ-ഡിസ്‌പ്ലേ ഫേസ് ഐഡി സാങ്കേതികവിദ്യ പൂർണ്ണമായും സജ്ജമാകാത്തതിനാൽ, സ്ക്രീൻ ഡിസൈൻ പൂർണ്ണമായും മാറ്റുന്നതിന് പകരം ഡയനാമിക് ഐലൻഡിന്റെ വലുപ്പം കുറയ്ക്കാനാണ് ആപ്പിളിന്റെ തീരുമാനം. ഫോണിന്റെ ബാക്ക് പാനൽ ഡിസൈനും ട്രിപ്പിൾ ക്യാമറ സെറ്റപ്പും മുൻ മോഡലുകള്‍ക്ക് സമാനമായി തുടരും.

ആകർഷകമായ പുതിയ നിറങ്ങൾ

ഐഫോൺ 18 പ്രോ സീരീസിൽ കടും ചുവപ്പും ചെറുതായി പർപ്പിൾ കലർന്നതുമായ 'ഡാർക്ക് ചെറി' (Dark Cherry) എന്ന പുതിയ കളർ വേരിയന്റ് ആപ്പിൾ അവതരിപ്പിച്ചേക്കും. ഇതോടൊപ്പം സ്കൈ ബ്ലൂ, സിൽവർ, ഡാർക്ക് ഗ്രേ എന്നീ നിറങ്ങളും ലഭ്യമായേക്കാം. കൂടാതെ, ഫോണിന്റെ അലുമിനിയം ഫ്രെയിമും ബാക്ക് ഗ്ലാസും തമ്മിൽ കൂടുതൽ ഭംഗിയായി ലയിച്ചുചേരുന്ന രീതിയിലുള്ള ഫിനിഷിംഗും, മാഗ്‌സേഫ് (MagSafe) ചാർജിംഗ് ഭാഗത്ത് നേരിയ സുതാര്യതയുള്ള (Transparent) സെറാമിക് ഷീൽഡും ആപ്പിൾ പരീക്ഷിക്കുന്നതായും റിപ്പോർട്ടുകളുണ്ട്.

മികച്ച ക്യാമറയും ഡിസ്‌പ്ലേയും

ഐഫോൺ 18 പ്രോയുടെ പ്രധാന ക്യാമറയിൽ മാനുവലായി അപ്പർച്ചർ നിയന്ത്രിക്കാനുള്ള ഫീച്ചർ ഉണ്ടായേക്കാം. ഇത് കുറഞ്ഞ വെളിച്ചത്തിലുള്ള ഫോട്ടോഗ്രാഫി മികച്ചതാക്കാനും കൂടുതൽ സ്വാഭാവികമായ ബാക്ക്ഗ്രൗണ്ട് ബ്ലർ നൽകാനും സഹായിക്കും. ആപ്പിൾ പുതിയ ത്രീ-ലെയർ സ്റ്റാക്ക്ഡ് ഇമേജ് സെൻസറിനായി സാംസങ്ങുമായി സഹകരിക്കുന്നതായും സൂചനയുണ്ട്.കൂടുതൽ പവർ എഫിഷ്യന്റ് ആയ LTPO+ ഡിസ്‌പ്ലേ സാങ്കേതികവിദ്യയായിരിക്കും ഇതിൽ ഉപയോഗിക്കുക. ഇത് ഫോണിന്റെ ബാറ്ററി ലൈഫ് വർദ്ധിപ്പിക്കും.

A20 പ്രോ ചിപ്പും കരുത്തുറ്റ ബാറ്ററിയും

TSMC-യുടെ 2 നാനോമീറ്റർ പ്രോസസ്സിൽ നിർമ്മിക്കുന്ന ആപ്പിളിന്റെ അടുത്ത തലമുറ A20 പ്രോ ചിപ്പായിരിക്കും ഐഫോൺ 18 പ്രോ സീരീസിന് കരുത്ത് പകരുക. ഇത് മുൻ ചിപ്പുകളേക്കാൾ 15 ശതമാനം വേഗതയും 30 ശതമാനം മികച്ച കാര്യക്ഷമതയും നൽകും. റാം (RAM) നേരിട്ട് സിപിയുവിനോട് ചേർത്ത് വെക്കുന്ന പുതിയ WMCM പാക്കേജിംഗ് സിസ്റ്റം വഴി ആപ്പിൾ ഇന്റലിജൻസ് ഫീച്ചറുകൾ കൂടുതൽ വേഗത്തിൽ പ്രവർത്തിക്കും. ബാറ്ററിയുടെ കാര്യത്തിൽ, ഐഫോൺ 18 പ്രോ മാക്സ് മോഡലിൽ 5,100mAh മുതൽ 5,200mAh വരെയുള്ള വലിയ ബാറ്ററി ഉണ്ടായേക്കുമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. പൊതുവെ ആപ്പിള്‍ ബാറ്ററിയുടെ എംഎഎച്ച് പറയാറില്ല. പുതിയ പ്രൊസസ്സറിന്റെയും ഡിസ്‌പ്ലേയുടെയും കാര്യക്ഷമത കൂടിയാകുമ്പോൾ ഐഫോൺ ചരിത്രത്തിലെ ഏറ്റവും മികച്ച ബാറ്ററി ലൈഫ് ആയിരിക്കും ഇത് സമ്മാനിക്കുക