രാജ്യത്ത് കോവിഡ് വ്യാപനം കുറയുന്നു; ഇന്നലെ രോഗം സ്ഥിരീകരിച്ചത് 60,753 പേർക്ക്

രാജ്യത്ത് കഴിഞ്ഞ 24 മണിക്കൂറിനിടെ 60,753 പേർക്ക് കൂടി കോവിഡ് സ്ഥിരീകരിച്ചു. കഴിഞ്ഞ 74 ദിവസത്തിനിടയിലെ ഏറ്റവും കുറഞ്ഞ കണക്കാണിത്​. 1,647 മരണങ്ങളും റിപ്പോര്‍ട്ട് ചെയ്തു. ഇതോടെ ആകെ കോവിഡ് മരണങ്ങള്‍ 3,85,137 ആയി.

97,743 പേരാണ് ഇന്നലെ രോഗമുക്​തി നേടിയത്. 2,86,78,390 പേരാണ് ഇതുവരെ രോഗമുക്തരായത്​. 96.16 ശതമാനമാണ്​ രോഗമുക്​തി നിരക്ക്. 7,60,019 പേര്‍​ നിലവിൽ രാജ്യത്ത്​ കോവിഡ്​ ബാധിച്ച്​ ചികിത്സയിലുണ്ട്.

ഈ ആഴ്​ചയിലെ ടെസ്​റ്റ്​ പോസിറ്റിവിറ്റി നിരക്ക്​ 3.58 ശതമാനമാണ്​. പ്രതിദിന ടെസ്​റ്റ്​ പോസിറ്റിവിറ്റി നിരക്കും അഞ്ച്​ ശതമാനത്തിൽ താഴെയാണ്. 2.98 ശതമാനമാണ്​ ഇന്നത്തെ ടെസ്​റ്റ്​ പോസിറ്റിവിറ്റി നിരക്ക്​. അതേസമയം, 27.23 കോടി പേർക്ക്​ ഇതുവരെ വാക്​സിൻ നൽകിയിട്ടുണ്ടെന്നും ആരോഗ്യമന്ത്രാലയം അറിയിച്ചു.