ഗസ്സയിൽ രണ്ടു മാസത്തെ വെടിനിർത്തൽ; പുതിയ നിർദേശം ഇസ്രായേൽ അംഗീകരിച്ചതായി ട്രംപ്

തെൽ അവിവ്: ഗസ്സയിൽ രണ്ടു മാസത്തെ വെടിനിർത്തലും തുടർന്ന്​ സമ്പൂർണ യുദ്ധവിരാമ നടപടികളും വ്യവസ്ഥ ചെയ്യുന്ന പുതിയ നിർദേശം​ ഇസ്രായേൽ അംഗീകരിച്ചതായി​ യുഎസ്​ പ്രസിഡന്‍റ്​ ഡോണൾഡ്​ ട്രംപ്​. യുഎസ്​ നിർദേശം ചർച്ച ചെയ്യുമെന്നും ആക്രമണം പൂർണമായി നിർത്തുകയാണ്​ വേണ്ടതെന്നും ഹമാസ്​. ഇസ്രായേൽ പ്രധാനമന്ത്രി ബിന്യാമിൻ നെതന്യാഹു ഞായറാഴ്ച അമേരിക്കയിലെത്തും.

രണ്ടു മാസത്തെ വെടിനിർത്തലും തുടർന്ന്​ പൂർണ യുദ്ധവിരാമം ലക്ഷ്യമിട്ടുള്ള നടപടികളുമാണ്​ അമേരിക്ക മുന്നോട്ടു വെച്ച പുതിയ വെടിനിർത്തൽ നിർദേശത്തിലുള്ളത്​. ഇതുമായി ബന്​ധപ്പെട്ട ആവശ്യമായ ഉപാധികൾ ഇസ്രായേൽ അംഗീകരിച്ചതായി അമേരിക്കൻ പ്രസിഡന്‍റ്​ ഡോണൾഡ്​ ട്രംപ്​ പറഞു. എന്നാൽ വെടിനിർത്തലിന്‍റെ മറ്റു വിശദാംശങ്ങൾ അദ്ദേഹം വെളിപ്പെടുത്തിയില്ല. ഹമാസിന്​ ലഭിക്കാവുന്ന മികച്ച നിർദേശമാണിതെന്നും ട്രംപ്​ പറഞ്ഞു. രണ്ടു മാസ വെടിനിർത്തൽ കാലയളവിൽ 10 ബന്ദികൾക്കു പുറമെ 18 ബന്ദികളുടെ മൃതദേഹങ്ങളും ഹമാസ്​ കൈമാറണമെന്നാണ്​ വ്യവസ്ഥയെന്ന്​ യുഎസ്​ മാധ്യമങ്ങൾ റിപ്പോർട്ട്​ ചെയ്തു.

ഇതിന്​ ആനുപാതികമായി ഫലസ്തീൻ തടവുകാരെ വിട്ടയക്കാനും ഗസ്സയിലേക്ക്​ കൂടുതൽസഹായം ഉറപ്പാക്കാനും ഇസ്രായേൽ തയാറാകും. യുഎസ്​ സമർപ്പിച്ച പുതിയ നിർദേശം വിലയിരുത്തുമെന്ന്​ വ്യക്​തമാക്കിയ ഹമാസ്​, ഇസ്രായേൽ ആക്രമണം പൂർണമായും അവസാനിപ്പിക്കുകയാണ്​ വേണ്ടതെന്നും വ്യക്​തമാക്കി.ശനിയാഴ്ച ചേരുന്ന ഇസ്രായേൽ സുരക്ഷാ മന്ത്രിസഭ പുതിയ നിർദേശം ചർച്ച ചെയ്യും. തിങ്കളാഴ്​ച വൈറ്റ്​ ഹൗസിൽ ഇസ്രായേൽ പ്രധാനമന്ത്രി ബിന്യാമിൻ നെതന്യാഹുവുമായി യുഎസ്​ പ്രസിഡന്‍റ്​ ഡോണൾഡ്​ ട്രംപ്​ ചർച്ച നടത്തും. ഗസ്സയിൽ സിവിലിയൻ കേന്ദ്രങ്ങൾക്ക്​ നേരെ ഇസ്രായേൽ വ്യാപക ആക്രമണം തുടരുകയാണ്​.

ഇന്നലെ വിവിധയിടങ്ങളിലായി 111 പേരെയാണ് ഇസ്രായേൽ സൈന്യം കൊലപ്പെടുത്തിയത്. ഗസ്സ ഹ്യുമാനിറ്റേറിയൻ ഫൗണ്ടേഷനിൽ സഹായം കാത്തുനിൽക്കുന്നതിനിടെയാണ് കൂടുതൽ പേർ കൊല്ലപ്പെട്ടത്​. ഭ​ക്ഷ​ണ​ത്തി​നാ​യി വ​രി​നി​ൽ​ക്കു​ന്നവരെ വെ​ടി​വെ​ച്ചു​കൊ​ല്ലു​ന്ന​ത് ഇസ്രായേൽ തു​ട​രു​ക​യാ​ണെ​ന്ന് ആം​നെ​സ്റ്റി, ഓ​ക്സ്ഫാം, സേ​വ് ദ ​ചി​ൽ​ഡ്ര​ൻ സം​ഘ​ട​ന​ക​ൾ കു​റ്റ​പ്പെ​ടു​ത്തി. ഇന്ധനക്ഷാമം രൂക്ഷമായ ഗസ്സയിൽ ആശുപത്രികളുടെ പ്രവർത്തനം നിർത്തി വെക്കേണ്ട സ്ഥിതിയിലാണെന്ന്​ ആരോഗ്യ വകുപ്പ്​ വ്യക്​തമാക്കി.

ഖാൻ യൂനുസിൽ ഹമാസ്​ നടത്തിയ പ്രത്യാക്രമണത്തിൽ ഒരു ഇസ്രായേൽ സൈനികൻ കൊല്ലപ്പെടുകയും 5 പേർക്ക്​ ഗുരുതര പരിക്കേൽക്കുകയും ചെയ്തു. അതിനിടെ, ഗസ്സയിലെ വംശഹത്യക്ക് ഇസ്രായേലിന് സഹായം നൽകുന്ന ഏജൻസികളുടെ പട്ടിക യു.എൻ പുറത്തുവിട്ടു. മൈക്രോസോഫ്​റ്റ്​, അൽഫബെറ്റ്​, ആമസോൺ ഉൾപ്പെടെ 48 കോർപ്പറേറ്റ് കമ്പനികളാണ് പട്ടികയിലുള്ളത്.