620 ഫലസ്തീനികളെ കൈമാറിയില്ലെങ്കിൽ ചർച്ചയില്ല; നിലപാട്​ കടുപ്പിച്ച്​​ ഹമാസ്​

ഗസ്സ സിറ്റി: ശനിയാഴ്ച വിട്ടയച്ച ആറ്​ ബന്ദികൾക്കു പകരമായി 620 ഫലസ്തീൻ തടവുകാരെ കൈമാറാതെ ഇസ്രായേലുമായി ഇനി ചർച്ചയില്ലെന്ന്​ ഹമാസ്. ഗസ്സക്കു മേൽ ആക്രമണം പുനരാരംഭിക്കാൻ മടിക്കില്ലെന്ന്​ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു കഴിഞ്ഞദിവസം മുന്നറിയിപ്പ്​ നൽകിയിരുന്നു. അപമാനകരമായ ചടങ്ങ്​ സംഘടിപ്പിച്ചുള്ള ബന്ദി കൈമാറ്റം അംഗീകരിക്കില്ലെന്നും നെതന്യാഹു വ്യക്​തമാക്കി.

എന്നാൽ, കരാർ അട്ടിമറിക്കാനുള്ള ഇസ്രായേൽ നീക്കം മാത്രമാണിതെന്ന്​ ഹമാസ്​ കുറ്റപ്പെടുത്തി. അനാവശ്യ ഉപാധികൾ മുന്നോട്ടുവെക്കുന്നത്​ ഉറ്റവരുടെ ജീവൻ അപകടത്തിലാക്കുമെന്ന്​ ബന്ദികളുടെ ബന്ധുക്കളും കുറ്റപ്പെടുത്തി. നെതന്യാഹു സർക്കാരിനെതിരെ വ്യാപക പ്രക്ഷോഭ പരിപാടികൾ തുടരാനും ബന്ധുക്കൾ തീരുമാനിച്ചു.

അതിനിടെ, പ്രതിസന്ധി പരിഹരിക്കാൻ മധ്യസ്ഥ രാജ്യങ്ങളായ ഖത്തറും ഈജിപ്തും ശക്​തമായ ശ്രമങ്ങൾ തുടരുകയാണ്​. അമേരിക്കൻ പ്രസിഡന്‍റ് ഡോണൾഡ്​​ ട്രംപിന്‍റെ പശ്ചിമേഷ്യൻ പ്രതിനിധി സ്റ്റീവ്​ വിറ്റ്​കോഫ്​ അടുത്തദിവസം ഇസ്രായേലിൽ എത്തും. ബന്ദികളുടെ മോചനത്തിനാണ്​ മുഖ്യപരിഗണയെന്ന്​ അമേരിക്ക അറിയിച്ചു.

അതേസമയം ജെനിൻ, തുൽക്​റാം ഉൾപ്പെടെ വെസ്റ്റ്​ ബാങ്ക്​ പ്രദേശങ്ങളിൽ ഇസ്രായേൽ സേനയുടെ അതിക്രമം തുടരുകയാണ്​. പ്രദേശത്തു നിന്ന്​ ഇതിനകം അര ലക്ഷത്തോളം ഫലസ്തീനികളാണ്​ അഭയാർഥികളായി മാറിയത്.​ തുൽക്​റാമിലെ നൂർ ഷംസ്​ അഭയാർഥി ക്യാമ്പിൽനിന്ന്​ മാത്രം 9000 പേരാണ്​ പലായനം ചെയ്​തത്​. ഇവിടങ്ങളിൽ​ ഇസ്രായേൽ കൂടുതൽ സൈനികരെ വിന്യസിച്ചിരിക്കുകയാണ്​. അഭയാർഥി ക്യാമ്പുകളിൽ കടുത്ത ഉപരോധവും ഏർപ്പെടുത്തിയിട്ടുണ്ട്​. ഭക്ഷണം അടക്കം വിതരണം ചെയ്യുന്നത്​ തടസ്സപ്പെടുത്തുകയാണെന്ന്​ സന്നദ്ധ സംഘടനകൾ ആരോപിക്കുന്നു.