ഗസ്സയിൽ വെടിനിർത്തൽ പ്രഖ്യാപനം ഉടൻ ഉണ്ടാകുമെന്ന്​ ട്രംപ്

തെൽ അവിവ്: ഗസ്സയിൽ വെടിനിർത്തൽ പ്രഖ്യാപനം ഉടൻ ഉണ്ടാകുമെന്ന്​ അമേരിക്കൻ പ്രസിഡന്‍റ്​ ഡോണൾഡ്​ ട്രംപ്​. യുഎസ്​ സമർപ്പിച്ച നിർദേശത്തിൻമേൽ ഹമാസ്​ പ്രഖ്യാപനം ഇന്നുണ്ടായേക്കും. ഗസ്സയിലേക്ക്​ ആവശ്യത്തിന്​ സഹായം ഉറപ്പാക്കിയില്ലെങ്കിൽ ഇസ്രായേലിനു മേൽ ഉപരോധം ചുമത്തുമെന്ന്​ ഫ്രഞ്ച്​ പ്രസിഡന്‍റ് ഇമ്മാനുവൽ മാക്രോൺ മുന്നറിയിപ്പ് നൽകി.

ഗസ്സയിൽ ഹമാസിനും ഇസ്രായേലിനും ഇടയിൽ വെടിനിർത്തലിന്​ സാധ്യത തെളിഞ്ഞതായി ​ ട്രംപ്​ പറഞ്ഞു. ഔദ്യോഗിക പ്രഖ്യാപനം ഉടൻ ഉണ്ടാകുമെന്നാണ്​ പ്രതീക്ഷയെന്നും വൈറ്റ്​ ഹൗസിൽ ട്രംപ്​ പ്രതികരിച്ചു. അതേസമയം വിവിധ ഫലസ്തീൻ വിഭാഗങ്ങളുമായി യുഎസ്​ നിർദേശം ചർച്ച ചെയ്തു വരികയാണെന്ന്​ ഹമാസ്​ പ്രതികരിച്ചു. എന്നാൽ പുതിയ നിർദേശം നിലവിലെ രൂപത്തിൽ നടപ്പാക്കിയാൽ ഗസ്സയിൽ കൊലപാതകങ്ങളും പട്ടിണിയും തുടരാൻ മാത്രമേ സഹായിക്കൂ എന്ന്​ ഹമാസ് പൊളിറ്റിക്കൽ ബ്യൂറോ അംഗം ബാസിം ​നയീം പറഞ്ഞു.

യുദ്ധം അവസാനിപ്പിക്കുന്നതടക്കം ഗസ്സയിലെ ജനങ്ങളുടെ ആവശ്യങ്ങളൊന്നും ​ വെടിനിർത്തൽ നിർദേശത്തിലില്ലെന്ന് നയീം കുറ്റപ്പെടുത്തി. വെടിനിർത്തൽ നിർദേശത്തോടുള്ള ഹമാസിന്‍റെ പ്രതികരണം ഇന്ന്​ അറിയിക്കുമെന്ന് രഹസ്യവൃത്തങ്ങളെ ഉദ്ധരിച്ച്​ റോയ്ട്ടേഴ്സ് റിപ്പോർട്ട് ചെയ്തു.60 ദിവസത്തെ വെടിനിർത്തൽ ​വേളയിൽ 28 ഇസ്രായേൽ ബന്ദികളെ വിട്ടയക്കുകയും പകരം 1236 ഫലസ്തീൻ തടവുകാരെ മോചിപ്പിക്കാനുമാണ് കരാറിന്‍റെ കരടിലുള്ളതെന്നാണ്​ വിവരം.

ഗസ്സയിൽ ഇസ്രായേൽ ആക്രമണത്തിൽ ഇന്നലെ 58 പേർ കൂടി കൊല്ലപ്പെട്ടു. ഖാൻ യൂനുസിലാണ്​ കൂടുതൽ മരണം. ഹമാസ്​ ചെറുത്തുനിൽപ്പിൽ 4 ഇസ്രായേൽ സൈനികർക്ക്​ ഗുരുതരമായി പരിക്കേറ്റു. പട്ടിണി മൂലം വലയുന്ന ഗസ്സ നിവാസികൾക്കായി ഏർപ്പെടുത്തിയ താൽക്കാലിക ഭക്ഷ്യവിതരണ കേന്ദ്രങ്ങളിലെത്തുന്നവർക്ക്​ നേരെ ഇസ്രായേൽ അതിക്രമം ഇന്നലെയും തുടർന്നു.