ഗസ്സ സിറ്റിക്ക്​ നേരെയുള്ള ഇസ്രായേൽ ആക്രമണം രൂക്ഷം; നിരവധിപേര്‍ പലായനം ചെയ്യുന്നു

ഗസ്സസിറ്റി: ഗസ്സ സിറ്റിക്ക്​ നേരെയുള്ള ഇസ്രായേൽ ആക്രമണം രൂക്ഷമായതോടെ ആയിരങ്ങൾ പ്രദേശത്തുനിന്ന്​ പലായനം ചെയ്യുന്നതായാണ് റിപ്പോർട്ട്​.

ഗസ്സ സിറ്റിയുടെ വടക്കുള്ള സഫ്താവിയിൽ നിന്ന്​ നൂറുകണക്കിന്​ ഫലസ്തീനികളെ സൈന്യം പുറന്തള്ളി. പ്രദേശത്തെ നിരവധി വസതികളും കെട്ടിടങ്ങളും ഇസ്രായേൽ ബോംബിട്ട്​ തകർത്തു. സുരക്ഷിതമായ ഒരിടം പോലും ഗസ്സയിൽ ബാക്കിയില്ലെന്നിരിക്കെയാണ്​ ഗസ്സ സിറ്റിയിൽ നിന്ന്​ ലക്ഷങ്ങളോട്​ മാറിപ്പോകാൻ സൈന്യം ആവശ്യപ്പെടുന്നത്​. ഇന്നലെ മാത്രം 64 പേരെയാണ്​ സൈന്യം കൊലപ്പെടുത്തിയത്​. ഇവരിൽ 14 പേർ സഹായം തേടിയെത്തിയ ഫലസ്തീനികളാണ്​.

പട്ടിണിമൂലം മൂന്നു പേർ കൂടി മരിച്ചു. ഇതോടെ 117 കുട്ടികളുൾപ്പടെ പട്ടിണിക്കൊലയിൽ മരിച്ചവരുടെ എണ്ണം 303 ആയി. ഗസ്സയിലേക്ക്​ കൂടുതൽ സഹായം എത്തിക്കണമെന്ന ആവശ്യം ഇസ്രായേൽ തള്ളിയത്​ സ്ഥിതിഗതികൾ കൂടുതൽ ദുരന്തപൂർണമാക്കുമെന്ന്​ യു.എൻ സെക്രട്ടറി ജനറൽ ആന്‍റണിയോ ഗുട്ടറസ്​ പറഞു.

ഗസ്സയിലെ യുദ്ധകുറ്റങ്ങൾക്ക്​ ഇസ്രായേലിന്​ സഹായം നൽകുന്ന യു.എസ്​ സൈനികർക്കെതിരെ നിയമനടപടി സ്വീകരിക്കുമെന്ന്​ ഹ്യൂമൻറൈറ്റ്​സ്​ വാച്ച്​ മുന്നറിയിപ്പ്​ നൽകി. കഴിഞ്ഞ ദിവസം അൽ നാസർ ആശുപത്രിയിൽ ബോംബിട്ട്​ 5 മാധ്യമപ്രവർത്തകർ ഉൾപ്പെടെ 21 പേരെ കൊലപ്പെടുത്തിയ ഇസ്രായേൽ നടപടിയെ ചോദ്യം ചെയ്ത്​ യൂറോപ്യൻ യൂനിയൻ രംഗത്തുവന്നു.

ആശുപത്രിയിൽ നിന്ന്​ സൈനിക നീക്കം നിരീക്ഷിക്കാൻ ഹമാസ്​ പോരാളികൾ സ്ഥാപിച്ച ക്യാമറ തകർക്കുന്നതിനിടെയാണ്​ മാധ്യമ പ്രവർത്തകരും മറ്റും കൊല്ലപ്പെട്ടതെന്ന ഇസ്രായേൽ വാദം അംഗീകരിക്കാനാവില്ലെന്ന്​ ബ്രിട്ടൻ കുറ്റപ്പെടുത്തി. അതേസമയം ഹമാസിന്റെ പിടിയിലുള്ള ബന്ദികളെ തിരിച്ചെത്തിക്കാൻ വെടിനിർത്തൽ ആവശ്യപ്പെട്ട് ഇസ്രായേലിൽ വൻ പ്രതിഷേധം തുടരുകയാണ്​. ടയറുകൾ കത്തിച്ച് പ്രധാന റോഡുകൾ ഉപരോധിച്ചായിരുന്നു പ്രതിഷേധം. ലക്ഷങ്ങളാണ്​ തെൽ അവീവ്​ ഉൾപ്പെടെ ഇസ്രായേൽ നഗരങ്ങളിൽ നടന്ന പ്രതിഷേധ പരിപാടികളിൽ സംബന്ധിച്ചത്.