ഗസ്സയിൽ ഇസ്രായേൽ ഉപരോധം തുടരുന്നു; സഹായവിതരണത്തിന്​ ഇനിയും സംവിധാനമായില്ല

​ഗസ്സ സിറ്റി: കൂടുതൽ പട്ടിണിമരണങ്ങൾ റിപ്പോർട്ട്​ ചെയ്ത ഗസ്സയിൽ സഹായവിതരണത്തിന്​ ഇനിയും സംവിധാനം ആയില്ല. ഗസ്സയിൽ വംശഹത്യയുടെ ക്രൂരഘട്ടം കൂടിയാണിതെന്ന്​ യുഎൻ അറിയിച്ചു. ആക്രമണം തുടർന്നാൽ ഇസ്രായേലിനു മേൽ സാമ്പത്തിക ഉപരോധത്തിന്​ മടിക്കില്ലെന്ന്​ കൂടുതൽ രാജ്യങ്ങൾ അറിയിച്ചു. ഇസ്രായേലിൽ നെതന്യാഹുവിരുദ്ധ പ്രക്ഷോഭം ശക്തമായിരിക്കുകയാണ്.

മൂന്നു മാസത്തോളമായി തുടരുന്ന ഇസ്രായേൽ ഉപരോധം കാരണം മുന്നൂറിലേറെ പട്ടിണിമരണം റിപ്പോർട്ട്​ ചെയ്ത ഗസ്സയിലേക്ക്​ കൂടുതൽ സഹായ ട്രക്കുകൾക്ക്​ അനുമതി നൽകാൻ വിസമ്മതിച്ച്​ ഇസ്രാ​യേൽ. 110 ട്രക്കുകൾ മാത്രമാണ്​ ഗസ്സയിൽ എത്തിയത്​. എന്നാൽ ഭക്ഷ്യവിതരണത്തിന്​ ബദൽ സംവിധാനം ഒരുക്കുമെന്ന ഇസ്രായേൽ-അമേരിക്കൻ പ്രഖ്യാപനം വിജയം കണ്ടില്ല.

പട്ടിണി വ്യാപകമായ ഗസ്സയിൽ നിത്യം 600 ട്രക്ക്​ സഹായമെങ്കിലും ഉറപ്പാക്കണമെന്ന്​ യുഎൻ ആവശ്യപ്പെട്ടു. വംശഹത്യയുടെ ക്രൂരഘട്ടത്തിലൂടെയാണ്​ ഗസ്സ കടന്നുപോകുന്നതെന്ന്​ യുഎന്നിലെ ഫലസ്​തീൻ പ്രത്യേക ദൂതൻ ഫ്രാൻസിസ്കാ അൽബനീസ്​ പറഞ്ഞു. ആക്രമണവും ഉപരോധവും തുടർന്നാൽ ഇസ്രായേലിനുമേൽ സാമ്പത്തിക ഉപരോധം പ്രഖ്യാപിക്കാൻ നിർബന്ധിതരാകുമെന്ന്​ വിവിധ യൂറോപ്യൻ രാജ്യങ്ങളും മുന്നറിയിപ്പ്​ നൽകി. ബ്രിട്ടൻ, ഫ്രാൻസ്​, കനഡ രാജ്യങ്ങളാണ്​ ഇസ്രായേലിനു മേൽ ശക്തമായ രാഷ്ട്രീയ-നയതന്ത്ര സമ്മർദവുമായി രംഗത്തുള്ളത്​.

ഇസ്രായേലിൽ നെതന്യാഹുവിരുദ്ധ പ്രക്ഷോഭം കൂടുതൽ ശക്തമാക്കാൻ ബന്ദികളുടെ ബന്ധുക്കൾ തീരുമാനിച്ചു. ഹമാസുമായി കരാറിലെത്തി യുദ്ധം അവസാനിപ്പിക്കണം എന്നാവശ്യപ്പെട്ട്​ ആയിരങ്ങൾ തെൽ അവീവിൽ റാലി നടത്തി. ഹമാസ് ബന്ദിയാക്കിയിരിക്കെ താൻ ഏറ്റവും ഭയപ്പെട്ടിരുന്നത് ഇസ്രായേലിന്‍റെ വ്യോമാക്രമണമായിരുന്നെന്ന് ഇസ്രായേൽ യുവതിയായ നാമ ലെവി പറഞ്ഞു.

സമാധാന കരാറിന്‍റെ രണ്ടാംഘട്ടത്തിൽ ഹമാസ് വിട്ടയച്ച നാലു വനിത ഇസ്രായേൽ സൈനികരിൽ ഒരാളാണ്​ 20കാരിയായ നാമ ലെവി. അതിനിടെ, നൊന്തുപെറ്റ ഒൻപത് കുഞ്ഞുങ്ങളും ഇസ്രായേൽ ആക്രമണത്തിൽ കൊല്ലപ്പെട്ട വനിതാ ഡോക്ടർ അല അൽ നജ്​ജാർ ഫലസ്തീന്‍റെ മാത്രമല്ല, ലോകത്തിന്‍റെയും നോവായി മാറി. ഖാൻ യൂനുസിലെ ഇവരുടെ വീട്​ ആക്രമിച്ചാണ്​ ഇസ്രായേലിന്‍റെ കൊടുംക്രൂരത. നടുക്കവും വേദനയും സൃഷ്ടിക്കുന്നതാണ്​ വാർത്തയെന്ന്​ വിവിധ രാജ്യങ്ങൾ പ്രതികരിച്ചു.