യേശുവിനെ കാണാനെന്ന പേരിൽ 190 കുട്ടികൾ ഉൾപ്പെടെ 191 പേരെ പട്ടിണിക്കിട്ട് കൊന്നു; പോൾ മക്കൻസിക്കും 28 അനുയായികൾക്കും വധശിക്ഷ

നെയ്റോബി: യേശുവിനെ കാണാനെന്ന പേരിൽ അനുയായികളെയും കുട്ടികളെയും പട്ടിണിക്കിട്ട് കൊലപ്പെടുത്തിയ കേസിൽ കെനിയയിലെ സ്വയം പ്രഖ്യാപിത പാസ്റ്ററും കൾട്ട് നേതാവുമായ പോൾ മക്കെൻസിക്കും 28 അനുയായികൾക്കും വധശിക്ഷ. 191 പേരെ കൊലപ്പെടുത്തിയ കേസിലാണ് മൊംബാസ കോടതി ഇവരെ കുറ്റക്കാരായി കണ്ടെത്തിയത്. കൊല്ലപ്പെട്ടവരിൽ ഒരാളൊഴികെ ബാക്കിയെല്ലാവരും കുട്ടികളാണ്. ഇവർക്കുള്ള ശിക്ഷ നവംബർ ആറിന് പ്രഖ്യാപിക്കും.

ലോകാവസാനത്തിന് മുമ്പ് സ്വർഗത്തിലെത്തി യേശുവിനെ കാണാമെന്ന് വിശ്വസിപ്പിച്ച് അനുയായികളെയും അവരുടെ മക്കളെയും പട്ടിണിക്കിട്ട് കൊല്ലാൻ അനുയായികൾക്ക് നിർദേശം നൽകിയ 'ഗുഡ് ന്യൂസ് ഇന്റർനാഷണൽ ചർച്ച്' എന്ന തീവ്ര കൾട്ട് സംഘത്തിന്റെ നേതാവാണ് മക്കെൻസി. തെക്കുകിഴക്കൻ കെനിയൻ തീരത്തിന് സമീപമുള്ള ഷാക്കഹോള വനത്തിലെ 800 ഏക്കറോളം വരുന്ന പ്രദേശത്താണ് കൂട്ടക്കൊലകൾ അരങ്ങേറിയത്. ഇവിടെ കുട്ടികൾ ആദ്യം മരിക്കണമെന്നും തുടർന്ന് കൗമാരക്കാരും സ്ത്രീകളും ഒടുവിൽ പുരുഷന്മാരും മരിക്കണമെന്നുമുള്ള രീതിയിലാണ് മക്കെൻസി പട്ടിണി വ്രതം ആസൂത്രണം ചെയ്തതെന്ന് പ്രോസിക്യൂഷൻ കോടതിയെ അറിയിച്ചു.

2023-ൽ ലഭിച്ച രഹസ്യ വിവരത്തെ തുടർന്ന് നടത്തിയ അന്വേഷണത്തിലാണ് ഞെട്ടിക്കുന്ന കൂട്ടക്കുഴിമാടങ്ങൾ കണ്ടെത്തിയത്. ഷാക്കഹോള വനത്തിൽ നടത്തിയ തിരച്ചിലിൽ ആഴം കുറഞ്ഞ കുഴികളിൽ നിന്നായി 400-ലധികം മൃതദേഹങ്ങൾ പിന്നീട് അധികൃതർ പുറത്തെടുത്തു. രാജ്യത്തിന്റെ ചരിത്രത്തിലെ തന്നെ ഏറ്റവും വലിയ കൾട്ട് ദുരന്തമായാണ് ഇത് കണക്കാക്കപ്പെടുന്നത്. കടുത്ത പോഷകാഹാരക്കുറവാണ് മരണകാരണമെന്ന് പരിശോധനകളിൽ കണ്ടെത്തിയിരുന്നു.

ഇരകളെ പട്ടിണി കിടക്കാൻ താൻ നിർബന്ധിച്ചിട്ടില്ലെന്ന് മക്കെൻസി വാദിച്ചെങ്കിലും മൊംബാസ കോടതി ജസ്റ്റിസ് ഡയാന മൊച്ചാച്ചെ ഈ വാദം തള്ളി. നേരത്തെയും രണ്ടുതവണ മക്കെൻസിയെ പോലീസ് അറസ്റ്റ് ചെയ്തിരുന്നെങ്കിലും പിന്നീട് വിട്ടയച്ചിരുന്നു. ഭീകരവാദം, തീവ്രവാദ പ്രവർത്തനം, കുട്ടികൾക്ക് വിദ്യാഭ്യാസം നിഷേധിക്കൽ തുടങ്ങിയ മറ്റ് കേസുകളിലും ഇയാൾക്കെതിരെ വിചാരണ നടക്കുന്നുണ്ട്.

രണ്ട് പേരക്കുട്ടികൾ ഉൾപ്പെടെ കുടുംബത്തിലെ എട്ട് പേരെ നഷ്ടപ്പെട്ട ഫ്രാൻസിസ് വാഞ്ചെ ഉൾപ്പെടെ നിരവധി ഇരകളുടെ ബന്ധുക്കൾ വിധി കേൾക്കാൻ കോടതിയിലെത്തിയിരുന്നു. സംഭവം കുടുംബത്തിന് കനത്ത മാനസികാഘാതമാണ് ഉണ്ടാക്കിയതെന്ന് 62-കാരനായ വാഞ്ചെ പറഞ്ഞു. മൂന്ന് വർഷം മുമ്പ് പുറത്തുവന്ന ഈ ദുരന്തം കെനിയയിൽ മതപരമായ സംഘടനകൾക്ക് കർശന നിയന്ത്രണം ഏർപ്പെടുത്തണമെന്ന ശക്തമായ ജനകീയ ആവശ്യത്തിന് വഴിവെച്ചിരുന്നു.